Katungod sa rebolusyonaryong kalihukan nga depensahan ang kaugalingon ug ang katawhan

Gregorio "Ka Roger" Rosal
Spokesperson
Communist Party of the Philippines
Agosto 18, 2002

Unsamang aksyon nga himuon sa Bagong Hukbong Bayan ug rebolusyonaryong kalihukan batok sa imperyalismong US ug rehimeng Macapagal-Arroyo, tanan anaa sa gambalay sa pagdepensa-sa-kaugalingon ug pagpanalipud usab sa mga benepisyo nga nakab-ot na sa katawhan sa mga teritoryo sa Demokratikong Gubyerno sa Katawhan bunga sa ilang pagrebolusyon.

Lapad ang arsenal sa gubat sa katawhan sa hisgutanan sa mga armas ug pamaagi ug daghan kini�g opsyon nga mahimong kapilian oras nga adunay armadong probokasyon gikan sa imperyalismong US.

Sa pagpatuman sa unsamang partikular nga lakang sa pagdepensa sa kaugalingon ug sa katawhan, kanunay�ng himuong nag-unang kunsiderasyon ang kaluwasan ug pangkinatibuk-ang kabulahanan sa mga yanong sibilyan nga dili lambigit sa armadong panagsangka, Pilipino man o langyaw.

Sukwahi sa mga kabakakan nga gisabwag sa mga tawo nga sama kang Roilo Golez (National Security Adviser ni Macapagal-Arroyo), ang mga lumulupyo diha sa mga lugar kundiin kusog ang rebolusyonaryong kalihukan nakatagamtam og mga benepisyo sa pagrebolusyon, ilabina gikan sa rebolusyong agraryo. Gipahimuslan nila ang mga kadaugan sama sa mas ubos nga abang sa yuta, mas ubos nga interes sa pautang, mas taas nga suholan sa mga mamumuong panguma ug mas taas nga presyo sa ilang mga produkto. Sa pila ka lugar, hingpit nang nawagtang ang usura ug abang sa yuta.

Kasagaran, ang mga mamumuo sa mga minahan, laging, pangisdaan ug uban pang negosyo diha sa mga sona ug baseng gerilya, nakatagamtam usab og mga benepisyo sama sa mas taas nga suholan ug mas makatawong kahimtang sa panarbaho bunga sa mga paningkamot sa rebolusyonaryong kalihukan.

Tungod niining mga benepisyo, gimahal, gisuportahan ug gidepensahan sa katawhan ang rebolusyon ug ang Demokratikong Gubyerno sa Katawhan. Nasayod sila nga mapala ug mabungkag lamang ang mga kaayohan nga hingpit nilang hidag-an sa pagtabang sa rebolusyonaryong kalihukan kung pasagdan nila nga manghagis ang AFP ug mga tropa sa US sa ilahang mga lugar.

Usa ka kusog ug gamhanan nga kaaway ang alatubangon sa rebolusyonaryong kalihukan ug katawhan oras nga masugdan ang gubat agresyon sa US dinhi sa Pilipinas. Apan sama sa daan na namong deklarasyon, andam ang mga rebolusyonaryong pwersa nga musukol sa nagkalain-laing pamaagi. Ang panaad sa usa ka katilingban nga gawasnon sa panaugdaog ug pagpahimulos, nga inanay nang natuman diha sa mga sonang gerilya ug base sa rebolusyon, mauy naghatag kanamo og kaisog ug determinasyon nga harungon bisan ang pinakagamhanang superpower sa kalibutan ug ang mga itoy nga tropa niini.

Back to top