Disyembre 15 inggana Enero 6 ti nalawag nga epektibidad ti tigil-putukan nga ipatungpal ti Baro a Buyot ti Umili

Gregorio "Ka Roger" Rosal
Spokesperson
Communist Party of the Philippines
Disyembre 13, 2001

Iti panangideklara ti rehimen a Macapagal-Arroyo ti tigil-putukan inggana Enero 6 laeng, ti agbalin a nalawag nga epektibidad ti immuna a deklarasyon ti Partido Komunista ken ti NDFP iti sispayr ket manipud tengnga ti rabii ti Disyembre 15 inggana iti tengnga ti rabii ti Enero 6 met laeng.

Ti panangipatungpal ti Baro a Buyot ti Umili ti tigil-putukan ita a Paskua ket nakakundisyon iti aggiddan a panangipatungpal met dagiti armado a puersa ti gubyerno ditoy. Iti sango ti agtaltalinaed a dakkel a konsentrasyon ti AFP, PNP, CAFGU ken dadduma pay nga armado a puersa ti gubyerno kadagiti rebolusyonaryo a base ti NPA, saan a mabalin a mangipatungpal ti naudi ti tigil-putukan a saan a makigiddan ti nasao a puersa ti gubyerno. Kasasayaatan a malaksid iti panangideklara ti sispayr, iyatras met ti gubyerno ti napalalo a konsentrasyon dagiti armado a puersa na.

Dawdawaten mi met a sigida nga iyaramid ti rehimen a Macapagal-Arroyo dagiti rumbeng nga addang para iti nabayagen a nataktak a pannakabukel ti Joint Monitoring Committee para iti panangipatungpal ti Comprehensive Agreement on Respect for Human Rights and International Humanitarian Law (CARHRIHL). Nabayagen a nakasagana ken nakaplastar dagiti rekisito iti benneg ti Partido, NDFP ken NPA, ti ur-urayen laengen ket ti aramiden ti gubyerno. Dakkel ti pakasapulan ditoy, aglalo ta iti umuna a tawen ti rehimen ket napalalo a naranggas ken nasaknap ti pananglabsing iti kalintegan ti umili iti ima dagiti armado a puersa ti gubyerno.###

Back to top