Ang rehimen Macapagal-Arroyo ang pangunahon responsible sa makaluluoy nga dinangatan sang aton mga kasimanwa nga ginapalayas subong sa Malaysia

Gregorio "Ka Roger" Rosal
Spokesperson
Communist Party of the Philippines
Setyembre 01, 2002

Mabaskog nga ginakundenar sang Partido Komunista sang Pilipinas ang rehimen Mahatir sang Malaysia sa indi makatawo nga pagpalayas kag pagpabudlay sa ginatos ka libo nga Pilipino nga nagpaamulya kag nagpuyo sa Sabah, Malaysia. Dapat ululupod nga kundenahon sang bug-os nga pumuluyong Pilipino, pangayuon ang gilayon nga pagpauntat sini kag idemanda ang bayad-danyos para linibo-libo nga biktima sini.

Pero ang labi nga ginakundenar sang Partido Komunista sang Pilipinas amo ang gubyernong Macapagal-Arroyo kag mga nauna sini nga mga papet nga rehimen. Sila ang pangunahon nga responsible sa makaluluoy nga dinangatan sang aton mga kasimanwa nga napilitan magpaamulya kag mangabuhi sa Malaysia. Prinsipal nga kabangdanan sang pag-ebakwet nila sa Malaysia amo ang malala nga bunga sang kapabayaan sang reaksyunaryong gubyerno kag sang wala kaluoy nga mga operasyon militar sa malaut nga tuyo sang rehimen nga tapnaon kag waskon ang lehitimo nga paghimakas sang mga pumuluyong Bangsa Moro.

Bahag ang ikog sang mga nagtaliwan kag sang subong nga papet nga rehimen sa pag-atubang sa anuman nga dumuluong nga gubyerno sa pagtib-ong sang interes sang Pilipino nga naga-estar kag nagatrabaho sa iban nga pungsod. Pero sobra ang kapintas sa kaugalingon nga mga pumuluyo kon ginapahayag sini ang ila mga problema kag nagapakigbatu sa ila mga kinamatarung.

Madugay na nga nahibal-an ni Macapagal-Arroyo ang posible nga pagpalayas sa mga Pilipino nga nagapuyo kag nagatrabaho sa nagkalain-lain nga bahin sang Malaysia bangud sa krisis sa ekonomya nga ginabatas nila pareho man sa mga kalapit sini nga pungsod. Ugaling pareho man sa ginhimo nga pagpabaya sang iya rehimen sa nadangtan sang iban pa nga Pilipino nga nagatrabaho sa luwas sang dagat, nagapatumbaya lamang ini samtang masako sa iya gimik para mapilian sa 2004 kag sa malaut nga kampanya sa pagtapna sa mga kritiko kag direkta nga nagabatu sa iya rehimen.

Nagpakuno-kuno nga naghulag si Macapagal-Arroyo sining karon lang sang lumupok na sa midya ang pagmaltrato kag pagpabudlay sang mga awtoridad sang Malaysia sa mga Pilipino nga nagapuyo kag nagatrabaho didto. Kag sang mag-init ang isyu kag nagsugod na mga hulag protesta batuk sa pagpamintas sa ila sa Malaysia, daw nangin tagapakalma sa nagapanginit nga pumuluyo kag tagapangayo pasaylo pa ang hubon sang rehimen Macapagal-Arroyo sa makahason kag mapiguson nga rehimen Mahatir sang Malaysia.

Ang mga utod naton nga taga-Mindanao nga nag-ebakwet kag nag-estar sa Malaysia kag subong biktima sang daw hayup nga pagtrato didto sang rehimen Mahatir biktima sang duha ka mapiguson nga gubyerno. Katulad sang mayorya nga pumuluyong Pilipino, biktima sila sang lubos nga kapabayaan sang nagliligad nga papet nga rehimen sa Pilipinas kag sining ulihi, sang mapiguson nga diktaduryang rehimen Mahatir sang Malaysia. Subong pa lang gani ang video sang ila makaluluoy nga kahimtangan ginagamit na sang puno nga papet nga si Macapagal-Arroyo sa mga gimik sini sa pulitika sa baylo nga magpangita sang mga permanente nga solusyon.

Wala sang masaligan nga solusyon ang aton mga kasimanwa nga nagapangabudlay sa iban nga pungsod, sa kon diin man nga bahin sang kalibutan, kundi ang maghugpong sang ila kubay kag nagahiliusa nga maghulag kag iangot ang away sa rebolusyonaryong paghimakas sang iban pa nga ginahimuslan kag ginapigos nga sektor sa Pilipinas.

Back to top