Mainaig iti pannakaibilang ti NPA iti listaan dagiti �terorista� ti US

Gregorio "Ka Roger" Rosal
Spokesperson
Communist Party of the Philippines
Disyembre 09, 2001

Ti Partido, ti NDFP ken ti Baro a Buyot ti Umili (NPA) ket saan a maapektaran ti aniaman a panangbirngas ti imperyalismo nga US. Ti agpayso, nabayagen nga ibilbilang ti imperyalismo nga US ken ti aso-aso a gubyerno a terorista kami. Saan kami a dumawdawat wenno aggangandat -- ken mas agsuspetsa kami pay -- iti aniaman a pammadayaw wenno panaggusto manipud iti imperyalismo nga US. No ar-arigen, ti sobra a guraen ti imperyalismo nga US ket kaipapanan na nga husto ti ar-aramiden mi. Kaipapanan met daytoy a pagbutbutngan na kami ti imperyalismo nga US ken inikkan nan ti espesyal nga atensyon ti pumigpigsa a rebolusyonaryo a tignayan nga idadauluan ti Partido ken ti napardas a panagadu ken panagsasaruno dagiti naimballigian a taktikal nga opensiba ti Baro a Buyot ti Umili, isu a pormal nga innayon nan ti NPA iti baro nga US Patriot Act Terrorism Exclusion List.

Uray no kasta, nalawag nga ipaganetget mi a ti NPA ket saan a terorista nga organisasyon. Daytoy ket maysa a rebolusyonaryo a buyot nga absoluto nga idadauluan ti Partido Komunista ken makidangdangadang para iti wayawaya ti umili a Pilipino manipud iti pannakabaud ken pananggundaway ti imperyalismo nga US ken dagiti lokal nga alipures na. Ti pudno, ti numero uno a terorista iti lubong ket ti imperyalismo nga US. Addaan koneksyon ken mangar-aramat ti imperyalismo nga US iti ginasut a terorista nga organisasyon iti intero a lubong.

Nadagsen a supsupiaten mi dagiti malisyoso nga implikasyon ken dakes nga intensyon ti pannakaibilang ti Baro a Buyot ti Umili iti listaan. Indikasyon daytoy ti awanan bain nga interbensyon ti imperyalismo nga US iti internal nga usapin ti pagilian ken ti panangpadas daytoy nga isabotahe ti panagtaray ti tungtongan iti kappia iti baet ti NDFP ken GRP. Gandat nga usaren daytoy ti US tapno lallalo nga ikalintegan ti iskema na nga iturong ti �gerra laban iti terorismo� kontra iti NPA ken iti rebolusyonaryo a tignayan nga idadauluan ti Partido, rendaan ti pannakisango ti aso-aso a rehimen ken mangilatag ti dadduma pay a lapped iti proseso a pangkappia. Ti panagpatangken ti US a lappedan ti panangwayawaya kadagiti balud pulitikal, aglalo da Donato Continente ken Juanito Itaas, ket maysa kadagitoy a signipikante a lapped.

Ti pannakairaman daytoy nga usapin kas paset ti adyenda da George W. Bush (presidente ti US) ken Gloria Macapagal-Arroyo idi bimmisita ti naudi itay kallabes idiay US ket mangipakpakitan iti interbensyon ti US ken iti iyaannugot ditoy ti aso-aso a presidente.

Bayat a daytoy ket saan a manglapped iti agtultuloy a panangipursigi mi iti proseso ti kappia, aniaman nga ibunga wenno agbalin nga implikasyon nga iyulog daytoy nga iyaannamong na ket bukod a sungsungbatan ti rehimen. Nayon pay, masapul a tallikudan ni Macapagal-Arroyo ti panangikeddeng ti imperyalista nga amo na no ania nga organisasyon ti maibilang kadagiti �terorista� ken supiaten ti pannakailista ti NPA, no kayat na a makitungtong para iti kappia iti rebolusyonaryo a tignayan.###

Back to top