Labaw Nga Tama Ngan Ginkikinahanglan An Erestorya Pankamurayawan

Gregorio "Ka Roger" Rosal
Spokesperson
Communist Party of the Philippines
Oktubre 11, 2002

Samtang labaw nga nagkapaso an gerra sibil ha Pilipinas, labaw nga tama ngan ginkikinahanglan an erestorya pankamurayawan.

Ito agud matimangno an interes ngan kaupayan han katawhan Pilipino labina tikang ha pan-aabuso han militar, seguruhon an pag-uundong han mga internasyunal nga makatawo nga balaud ngan pagsurundon ha gerra ngan atubangon an mga gamot han armado nga banggaan ha katuyuanan nga sulbaron an mga ito

Diri kabaliskaran, kun sugad, an pakikipaghimangraw pankamurayawan ha pagpaso han armado nga banggaan. Lugod, hul-os ini nga ginkikinahanglan.

Sanglit permi nga abre an Partido Komunista han Pilipinas ngan mga rebolusyonaryo nga organisasyon nga umatubang ha hain man nga rehimen nga andam ha seryuso ngan sinsero nga pakikipaghimangraw pankamurayawan.

Kundi waray gud interes an rehimen Macapagal-Arroyo ha erestorya pankamurayawan. Hul-os na nga nangingibabaw an mga militarista nga hadto pa man in bumalabag ha ngatanan han mga pananalinguha nga ig-undong ngan isulong an erestorya pankamurayawan. Sanglit, diri kapausahan an pahayag han puno nga militarista nga hi Angelo Reyes nga �waray gamit� an erestorya pankamurayawan nga hadto pa man hiya na an numero uno nga ulang ha pagsulong han erestorya nga NDFP-GRP.

Nadiri gud hira Gen. Angelo Reyes nga makikighimangraw pankamurayawan tungod kay nakakaulang ito ha todo-todo nga gerra nga ginbuhian han mga utok-pulbura nga pasista. Hul-os na hiya yana nga ginsusuportahan ni Gloria Macapagal-Arroyo nga mayda damo nga oras para ha �sex� pero waray oras para ha erestorya pankamurayawan. Nakada la ngatanan ha inop ni Macapagal-Arroyo an ginsering niya nga �95% han katawhan� in �nadiri� na ha erestorya pankamurayawan.

Nakikig-usa kami ha nagkaiba-iba nga mga organisasyon masa, mga pulitiko, mga tawo-han-simbahan, mga doktor, negosyante ngan iba pa nga nananawagan nga otro nga abrehan an pormal nga erestorya pankamurayawan. Nagpapabilin nga bug-os an Negotiating Panel han NDFP. Permi andam hira kasamang Luis Jalandoni nga umatubang ha katugbang hini nga panel han GRP.

Andam an PKP ngan Bagong Hukbong Bayan nga ig-undong an ngatanan han mga kasarabutan nga GRP-NDF kalakip an Comprehensive Agreement on Respect for Human Rights and International Humanitarian Law (CARHRIHL). Hul-os nga gintagan-importansya han PKP ngan BHB ini nga mga kasarabutan, labina an CARHRIHL tungod kay gin-uundong hini an mga katungod han masa ngan nagtalaan hin mga pitad para ha pagsasalawad han mga araba kontra ha pan-aabuso.

Nananawagan kami ha ngatanan nga grupo ngan indibidwal nga interesado ha erestorya pankamurayawan nga atuhan an ngatanan nga maniobra han mga militarista nga igbasura an erestorya pankamurayawan.

Kadungan hini, karuyag namon nga ipahayag an kaandaman han PKP ngan BHB nga padayon nga magpursigi ha armado nga pakigbisog ngan pakyason an todo-gerra han rehimen Macapagal-Arroyo. Magpapadayon an mga armado nga opensiba han Bagong Hukbong Bayan agud balabgan an mga abusador nga tropa militar ngan depensahan an interes ngan mga rebolusyonaryo nga kadaugan han katawhan.

Back to top