HINGPIT NGA GIPASIUGDA SA PARTIDO UG MGA MANGGUGUBAT SA BHB ANG HUNONG-BUTO KARONG KAPASKUHAN

Gregorio "Ka Roger" Rosal
Spokesperson
Communist Party of the Philippines
Disyembre 18, 2001

Pagpangintriga lamang ug walay sukaranan ang pahayag ni Gen. Eduardo Ermita nga wala mahibaw-i sa negotiating panel sa NDFP ang kahimtang sa mga rebolusyonaryong pwersa sa batakang ang-ang o kaha wala magkahiusa ang NDF sa hisgutanang pagpadayon sa negosasyong kalinaw sa GRP. Gidaut lamang niini ang pagpaningkamut sa nagkalain-laing mga pwersa nga mugnaon ang maayong klima alang sa hisgutanang kalinaw.

Ang kamanduan alang sa hunong-buto nagsugud sa Disyembre 15, 2002 taman sa Enero 6, 2002 mauy gipagula sa NDFP sa ngalan sa Partido ug BHB. Ang Komite Sentral ug Komisyong Militar sa Partido mao ang nag-isyu og samang kamanduan diha sa mga manggugubat sa BHB.

Nahasubay niining kamanduan, dili mulungsad og mga taktikal nga opensiba ang BHB sa muabutay'ng Disyembre 26, 2001, ang ika-33 nga kasumaran sa subling pagtukud sa Partido Komunista sa Pilipinas. Sukwahi kini sa siwitsiwit ni Ermita ug sa AFP. Inay, dumdumon kini sa mga komunista ug rebolusyonaryong Pilipino sa kabukiran ug kasyudaran pinaagi sa mga pasundayag, tigum ug mga pagtuon.

Ingon pa man, nagpabiling nakaalerto ang tanang yunit sa BHB nga panalipdan ang kaugalingon sa panahon sa pinusong nga pagpangataki sa AFP.

Gipasidan-an namo ang mga pwersa sa AFP nga mulungsad og mga operasyon sa ngalan sa "pagpatrulya" nga ayaw gyud pagsulud sa mga teritoryo sa BHB. Ang ingon niining mga operasyon, mauy nagsugba sa kapiligruhan sa hunong-buto.###

Back to top