Pagpahalipay sa malampusong reyd sa BHB sa Compostela Valley

Gregorio "Ka Roger" Rosal
Spokesperson
Communist Party of the Philippines
Setyembre 26, 2002

Buut nako nga ipaabot ang akong nagdilaab nga pagpahalipay sa mga mabayanihong Pulang manggugubat sa Pulang Bagani Company ubos sa Merardo Arce Command sa Bagong Hukbong Bayan sa malampusong reyd sa istasyon sa PNP sa lungsod sa Maco, Compostela Valley sa Southern Mindanao nga nagresulta sa pag-imbargo sa kapin-kun-kulang 35 ka mga armas gikan sa armory niini.

Ang reyd niining Septembre 24 nagmalampuson nga gilunsad sa hugut nga pakigtinabangay sa BHB diha sa masa sa lokalidad, ilabina sa gimbuhatong paniktik ug pagtigum og mga impormasyon mahitungod sa target nga istasyon sa PNP. Piho ning kadaugan, ilaha gyud ug sa BHB.

Bunga sa husay nga paggamit sa BHB og mga malansihon nga taktika sama sa pagpaaron-ingnon nila isip mga sundalo sa AFP ug paggamit sa presensya sa mayor didto, naghulagway�ng kataw-anan gyud ang mga nakaasayn nga pulis sa istasyon, tungod kay wala man gani makadepensa niini. Wala man usab kini makapakugang kay kung tugkaron, bisan asa sa nasud, ubos kaayo ang moral sa mga armadong pwersa sa reaksyunaryong gubyerno, ilabina taliwala sa kawad-on nila og suporta gikan sa masa ug paspas nga pag-asdang sa rebolusyonaryong armadong kalihukan.

Apan labaw�ng kalataw-anan gyud ang kadanghag ni Lt. Col. Danilo Servando (Public Information Officer sa AFP) nga nag-ila sa reyd sa Maco ug sa daghan pang mga taktikal nga opensiba sa BHB batok sa AFP ug PNP isip mga �teroristang� binuhatan sa Partido ug BHB.

Sama sa nangagi nga reyd sa Compostela Valley, ang mga taktikal nga opensiba sa BHB gilunsad batok sa mga depinido ug lehitimong target-militar ug kanunay�ng naghatag og pagtagad sa kabulahanan sa masa. Bisan gani ang mga pulis sa Maco nga dali rang misurender taliwala sa reyd sa BHB, wala gyud dagmali tungod kay giila sa BHB ang ilang mga katungud nga napatik sa mga internasyunal nga kalagdaan sa mga armadong panagbangi. Niining mga kalagdaan, nasakup ang Geneva Conventions, ug lakip usab ang mas hugut nga mga kalagdaan sa disiplina sa BHB hingpit nga gipasiugda ug gituman.

Lahi niini ang naghingapin nga pagpanagmal sa masa nga mauy direktang target sa mga kontra-rebolusyonaryong operasyon sa AFP ug PNP. Lakip sa pagpanggun-ub nila ang pinugsanay�ng pagpabakwit sa mga tawo, pagpaarak ug pagpanunog sa kabalayan sa mga sibilyan, arbitraryong pagpamatay ug pagpanortyur, pagpangguba og pananum ug panginabuhian sa masa ug uban pang katampalasan ilabina batok sa mga mag-uuma ug mga katawhang lumad. Pinakagrabi ang maong pasista-teroristang pagpangabuso diha sa Basilan, Mindoro, Laguna, Bohol, Negros, Panay, Central ug Northern Luzon.

Sulud lamang sa pito ka bulan, nagsugod sa Enero 22 hangtud sa Hulyo 15, 2002, aduna nay natalang 1,334 ka mga kaso sa mga paglapas sa tawhanong katungud. Kapin 37,164 ang biktima sa mga paglapas sa AFP sa mga sibil nga katungud. Sa kasamtangan, adunay 167 ka mga bilanggong pulitikal sa 63 ka mga bilangguan.

Kining tanan mauy paglapas sa internasyunal nga mga kalagdaan ug balaud sa hisgutanan sa armadong panagbangi. Sa paningkamut sa mga organisasyong nagpasiugda sa tawhanong katungud, dokumentado kini dili sama sa mga minugna-mugna ug iresponsableng pagpasangil sa AFP nga dili mupasar sa pagpanukiduki sa bisan kinsamang walay pihig nga huwes.

Back to top