Hiunong ha terorismo han imperyalismo nga US ngan rehimen Macapagal-Arroyo

Gregorio "Ka Roger" Rosal
Spokesperson
Communist Party of the Philippines
Setyembre 12, 2002

Nakikig-urosa an Partido Komunista han Pilipinas ha pagdumdum ha yukot-yukot nga katawhan nga Amerikano ngan iba pa nga nasyunalidad nga biktima han terorista nga atake hadton Setyembre 11, 2001 ha WTC ngan Pentagon ha USA.

Mahihinumduman hadton naglabay nga tuig iginpahayag namon an pagkondenar han Partido Komunista hini. Kadungan hito kinondenar liwat han PKP an mas samwak ngan mas grabe nga terorismo han imperyalismo nga US nga adlaw-adlaw nga naghatag-kahibangan ha milyun-milyon nga katawhan ha bug-os nga kalibutan.

Paglabay han usa katuig, dugang nga ginduduon han PKP an katindog hini kontra ha terorismo, labina ha terorismo han imperyalismo nga US nga naghatag-kahibangan yana ha bug-os nga kalibutan. An gindeklarar nga "gerra kontra-terorismo" ngan gerra nga waray katubtoban" nagdudurot yana hin waray kapadis nga kakurian ngan pag-antos ha katawhan han Afghanistan, nagtatarhug nga dugang santadohon an Iraq ngan nagtatarhug han paglarab han mas hiluag nga gerra.

Gin-gagamit yana han imperyalismo nga US an "gerra kontra-terorismo" komo daitlanan para ha pagpapahiluag han poder hini ha bug-os nga kalibutan. Ginbirikis hini an kamot han ngatanan nga nasud, tinatamakan an ira soberanya ngan ginbabalewaray an mga internasyunal nga institusyon, kasarabutan ngan mga suklanan ha sibilisado nga relasyon han mga talwas nga nasud.

Ginkokondenar han Partido Komunista han Pilipinas an terorismo, pang-gegerra ngan panulsol han gerra han imperyalismo nga US. Ginkokondenar liwat han PKP an rehimen Macapagal-Arroyo nga waray ginhihimo kundi an buta nga pagsunod ha kada sugo han amo hini nga hi US President Bush.

Tinuyo nga iresponsable, waray-basaranan ngan malisyoso an pagngangaran han imperyalismo nga US nga rehimen Macapagal-Arroyo nga terorista an PKP ngan BHB. Baliko an panrarason ni Macapagal-Arroyo nga mga "generic terrorist" an PKP ngan BHB tungod kay nagsusulong ito han armado nga pakigbisog nga nagtutumuyo nga pabagsakon an reaksyunaryo nga gubyerno. Kun mayda gutiyuyo man la nga kahibaro ha internasyunal nga balaud hi Macapagal-Arroyo angay nga mahibaruan niya nga samwak nga kinakarawat ha kalibutan nga mayda pagkakaiba an terorismo ngan rebolusyonaryo nga armado nga pag-ato ha usa nga matalumpiguson nga estado nga sugad han papet nga republika han Pilipinas.

Ginhimo la an sugad hini nga pagngangaran ha PKP ngan BHB agud matagan-rason an dirudiretso nga presensya han mga tropa nga Amerikano ha nasud. Ha naglabay nga tuig, gin-gamit han imperyalismo nga US ngan papet nga rehimen Macapagal-Arroyo an "gerra kontra-terorismo" agud otro nga ibalik an mga tropa nga Amerikano ha nasud ngan seguruhon an permanente nga presensya hini nira. Gin-gamit ngan padayon nga gagamiton han US an paglalansar hin mga magkatirig-ob nga pagpapahiara-militar komo pantahub ha direkta nga armado nga panginginlabot han US ha mga pansakob nga karukayaknon han Pilipinas.

Nagtitindog an PKP ngan Bagong Hukbong Bayan nga waray lugar ngan kabaliskaran an terorismo ha pagsusulong han rebolusyonaryo nga armado nga pakigbisog ngan talapas ini ha mga internasyunal nga suklanan ha kondukta han gerra. Ini nga pagtitindog diri la nga iginpahayag ni Ka Roger, kundi naka-ukit ha mga batakan nga prinsipyo ngan pagsurundon nga adlaw-adlaw nga iginpapatuman han mga mangaraway han Bagong Hukbong Bayan.

Ha praktika, kun naggagamit hin terorismo an PKP ngan BHB, ngan kun ginriringgal, tinalumpigos ngan tinatarhug hini an katawhan, waray kunta rebolusyonaryo nga armado nga pakigbisog nga samwak ha bug-os nga nasud yana, nga ginsusuportahan ngan gin-uundong han milyun-milyon nga Pilipino ngan adlaw-adlaw nga naghihiluag ngan nagkukusog.

Waray lugar an terorismo ha pagsusulong han gerra han katawhan. Kabaliskaran ini ha mga batakan nga rebolusyonaryo nga prinsipyo. Kamatuoran, diri masulong komo usa nga hiluagan nga panmasa nga panalinguha an rebolusyon kun naggagamit hin terorismo ngan naghihibang ha interes ngan kaupayan han masa.

Ha panan-aw han imperyalismo nga US ngan reaksyunaryo nga estado, terorista an Partido ngan BHB tungod kay an tinguha, mga prinsipyo ngan buruhaton hini in naghahatag hin kahadlok ngan kahibangan ha ira. Pero para la ini ha ira.

