Bakakon si Maj. Noel Buan

Gregorio "Ka Roger" Rosal
Spokesperson
Communist Party of the Philippines
Abril 08, 2002

Napuno sa mga paghibat ug kabakakan ang mga pamahayag ni Maj. Noel Buan nga gimantala sa Philippine Daily Inquirer niining Abril 6, 2002. Kabahin kini sa malisyoso kaayong kampanya sa pagyatak sa integridad sa Bagong Hukbong Bayan ug rebolusyonaryong kalihukan.

Gipaabut pa namo nga mas mukitiw-kitiw pa ang dila ni Major Buan sa mga muabut nga panahon karon nga gi-asayn na siya isip hepe sa Special Affairs Group, ang yunit pangsaywar sa Philippine Army nga nag-ispisyalisa sa paggama-gama og mga sugilanon ug intriga batok sa rebolusyonaryong kalihukan.

Aron ipakita nga katuohan ang mga gipanulti ni Major Buan, gihulagway niya ang kaugalingon isip maayong-laki nga ispiya, nga layo kaayo sa kamatuuran. Sa operasyong paglit-ag nga gidisenyo sa BHB aron dakpon si Major Buan, gisugid kaniya nga gustong makig-istorya ni Kaubang Tirso �Ka Bart� Alcantara para aregluhon ang iyang pagsurender. Dali ra usab kini nga gituohan ni Major Buan busa misugut siya nga musulud sa sonang gerilya nga nagresulta sa sayon nga pagdakup kaniya sa BHB niadtong Hulyo 7, 1999.

Nanghambog si Buan nga �hatagi ako og usa ka bulan kuyug ang usa ka rebelde ug muuli siya ini�g kahuman�. Bisan gani sulud sa duha ka tuig wala niya makumbinsing musurender ang custodial force sa BHB nga nag-atiman kaniya. Ni wala gani siya makig-istorya og maayo sa panahon nga siya dinakpan-sa-gubat sa BHB. Kanunay nagpasuuk ug kung istoryahon, pilosopo ug binagis siyang mutubag.

Dili usab tinuud nga gisulayan niya akong kumbinsihon nga musurender dihang nakaangkon kami og higayon nga nag-atubangay us� siya palayaa. Ni wala gani ako tinguhaang istoryahi.

Kung dako kaayong kabakakan ang gimugna-mugna ni Buan mahitungud sa kaugalingon, labaw nang dako ang gipanugilon niyang kabakakan batok sa rebolusyonaryong kalihukan.

Malagmit, wala pa madawat ni Buan nga nailad siya sa tawong giplano niyang lansison ug pasurenderon. Busa, pilit niyang intrigahon si Ka Bart ug pilit usab siyang nagmugna-mugna og panagbingkil tali sa mga manggugubat ug lider sa BHB ug Partido.

Sa malisyoso kaayong pamaagi, gipasumbingay ni Buan nga adunay kalambigitan si Ka Bart sa kamatayon ni Kaubang Armando Teng niadtong Nobyembre 7, 2000. Namatay si Kaubang Teng dihang mipalyar na ang iyang rinyon human sa daghang katuigang gibati niya kini. Apan subay sa sugilanong gimugna-mugna ni Major Buan, gihiluan si Kaubang Teng. Giintrigahan niya si Ka Bart nga gusto kuno niining ilugon ang katungdanan ni Kaubang Teng isip kalihim sa Pangrehiyong Komite sa Partido sa Habagatang Katagalugan.

Tinguha nga patuohon ni Buan ang publiko nga ang mga kadre ug membro sa rebolusyonaryong kalihukan mauy walay kalainan sa mga reaksyunaryong upisyal-militar ug -sibilyan nga nag-intrigahay, nagmaniubrahay, napinatyanay ug naghimo og lain-laing krimen para angkunon ang mga pribilehiyong anaa sa pusisyon.

Naggama-gama usab siya og isyu sama sa wala kunoy pag-angay-angay sa mga pagrasyon sa sigarilyo aron sap-ungan ang kamatuuran nga adunay hugut nga panaghiusa ang tanang rebolusyonaryong pwersa sa mga palisiya ug programa sa Partido. Gipamugus niyang ihulagway nga nagtunhay usab sulud sa rebolusyonaryong kalihukan ang kaylap nga walay pagkaangay-angay tali sa mga mapahimuslanong hut-ong ug naghagong masa; o tali sa dako kaayong kinawat nga bahandi sa dagkong burukrata ug upisyal militar nga matinud-anon niyang gialagaran, ug sa pudyut nga suholan ug kita sa mga mamumuo ug mag-uumang gitamay niya.

Ang hinali nga pagpamahayag karon ni Major Buan mauy kabahin sa gipasubsub nga kampanya sa pagpangdaut sa Partido, BHB ug rebolusyonaryong kalihukan nga gikumpasan karon sa US. Ang Special Affairs Group sa Philippine Army direktang nakigkoordina ug gidireksyunan sa mga opereytor sa Central Intelligence Agency (CIA). Gikinahanglang mapahimangnuan ang katawhan bahin sa nagkalain-lain pang hilo nga ihuy-ad ni Major Buan.

Back to top