Nasayaat a damag ti deklarasyon ti tigil-putukan ti rehimen a Macapagal-Arroyo iti Paskua

Gregorio "Ka Roger" Rosal
Spokesperson
Communist Party of the Philippines
Disyembre 10, 2001

Kablaawan mi ti deklarasyon ti tigil-putukan ti rehimen a Macapagal- Arroyo a maipatungpal manipud ita nga aldaw inggana Enero 6, 2002 kas sungbat iti sispayr nga indeklara ti Partido Komunista ken ti NDFP manipud tengnga ti rabii ti Disyembre 15 inggana tengnga ti rabii ti Enero 15. Agipekto ti deklarasyon ti tigil-putukan ti PKP ken NDFP apaman a maawat ti NDFP negotiating panel ti kopya ti upisyal nga order manipud kenni Macapagal-Arroyo para iti tigil-putukan ti gubyerno.

Ti aggiddan a deklarasyon ti sispayr ket nasayaat a gandat gapu iti sumaganad a rason:

Maikkan ti talna dagiti umili kadagiti lugar a baybaywen ti nakaro a militarisasyon ken abuso ti AFP. Manipud Hunyo 2001, linak-am dagiti umili ti rungsot ti nakapalpalalo a ranggas ti AFP aglalo iti kaaw-awayan ti Mindoro ken dadduma pay a lugar a nakaipakatan dagiti operasyon ti opensiba militar.

Mangited ti oportunidad tapno maidanon dagiti tulong kadagiti biktima ti napalalo a militarisasyon, a pakaibilangan ti ginasut a Mangyan a puersado a napabakwit kadagiti taeng da. Nasayaat met a gundaway ti sispayr tapno maimbestiga dagiti abuso ken maikaso dagiti nagbasol a puersa.

Mangited ti gundaway tapno mawayaan dagiti balud ti gubat (POW) dagiti NPA a da Sgt. Jeremias Rosete Jr., Pepito S. Simbulan, Wilfredo C. Maldecir and Herminia E. Sorongon. Iti agdama ket iggem ida ti Valentin Palemine Command ti NPA idiay Far South Mindanao Region. Awagan mi dagiti maseknan a partido a sigida nga umugnay iti NDFP negotiating panel tapno maiproseso ti nadaras ken naurnos a pannakawayawaya dagitoy. Namnamaen mi a subalitan met ti gubyerno daytoy a nasayaat nga addang babaen ti panangwayawaya kadagiti balud pulitikal.

Mangited ti gundaway tapno mabukel ti Joint Monitoring Committee a madutukan nga agmonitor ti implementasyon ti Comprehensive Agreement on Respect for Human Rights and International Humanitarian Law (CARHRIHL).

Namnamaen mi a dagitoy a nailanad ti mangpartuat ti nasayaat a klima para iti panangituloy ken panangpapardas ti proseso ti kappia, a nagsardeng gapu iti irasyunal a prekundisyon ti rehimen a Macapagal- Arroyo nga isardeng ti NPA dagiti implementasyon ti nainkalintegan a desisyon ti hukumang bayan babaen ti rebolusyonaryo a gubyerno. Mainaig ditoy, napintas a damag ti pablaak ti NDFP ken GRP panels nga aglukat manen ti tungtongan iti kappia intono Enero 7, 2002.

Iti unos ti tigil-putukan, suspendien ti buyot ti umili dagiti opensiba nga operasyon laban iti AFP, PNP ken puersa a para-militar tapno siwawaya a makipag-Paskua dagitoy a puersa kadagiti kakabagian da. Ngem dagiti yunit ti NPA ket agtalinaed iti depensiba a pusisyon ken agbantay kadagiti aksyon ken panagtraydor ti reaksyunaryo nga armado a puersa, nga isu�t masansan a kapadasan ti NPA iti napalabas.###

Back to top