Ha mata han masa nga mga trabahador ngan parag-uma, an ungod nga terorista amo an mersenaryo nga AFP ngan PNP ngan iba pa nga mga mersenaryo nga armado nga grupo han reaksyunaryo nga rehimen. Sistematiko nga gin-gagamit han reaksyunaryo nga estado an terorista nga binuhatan sugad han pambobomba, pagpapauran hin bala, iligal nga pang-aaresto, pwersahan nga pagpapaiwas, pagsosona, pagkidnap, tortyur ngan pagpatay ha mga sibilyan agud hadlukon an mga tawo ngan puypoyon an mapan-ato nira nga diwa.

Labaw ito yana nga padig-onon pinaagi ha ginproponer nga balaud nga Anti-Terrorism kuno nga nakasalawad yana ha kongreso. Kun magigin balaud, dugang nga magigin waray-alang, waray ginpipili ngan waray katubtoban an pagkamadarahug, pagsosobra ngan pang-aabuso han mersenaryo nga AFP kontra ha hin-o man nga kilal-on nga kaaway ni Macapagal-Arroyo ngan reaksyunaryo nga estado.

An terorismo kabaliskaran ha mga rebolusyonaryo nga prinsipyo ngan talapas ha mga istrikto nga palisiya nga iginpapatuman han mga mangaraway han BHB. An pagrespeto ngan pag-ataman ha mga higamit, tanom, pakabuhian ngan interes han masa in permi nga prinsipal ha ngatanan nga ginhuhunahuna ngan paggios han Partido ngan BHB. Anuman nga nahimo nga kabaliskaran o talapas hini nga prinsipyo agap nga ginsususnan ngan igintutul-id ngan ginsisirotan kun grabe na.

Diri madiwara han AFP nga padayon nga nagkahiluag an BHB ngan rebolusyonaryo nga kagiusan. Pero agud diri mapaawod ngan tahuban an ungod nga hinungdan han paghiluag han rebolusyonaryo nga kagiusan, sinesering han mga utok-bolinaw nga upisyal militar nga naghiluag an impluwensya han BHB tungod kuno ha damo nga lugar an pwersado nira nga bayaan tungod kay kinahanglan ideploy an pira nga batalyon ha Basilan agud lanaton an Abu Sayyaf ( nga ha luyo han yukot-yukot nga tropa nagpapabilin pa gihapon nga nakakahibang).

An sugad nga rason tinuyo nga binaliko ngan usa nga dako nga buwa. Tungod kay an ungod, diri san-o man nawawara ha ginpuntirya han mga pusil ngan kanyon han AFP an BHB. Bisan hadton ginsugo ni Macapagal-Arroyo an paglanat ha Abu Sayyaf, nagpabilin nga sumobra-kumulang 75% han pwersa han AFP o halos 200,000 tropa an nakadeploy ha mga sona nga gerilya. Kundi bisan ini waray makapugong ha pagsulong han BHB. Ha isla han Mindoro nga ginkokonsiderar nga nasudnon nga prayoridad ni Macapagal-Arroyo mismo, padayon nga naghiluag an BHB luyo han deployment didto han 7 batalyon han pwersa nga pangatake han AFP ngan luyo ha waray wantas nga panmatay han mga sibilyan, mga pagtalapas ha katungod pantawo ngan panhibang ha pakabuhian han masa.

Ha bug-os nga nasud, naabot na yana ha 128 an mga prente gerilya nga ginigiosan han BHB tikang ha sobra 100 hadton 2001 antes la lumingkod hi Macapagal-Arroyo. Sinering pa ni Macapagal-Arroyo nga ini nga mga pagsulong han BHB dara han terorista nga panarhug han BHB ha masa. Kun sugad, gin-aayat namon hira nga magpakita hin bisan usa nga kaso man la han ginsering nira nga panarhug ha masa nga kumpleto han mga apidabit ngan ebidensya ngan diri puros yakan ngan inimbento. Buronyog namon nga kadtuon, imbestigahon ngan hibaruon an ungod nga panhitabo ngan segurado nga magawas an kamatuoran.

Kadungan hini, gin-aayat namon hira nga probaran nga diri hira an mga terorista ngan ipanhimuwa an gidadamoi na nga kaso ha pagtalapas han tawhanon nga katungod labina ha Basilan, Mindoro ngan Laguna. Gin-aayat namon hira nga atubangon an mga ebidensya ngan tagan bayad-danyos an ira mga biktima.

Kay ano nga nadiri an papet nga rehimen ngan reaksyunaryo ngan mersenaryo nga militar hini nga ipatuman an Comprehensive Agreement on Respect for Human Rights and International Humanitarian Law ngan tukuron an kasugbong hini nga Joint Monitoring Committee nga napirmahan naman kunta han duha nga prinsipal ha negosasyon pankamurayawan (GRP ngan NDFP) an amo nga kasarabutan?

Kay ano nga waray ratipikahi han papet nga gubyerno nga Arroyo an International Criminal Court (ICC) nga kaupod mismo an GRP ha pag-uundong hini hadton una ha Rome Convention. Ngan direkta nga gin-amin ngan waray kaawod nga sinering han cabinet oversights committee on national security nga nahadlok ini nga gamiton ito (ICC) nga venue han mga human rights advocates?

Hini nga adlaw, karuyag namon nga otro nga dun-an an katindog han Partido Komunista kontra ha terorismo. Bisan ano kadamo han arsenal han AFP an uboson ha ira terorista nga kampanya, diri san-o man maatras o mahadlok man la an Partido ngan rebolusyonaryo nga katawhan.

Back to top