Disyembre 15 hangtud sa Enero 6 ang tin-aw nga epektibidad sa hunong-buto nga gipatuman sa Bagong Hukbong Bayan

Gregorio "Ka Roger" Rosal
Spokesperson
Communist Party of the Philippines
Disyembre 13, 2001

Sa pagdeklarar sa rehimeng Macapagal-Arroyo sa hunong-buto nga hangtud Enero 6 lamang, ang mamahimong tin-aw nga epektibidad sa naunang deklarasyon sa Partido Komunista ug sa NDFP sa hunong-buto mauy magsugud gikan sa tunga-tunga sa gabii sa Disyembre 15 hangtud sa tunga-tunga sa gabii sa Enero 6 usab lamang. Ang pagpatuman sa Bagong Hukbong Bayan sa hunong-buto niining Kapaskuhan, mauy nakakundisyon sa dungan nga pagpatuman usab niini sa mga armadong pwersa sa panggamhanan. Taliwala sa nagpabiling masubsubong konsentrasyon sa AFP, PNP, CAFGU ug uban pang armadong pwersa sa gubyerno diha sa mga rebolusyonaryong base sa BHB, dili mamahimong magpatuman sa hunong-buto ang BHB kung dili usab mudungan nga nagpatuman niini ang naingong mga pwersa sa gubyerno. Labing maayo nga gawas sa pagdeklarar sa hunong-buto, iatras usab sa gubyerno ang sulabing konsentrasyon sa mga armadong pwersa niini.

Gihangyo usab namo nga hinanaling himuon sa rehimeng Macapagal-Arroyo ang angayan nga mga lakang alang sa dugay nang nalangan nga pagtukud sa Joint Monitoring Committee sa pagpatuman sa Comprehensive Agreement on Respect for Human Rights and International Humanitarian Law (CARHRIHL). Dugay nang naandam ang mga rekisito sa Partido, NDFP ug BHB ug ang gihulat na lamang mao ang kabahin sa gubyerno. Dako ang panginahanglan alang niini, ilabina nga niining unang tuig sa rehimen, dugang misubsub ug mikuyanap ang paglapas sa tawhanong katungud sa katawhan sa kamut sa mga armadong pwersa sa gubyerno.###

Back to top