Agpegpeggad ti tungtongan iti kappia
Gregorio "Ka Roger" Rosal
Spokesperson
Communist Party of the Philippines
Pebrero 11, 2002 Kasupadi iti ibagbaga ni Silvestre Bello, hepe a negosyador ti GRP peace panel, saan laeng a mataktaktak ti tungtongan iti kappia iti baet ti NDFP ken GRP. Ti agpayso, agpeggad nga agleppas daytoy iti sango ti sipaparang a panangiluges ti rehimen a Macapagal-Arroyo iti nailian a soberanya kagiddan ti panangwaknit ti dalan iti armado a pannakibiang dagiti tropa nga Amerikano iti Pilipinas.
Ti panagrespeto iti nailian a soberanya ket maysa kadagiti batayan a prinsipyo a pareho a pinagkaysaan ti NDFP ken GRP iti pinirmaan da a The Hague Joint Declaration of 1992 nga agserserbi a balangkas ti tungtongan iti kappia ti NDFP-GRP.
No saan a nakasagana ti GRP nga itandudo ti batayan a prinsipyo ti nailian a soberanya, sigurado a saan met a nakasagana a sumango daytoy iti seryoso a tungtongan kanaig dagiti batayan nga usapin a pampulitika, pang-ekonomya at panggimong.
Gapu ta sipaparang ti panangiluges ti rehimen a Macapagal-Arroyo iti nailian a soberanya, seryoso nga ikunkunsidera ti Nasyunal a Konseho ti NDFP no importante pay nga ituloy ti pannakitungtong iti rehimen.
Kadagidi napalabas a bulan, awan ti impakita nga interes ni Macapagal-Arroyo ken ti gubyerno na nga iyabante ti tungtongan iti kappia ken usaren a wagas tapno masango ken marisut dagiti batayan nga usapin ken nagun-od ti nainkalintegan ken pangmabayagan a kappia. Iti bangir na, nangaramid pay ti rehimen ti nagsasaruno nga addang tapno lappedan ti panagtuloy ti tungtongan iti kappia:
1. arbitraryo a panagsuspindi ti tungtongan idi Agosto 2001 kalpasan ti nainkalintegan a panangipataw ti NPA ti rebolusyonaryo a pannusa kenni Col. Rodolfo Aguinaldo, maysa a notoryus a pasista;
2. arbitraryo a panagsuspindi manen ti naikeddeng a pormal a panaglukat manen ti tungtongan idiay Norway idi Dis. 10-14 ken kalpasan na idi manen Enero 7;
3. panaglimita laengen ti tungtongan iti kappia iti back channel talks tapno mailemmeng daytoy, maikkatan ti pormalidad ken makapon;
4. panangipilit a baliwan ti sumagmamano nga importante a nagkaysaan iti The Hague Joint Declaration of 1992, kas ti addang-addang ken masinop a proseso ti panagtalakay ken panagresolba kadagiti batayan nga usapin.
Iti sango dagitoy, mapumpunuanen ti panaganus ti NDFP a saan pay a leppasen ti tungtongan iti kappia. Kadagiti napalabas a bulan, sumagmamano a daras a pinalubosan ti NDFP dagiti dawat ti GRP iti nadumaduma a kundisyon ti GRP iti panggep nga agtuloy latta ti tungtongan.
Iti laksid amin dagitoy, awan ti impakita ti GRP nga addang tapno remedyuan ti panangdangran daytoy iti tungtongan. Imbes, nangaramid pay daytoy ti dakdakkel a lapped iti panangituloy ti tungtongan babaen ti panangsuporta iti armado a pannakibiang ti US iti pagilian.
Back to top
| 