Bisan kanus-a man, dili mosurender ang rebolusyonaryong kalihukan kang GMA

Gregorio "Ka Roger" Rosal
Spokesperson
Communist Party of the Philippines
Agosto 17, 2002

Dako kaayo ang ilusyon ni Macapagal-Arroyo nga maparalisa ang rebolusyon sa Pilipinas pinaagi sa mga kamanduan gikan sa mga gubyerno sa US, The Netherlands ug United Kingdom nga pit-on ang pundo sa rebolusyonaryong kalihukan nga kunohay'ng naggikan sa laing nasud.

Ang Partido, Bagong Hukbong Bayan ug tibuok rebolusyonaryong kalihukan, tanan nakalahutay ug nagakalapad, nag-una, pinaagi sa pagsalig sa kaugalingon ug dili tungod sa unsamang ayuda nga naggikan sa laing nasud.

Ang nagakadaghang armas nga gikuptan sa mga manggugubat sa NPA nakab-ut pinaagi sa paglunsad og mga taktikal nga opensiba batok sa AFP ug PNP. Daghan usab sa mga armas sa NPA, kabubut-ong gisurender sa mga sundalo, pulis ug mga elemento sa CAFGU.

Labaw sa tanan, padayon nga mu-asdang ang rebolusyonaryong kalihukan tungod kay padayon niining gipakigbisugan ang kabulahanan ug gitagamtam ang mainit nga suporta sa masang gipahimuslan ug dinaugdaog.

Sa pikas bahin, labaw'ng gipasibaw sa laraw'ng pagpamig-ot ni Macapagal-Arroyo nga wala kini'y laing interes kundili pukanon ang rebolusyonaryong pakigbatok sa katawhan. Wala kini'y bisan diyut na lamang nga interes nga atubangon ug sulbaron ang kuyanap nga pagpahimulos ug panaugdaog, nga mauy gamot-hinungdan sa gera sibil sa nasud.

Nasayop ang rehimeng Macapagal-Arroyo kung nagtuo kini nga mapugos ang rebolusyonaryong kalihukan nga ipadaplin ang mga prinsipyong gipakigbisugan niini ug mosurender na lamang tungod sa nagkalain-laing pamaagi sa pagpamig-ot karon niini. Hinunua, bisan kanus-a man, dili gayud moluhud ang Partido Komunista sa Pilipinas ug tibuok rebolusyonaryong kalihukan kang Gloria Macapagal-Arroyo.

Back to top