Panawagan iti rehimen a Macapagal-Arroyo nga isardeng dagiti opensiba militar ti gubyerno ken makigiddan ti panangideklara ti tigil-putukan ti dua a benneg iti Paskua

Gregorio "Ka Roger" Rosal
Spokesperson
Communist Party of the Philippines
Disyembre 08, 2001

Nasayaat a banag ti panangawat ni Gloria Macapagal-Arroyo iti karit ti NDFP para iti aggiddan a deklarasyon ti tigil-putukan (ceasefire) manipud Disyembre 15 inggana Enero 15. Kasapulan a sungbatan na ngarud daytoy kadagiti aktwal nga addang.

Nasayaat daytoy para iti panangwayawaya kadagiti balud ti gubat nga iggem ti NPA ken panangwayawaya met kadagiti balud pulitikal ti gubyerno agturong iti panangpasayaat ti klima para iti panagsubli iti tungtongan iti kappia.

Ti kastoy a SOMO ket naan-anay a pagsayaatan ti umili aglalo kadagiti lugar a manipud pay idi Hunyo 2001 ket aglaklak-amen ti nakaro a militarisasyon ti rehimen a Macapagal-Arroyo.

Uray no kasta, maipatungpal man ti aggiddan a SOMO, kasapulan nga agbantay ti umili ken ti rebolusyonaryo nga armado a puersa iti kinatuso ti rehimen a Macapagal-Arroyo. Kasapulan nga agtultuloy a pagsaganaan ken sangoen ti naulpit a panagtuloy ken rangta pay a panangpairteng kadagiti atake ti rehimen.

Iti napalabas, iti laksid ti deklarasyon ti SOMO, patinayon met a lablasingen ti AFP daytoy iti panangiwayat kadagiti opensiba nga operasyon militar. Mainayon pay, itay napalabas a bulbulan, impakita ti rehimen a Macapagal-Arroyo ti militarista a patakaran ti reaksyunaryo ken aso-aso a gubyerno na iti sango ti napardas a kumarkaro a sitwasyon ken problema ti pagilian.

Sigurado a lallalo na pay a pairtengen itan ti militarismo iti sango ti panangilista ti US State Department iti rebolusyonaryo a tignayan kas �terorista� ken ti sigurado a kagiddanna a nayon a tulong militar manipud iti US.

Agrimrimbaw itatta ti militarista a gunglo nga idadauluan ni Angelo Reyes a responsable met laeng idi iti warmongering ti napatalaw a rehimen Estrada. Awan sardeng ti panagariwawa daytoy a gunglo para iti sumagmamano pay a ribo a nayon a tropa ken CAFGU kasta met ti nayon a badyet militar iti laksid ti higante a depisit iti badyet ken utang iti ruar ken uneg ti pagilian ken agtultuloy a panangkissay ti datin a kurang a gastos kadagiti serbisyo a panggimong.

Manipud idi Setyembre 11, lallalo pay a nagrimbaw ti patakaran a militarista iti gubyerno. Nalawag a ti anti-terorista a panangraut ti US ket ibilbilang ti aso-aso a rehimen a naimbalitukan nga oportunidad tapno idiaya ti daga, tropa ken serbisyo ti Pilipinas iti agresyon nga imperyalista kasukat ti dakdakkel nga ayuda militar ken pinansyal ken dadduma pay a pabor iti negosyo ken linnakuan. Sibubukel a kinaaso-aso iti patakaran a pangruar ken militarismo iti uneg ti pagilian ti pagsangsanggiran ti reaksyunaryo ken aso-aso a rehimen iti kasasaad a baybayoen ti nakaro unay a krisis ti pagilian ken intero a lubong.

Iti kinalawa, kinakaro ken brutalidad ti panangraut iti aw-away ti katugtugaw pay laeng a rehimen Arroyo, adayo a nalaktawannan ti kinarungsot ti napatalaw a rehimen Estrada.

Kangrunaan a target ti militarisasyon ti isla ti Mindoro kalpasan a naiyaramid idiay ti balligi a panangwayawaya kenni Maj. Noel Buan idi Abril 6. Maiyar-aramid ditoy saan laeng a dagiti nalalawa, dadakkel ken agtultuloy nga operasyon a search and destroy ngem uray pay ti nasaknap a panagdukot, pammapatay ken terror kadagiti baryo a masuspetsa a sumupsuporta iti rebolusyonaryo a tignayan.

Kasapulan unay a pagsaganaan daytoy ti naulpit a panangitultuloy ken rangta ti rehimen a panangpairteng pay kadagiti atake na. Iti sango ti nakaro a panangraut nga iyar-aramid ti rehimen kadagiti larangan a gerilya ken base a masa ti NPA, saan nga umubra ti yunilateral laeng a panangideklara ken panangipatungpal ti Partido ti tigil-putukan.###