Sikreto nga dossier, kabahin sa desperadong kampanyang pagdaot sa PKP ug BHB

Gregorio "Ka Roger" Rosal
Spokesperson
Communist Party of the Philippines
Oktubre 12, 2002

Gipanghimaraot sa Partido Komunista sa Pilipinas ang pagpakaylap sa gobyernong Macapagal-Arroyo og usa ka "sikreto nga dossier (dokumentasyon)" diha sa mga nasud sa European Union.

Gihagit nako si Mr. Blas Ople nga ipagawas kini nga dossier, nga maoy nagpamatuod kuno sa pasangil nila nga "terorista" ang PKP ug BHB.

Kung tinuod nga makapasar kini sa mga sukaranang hudisyal, gihagit sa PKP ang rehimeng Macapagal-Arroyo nga gamiton kini nga dossier ug mosang-at og pormal nga kaso sa International War Crimes Tribunal nga nagbista og mga kaso sa "war crimes" ug mga paglapas sa Geneva Conventions.

Kini nga "sikretong dossier" maoy pinaka-ulahi lamang sa mga walay pulos nga propaganda batok sa rebolusyonaryong kalihukan. Kabahin kini sa usa ka desperado kaayong pagdaot diha sa BHB nga kasamtangang binuhatan ra sa AFP ug rehimeng Macapagal-Arroyo. Sa niining kampanyaha, pilit nga gihulagway'ng lambigit sa krimen ang BHB ug adunay plano nga magsabwag og kahasi sa katawhan. Lakip niini ang mosunod nga direktang mga binaliko nga propagandang gipagawas sa militar niining miaging mga adlaw:

(a) nga lambigit ang BHB sa pagpamomba niadtong Oktubre 10, 2002 sa Kidapawan City, North Cotabato

(b) nga nanguha og pundo ang BHB sa mga operasyon sa hweteng

(k) nga adunay 150 ka "hit squad" nga gi-organisa ang BHB nga kasamtangang anaa sa Metro Manila

(d) nga adunay plano ang BHB nga magpabuto og mga bomba sa Metro Manila ug Central Luzon;

Hugot namong gihimakak kining tanan. Kining tanan hingpit nga walay kapasikaran ug hinimohimo sa mga operatibang saywar nga walay laing gihunahuna kundili dauton ang BHB sa tanang kahigayonan ug pamaagi--bisan pa nga ang mga sugilanong gimugna nila, layo kaayo sa pangatarungan ug kamatuoran.

Naglisud og maayo ang militar nga mansahan ang BHB kay tinud-anay'ng maayo kaayo ang rekord sa hukbo sa katawhan sa pagpasiugda sa interes sa katawhan ug pagsiguro sa ilang kabulahanan. Busa, dili usab molungtad ug hisayran gidayon gihapon sa katawhan nga ang gibasehan sa maong desperadong propagandang gisabwag sa mga operatibang saywar sa AFP, tanan kabakakan.###