Ti rehimen a Macapagal-Arroyo ti kangrunaan a responsible iti nakaam-ames a kasasaad dagiti kailian tayo a napatalaw iti Malaysia

Gregorio "Ka Roger" Rosal
Spokesperson
Communist Party of the Philippines
Setyembre 01, 2002

Nadagsen a konkondenaren ti Partido Komunista ti Pilipinas ti rehimen a Mahathir iti Malaysia iti di-makatao a panangpatalaw ken panangparigat nga ar-aramiden da iti ginasut a ribu a Pilipino a nagbakwit ken nagnaed iti Sabah, Malaysia. Rumbeng a kolektibo a kondenaren daytoy ti intero nga umili a Pilipino, dawaten ti sigida a panangpasardeng ditoy ken dawaten ti danyos-perwisyo para iti rinibribu a biktima na.

Ngem ti lallalo a konkondenaren ti Partido Komunista ti Pilipinas ket ti rehimen a Macapagal-Arroyo ken dagiti aso-aso a rehimen a sinaruno na. Isuda ti kangrunaan a responsable iti nakaam-ames a kasasaad a nakaisasgmakan dagiti kailian tayo a napuersa nga agbakwit iti luglugar da ken agnaed idiay Malaysia. Prinsipal a gapu ti panagbakwit da nga agturong iti Malaysia ket ti nakapalpalalo a panangbaybay-a ti reaksyunaryo a gubyerno ken ti awan sarday nga operasyon militar iti mauyong a panggep ti reaksyunaryo nga estado a lippiten ken gibusan ti lehitimo a pannakidangadang dagiti umili a Bangsa Moro.

Nabayagen nga ammo ni Macapagal-Arroyo a rangta a mangideport kadagiti Pilipino nga agnanaed ken agtrabtrabaho iti nadumaduma a paset ti Malaysia, gapu met laeng iti krisis iti ekonomya ti Malaysia ken dagiti kabangibang a pagilian daytoy. Ngem kas iti saan na a panangasikaso iti kasasaad dagiti dadduma pay a Pilipino nga agtrabtrabaho idiay abrod, awan ti inaramid na mainaig ditoy a kaso bayat a makumikom kadagiti gimik a mangsigurado iti eleksyon na no 2004 ken iti mauyong a kampanya ti pananglipit laban kadagiti kritiko na ken dagidiay a naparang a mangsupsupiat iti rehimen na.

Nagpakita ti sangabassit a panaggaraw ni Macapagal-Arroyo itay nabiit idi naibutaktak iti midya ti kinapalalo ken abuso dagiti otoridad iti Malaysia kadagiti Pilipino nga agnanaed ken agtrabtrabaho sadiay. Itatta a napudot ti isyu ken agsasaruno dagiti aksyon protesta laban iti kinaranggas dagiti Malaysian, ti gunglo a Macapagal-Arroyo pay ti timmakder a nangpakalma iti agpungpungtot nga umili ken nangirasrason iti naranggas ken mananglipit a rehimen a Mahathir ti Malaysia.

Dagiti kakabsat tayo a taga-Mindanao a pimmanaw ken nagnaed idiay Malaysia ken itatta ket biktima ti maka-ayup a panagtrato ti rehimen a Mahathir ket biktima ti dua a mananglipit a gubyerno. Kas ti kaaduan nga umili a Pilipino, biktima da ti sibubukel a panangbaybay-a ti napalabas nga aso-aso a rehimen iti Pilipinas ken itay naudi, ti mananglipit a diktadura a rehimen a Mahathir ti Malaysia. Itatta inkapilitan da a napasubli iti Pilipinas tapno lallalo pay a makaraman ti agtultuloy ken kumarkaro a pananglipit ken panaggundaway ditoy iti bukod da a pagilian. Imbes nga agsapul ti permanente a solusyon, ti kangrunaan nga aso-aso a Macapagal-Arroyo ket mangiparparuar kadagiti video a mangipakpakita ti nakaam-ames a sitwasyon da para iti gimik na a pampulitika.

Awan manamnama a solusyon dagiti kailian tayo nga agtrabtabaho iti sabali a pagilian iti aniaman a paset ti lubong no di agsisinninggalot iti intar da ken agkaykaysa nga agtignay ken isilpo laban da iti rebolusyonaryo a pannakidangadang ti dadduma pay a magunggundawayan ken maidaddadanes a sektor iti Pilipinas.

Back to top