Apay a saan a kayat ti GRP nga agideklara ti SOMO iti lima a probinsya idiay Mindanao tapno mawayawayaan dagiti POW?

Gregorio "Ka Roger" Rosal
Spokesperson
Communist Party of the Philippines
Pebrero 10, 2002

Indeklara itay Pebrero 8 ni Gen. Eduardo Ermita, adbayser ni Macapagal-Arroyo iti tungtongan iti kappia, a saan nga ipatungpal ti GRP ti suspensyon dagiti operasyon militar iti lima a probinsya idiay Mindanao para iti panangwayawaya ti Baro a Buyot ti Umili iti iggem daytoy a balud ti gubat (POW). Daytoy a panagkedked ket manglaplapped iti nasayud a wagas ti panangwayawaya kadagiti balud ti gubat nga adda iti panangaywan ti Valentin Palamine Command ti NPA iti Far South Mindanao, maibilang ni Sergeant Jeremias Rosete ken tallo pay nga espiya ti AFP.

Manipud pay idi napalabas, saan nga ib-ibbatan a rekisito iti panangwayawaya iti POW ti NPA ti panangisigurado nga umuna a maipatungpal ti GRP ti SOMO kadagiti lugar a saklawen ti panangwayawaya. Daytoy ket tapno liklikan nga agka-engkwentro ti NPA ken AFP/PNP a sigurado a mangikabil iti peggad ti biag dagiti POW, custodial unit ti NPA, dagiti di-armado a puersa nga adda pakainaigan da iti panangwayawaya ken dadduma pay.

Sinaludsod ni Ermita no apay a ti SOMO ket kasapulan nga ipatungpal iti saklaw a kalawa ti lima a probinsya. Kasapulan daytoy tapno maliklikan ti posible a patraydor nga operasyon ti AFP/PNP kadagiti dalanan ken lugar a pangwayawayaan kadagiti POW ken tapno maliklikan a pagpupudutan ti AFP/PNP ti maysa nga akikid a lugar nga iti suspetsa da ket pagibalbaludan kadagiti POW. Napait ti adal a nasursuro ti NPA mainaig iti panangwayawaya kenni Philippine Army Major Noel Buan, gapu ta manipud idi nawayawayaan isuna idiay Oriental Mindoro idi Abril 2001, nabayag ken awan sarday a bugbugbogen ti dadakkel ken narurungsot nga operasyon militar ti AFP ti probinsya.

Kayat met ni Ermita a basta laengen wayawayaan ken paawiden ti NPA dagiti POW. Saan a posible daytoy, gapu ta dagitoy ket agtalinaed nga adda iti responsibilidad ti NPA agingga nga awan ti pormal a proseso ti turn-over iti GRP nga opisyal met a saksaksian ti International Committee of the Red Cross, dagiti pamilya dagiti POW, dagiti doktor ken dadduma pay a kasapulan a mangsigurado a dagiti POW ket sibibiag ken nasayaat a trinato ken makita ti aktwal a panangwayawaya ti NPA kadagiti POW.

Ngem adda dadduma pay a switik a panggep ti GRP iti panagmadi a mangipatungpal ti SOMO para iti panangwayawaya dagiti POW: Us-usaren daytoy itatta ti GRP tapno paruaren a nangisit ti puraw ken palibegen dagiti isyu. Segun kenni Silvestre Bello III, hepe a negosyador ti GRP peace panel, isu a mataktaktak ti panagtuloy manen ti tungtongan iti kappia ket gapu ta �mapapaay ti NPA a wayawayaan dagiti POW daytoy�.

Balbaluktoten ken balbaliktaden daytoy ti kinapudno: Ti NDFP ket isu ti sibubukel nga agpurpursige a maituloy ti tungtongan iti kappia. Iti bangir na, ti rehimen a Macapagal-Arroyo isu ti manglaplapped ditoy. Itay napalabas a bulbulan, batay iti ania la ditan a di-nainkalintegan a panagrasrason, paulit-ulit a sinuspindi ti rehimen ken pinasardeng na ti naikeddeng a panagtuloy ti tungtongan iti kappia.

Naigagara a nagmadi ti GRP iti panangipatungpal ti SOMO kadagiti lugar iti Mindanao a masaklaw ti panangwayawaya kadagiti POW tapno lappedan ti nasayud a pannakawayawaya da, ken iti kasta, mausar daytoy kas nayon a rason iti panagkedked da a maituloy ti tungtongan iti kappia, ken tapno ikkan ti prayoridad ken bwelo ti panangisayangkat iti agdama ti dakkel ken narungsot nga operasyon militar ti AFP idiay.

Back to top