Nganong nagdumili ang GRP nga magdeklarar ug SOMO sa lima ka prubinsya sa Mindanao alang sa pagpalaya sa mga POW?

Gregorio "Ka Roger" Rosal
Spokesperson
Communist Party of the Philippines
Pebrero 10, 2002

Gidiklarar niining Pebrero 8 ni Gen.Eduardo Ermita, tigpanambag ni Macapagal-Arroyo sa hisgutanang kalinaw, nga dili ipatuman sa GRP ang suspension sa mga operasyong militar sa lima ka prubinsya sa Mindanao alang sa pagpalaya sa Bagong Hukbong Bayan sa gihuptan nilang mga dinakpan sa gubat.

Ang pagbalibad niini mauy nagbabag sa husay nga pagpalaya sa mga dinakpan sa gubat nga anaa sa pag-atiman sa Valentin Palamine Command sa BHB sa Halayong Habagatang Mindanao (Far South Mindanao) lakip si Sergeant Jeremias Rosete ug tulo pa ka ispiya sa AFP.

Sukad pa sa nangagi, dili mabuhiang rekisitos sa pagpalaya sa mga dinakpan sa gubat sa BHB ang pagsiguro usa nga nagpatuman ang GRP ug SOMO sa mga lugar nga langkuban sa pagpalaya. Aron malikayan niini nga magka-ingkwentro ang BHB ug AFP/PNP nga tuyong nagbutang sa peligro sa kinabuhi sa mga dinakpan, tigpangatiman nga yunit sa BHB, mga dili armadong pwersa nga adunay kalambigitan sa pagpalaya ug uban pa.

Pangutana ni Ermita ngano ang SOMO mauy kinahanglan nga ipatuman sa linangkuban nga susama kalapad sa lima ka Prubinsya. Kinahanglan kini aron kalikayan ang mga posibling trinaydor nga operasyon sa AFP/PNP sa mga agianan ug lugar nga palayaan samga dinakpan sa gubat ug aron malikayan nga mainitan sa AFP/PNP ang usa ka piit nga lugar nga sa ilang pagtan-aw gikatanggungan sa mga dinakpan sa gubat. Pait uyamut ang nakat-unan sa BHB kalambigit sa pagpalaya kang Philippine Army Major Noel Buan, tungud kay sukad pa palayaa siya sa oriental Mindoro niadtong Abril 2001, lanat ug walay puas nga gidabudabuhan ang Prubinsya sa dinagko ug mabangis nga operasyong militar sa AFP.

Tinguha usab ni Ermita nga yano na lamang buhian ug papauliun sa BHB ang mga dinakpan sa gubat.Dili kini mahimo, tungud kay kini nagpabiling anaa sa responsibilidad sa BHB taman nga walay pormal nga proseso sa turn over sa GRP nga opisyal usab nga paga-saksihan sa Internationl Committee of the Red Cross, mga pamilya sa mga dinakpan, mga doctor ug uban pang panginahanglan nga makapaniguro nga ang mga dinakpan buhi ug maayo nga gitratar ug makita ang aktwal nga pagpalaya sa BHB sa mga dinakpan.

Apan aduna pay laing pinusong nga katuyuan ang GRP sa pagbalibad sa pagpatuman sa SOMO alang sa pagpalaya sa mga dinakpan sa gubat: Gigamit kini karon sa GRP aron ipasundayag nga itum ang puti ug palabnawon ang mga isyu. Sumala kang Silvestre Bello III, nangulong negosyador sa GRP Peace Panel, busa nalangan ang subling pagpadayon sa hisgutanang kalinaw tungud kay �napakyas ang BHB nga palayaun ang mga dinakpan sa gubat niini.�

Gihibat ug gilintuwad niini ang kamatuuran: ang NDFP mauy walay puas nga nagpursigi nga mapadayon ang hisgutanang kalinaw. Sa pikas bahin,ang rehimeng Macapagal Arroyo mao s�ya ang nagbabag niini. Niining mga nangaging bulan,nasukad sa unsa na lamang dili tul-id nga pagpangatarungan, inutro-utrung gisuspendi sa rehimen ug gisanta ang mga natakdang na nga pagpadayon sa hisgutanang kalinaw.

Tuyong gibalibaran sa GRP ang pagpatuman sa SOMO sa mga lugar sa Mindanao nga nalangkub sa pagpalaya sa mga dinakpan sa gubat aron kababagan ang husay nga pagpalaya nila ug sa ingun,magamit kini isip dugang nga pangatarungan sa padayon nga pagbalibad nga mapadayon na ang hisgutanang kalinaw,ug aron mahatagan ug prayuridad ug mabuylo ang paglungsad karon ug dinagko ug subsub nga operasyong militar sa AFP didto.

Back to top