Mando ni Colin Powell ang pagdeklara ni Macapagal-Arroyo og all-out war

Gregorio "Ka Roger" Rosal
Spokesperson
Communist Party of the Philippines
Agosto 06, 2002

Ang pagdeklarar ni Macapagal-Arroyo og all-out war batok sa rebolusyonaryong kalihukan pagsunod sa mando sa US nga gidiktar kaniya ni US State Secretary Colin Powell sa ilang panaghisgut niadtong usang adlaw. Kining deklarasyuna, hugut nga kalambigit sa katuyuan nila nga paniguruhon ang permanenteng presensya sa mga tropang Amerikano sa nasud ug kahataga'g dalan ang direktang pagpanginlabot niini sa kontra-rebolusyonaryong gubat.

Kining pagdeklara og all-out war kabahin sa usa ka tibuok nga laraw nga gidisenyo sa US nga musangput sa "paghangyo" ni Macapagal-Arroyo sa "hinabang" sa US alang sa pakigbatok sa NPA.

Us� pa ning deklarasyuna, giplano na sa itoy nga rehimen ug sa US ang musunud na nga "pagbansay-bansay militar" sa gawas na sa erya sa Abu Sayyaf ug sulud sa mga erya sa Bagong Hukbong Bayan ug mga organo sa pangpulitikang gahum sa rebolusyonaryong kalihukan.

Matapos sa kunohay'ng pagbakli sa dugukan sa bandidong grupong Abu Sayyaf, gisimang na sa rehimeng US-Macapagal-Arroyo ang atensyon niini ngadto sa Bagong Hukbong Bayan. Subay sa mga pabag-o-bag-ong mga inaregluhanay, midako og maayo ang luna alang sa direktang pagsalmut sa mga tropang US sama sa nasugdan na sa Basilan.

"Kung aduna man sila'y gipamahayag nga pulitika, basta terorista sila, gerahon nato kana," mao ang direktang gibungat sa pangulong itoy nga si Arroyo nga pilit nga nagpakabut� sa kalainan sa rebolusyonaryong hukbo sa katawhan ug sa mga bandido ug sindikatong kriminal. Gipasumbingay usab sa pangulong itoy nga si GMA nga langkub sa iyang all-out war bisan ang mga ligal ug demokratikong kalihukang masa. Sumala pa sa pangulong papet, "Maglunsad kita og pakiggubat batok sa mga kriminal, mga terorista, mga drug addict, mga kidnaper, mga ismagler ug mga nanghasi/nanamok-samok diha sa mga pabrika nga naghatag og trabaho."

Wala na kami makugang niining deklarasyuna ni Macapagal-Arroyo og all-out war. Sa kamatuoran, pipila ka bulan nang pintas nga mikuso-kuso sa mga sonang gerilya ang larga-tudung kontra-rebolusyonaryong gubat sa AFP.###

Sa mismo niyang paglingkud niadtong Enero 2001, sekreto nang gimando ni Macapagal-Arroyo ang makaylapong pagpangataki sa teroristang AFP ug PNP diha sa mga natarang gerilya bisan pa nga gideklara niyang ipadayon sa iyang gubyerno ang hisgutanang kalinaw tali niini ug sa NDFP. Wala magdugay, gibasura ra usab ni Macapagal-Arroyo ang hisgutanang kalinaw.

Sukad niadtong ikatulo nga kwarter sa 2001, linibo-libo nang tropa sa AFP ang gideploy sa rehimeng Macapagal-Arroyo batok sa rebolusyonaryong kalihukan. Nag-ubay sa pagpanggun-ub sa AFP diha sa katawhan sa Basilan, Sulu ug Zamboanga, makaylapong pagpanggun-ub usab ang gipahamtang sa mga pasistang tropa sa gatusan ka libong katawhan sa Southern Tagalog (partikular sa Laguna ug Oriental Mindoro), sa Cagayan Valley (ilabina sa Isabela), sa Central Luzon (ilabina sa Tarlac ug Pampanga), sa Central Visayas (ilabina sa Bohol) ug uban pang lugar kundiin kusog ug kaylap ang rebolusyonaryong kalihukan.

Sa Southern Tagalog pa lamang, gatusan na nga mga yanong sibilyan ang biktima sa walay pugong-pugong nga pagpamatay, pagpangmasaker, dinaghang pagpangaresto ug pagpamilanggo, nga ang kanunay'ng katarungan sa mersenaryo ug teroristang militar ni Gloria, mga NPA o kaha tigsuportar sa NPA ang makalolooy nga mga biktima. Kadaghanan sa mga gipamatay nga sibilyan mga aktibista ug maslider sa mga organisasyong masa nga aktibo sa pakigbatok alang sa kabulahanan ug katungud sa ilahang gikalangkubang mga sektor.

Ang rebolusyonaryong kalihukan kanunay'ng andam sa all-out war sa kinsamang pangulong tawo-tawo sa itoy nga republika. Bisan kanus-a man, wala niini kahadluki ang unsamang hulga sa binangis nga pagpangataki sa mga mersenaryong tropa sa itoy nga republika ug bisan ang presensya ug bahad nga agresyon sa mga tropang Amerikano.

Isip tubag sa deklarasyon sa all-out war, dugang pasubsubon sa rebolusyonaryong kalihukan ang armadong pakigbisog ug ilunsad ang mga taktikal nga opensiba sa pinakahuyang nga bahin sa kaaway.

Andam ang Partido nga pangulohan ang usa ka patriyotikong gubat oras nga direktang nanginlabot ang mga tropang Amerikano, lakip ang pagsulud sa mga teritoryo sa Rebolusyonaryong Gubyerno sa Katawhan.

Ang nangagi ug nagsunod-sunod nga itoy nga mga rehimeng Marcos, Aquino, Ramos ug Estrada tanan nagsulay nga gub-on, dugmukon ug puuhon ang rebolusyonaryong kalihukan. Apan silang tanan hingpit nga napakyas. Gisiguro sa mga rebolusyonaryo ug komunistang Pilipino nga mapakyas usab ang itoy nga rehimeng Macapagal-Arroyo sa mersenaryong katuyuan niini nga buntugon ang rebolusyonaryo ug patriyotikong pakigbisog sa katawhang Pilipino.

Back to top