NI GLORIA MACAPAGAL-ARROYO MISMO TI UTEK KEN PASIMUNO TI NASAKNAP A TERORISMO MILITAR ITI SOUTHERN TAGALOG KEN ITI INTERO A PAGILIAN

Gregorio "Ka Roger" Rosal
Spokesperson
Communist Party of the Philippines
Disyembre 04, 2001

Nadagsen a kondenaren ti Partido Komunista ti Pilipinas ken ti intero a rebolusyonaryo a tignayan ni Gloria Macapagal-Arroyo iti panangipatungpal ken panangiwaras na ti nasaknap a terorismo militar iti Southern Tagalog ken iti intero a Pilipinas.

Ti kaudian iti serye dagiti pammapatay ti mersenaryo ken terorista nga AFP ken PNP ket ti masaker iti Casunugan San Isidro, San Jose, Antipolo City ken idiay Pantabangan, Nueva Ecija ken ti panangpatay dagiti elemento ti task Force Banahaw kenni Felipe Lapa, pangulo ti unyon dagiti mangmangged iti Milagros Farms idiay Nagcarlan, Laguna.

Ni Ka Felipe ket maysa a pursigido, napudno, ken nagaget a lider mangmangged iti Milagros Farms. Gapu iti kinaaktibo na iti unyonismo ken iti panagtulong iti dadduma pay a sektor, tinarget dagiti elemento ti narungsot a Task Force Banahaw, dagiti "taraken" daytoy nga "ex-NPA" ken dadduma pay a dakes nga elemento nga us-usaren ti TFB iti pananglipit ken pammutbuteng iti umili iti Laguna. Us-usaren met dagitoy ti nagan ti NPA iti panagkikil da. Mano a daras a pinangtaan ti TFB ti biag ni Ka Felipe. Idi Oktubre 25, nagballigi dagiti berdugo ken terorista ni Macapagal-Arroyo a putden ti biag ti maysa a pagwadan a lider-mangmangged ken pudno a rebolusyonaryo.

Katugtugaw pay laeng ni Macapagal-Arroyo ket sikreton nga immandar na (babaen kenni Gen. Angelo Reyes) ti panangituloy ti nasaknap nga opensiba a militar kadagiti larangan a gerilya ti NPA tapno maaddaan kano ti gubyerno ti bentahe iti panangituloy ti saritaan a pangkappia iti baet daytoy ken ti NDFP. Intuloy ti aso-aso a rehimen ti kontra-rebolusyoanryo a Campaign Plan Makabayan/Balangai ti rehimen nga Estrada iti laksid ti panangilastog daytoy a sinukatan nan ti all- out peace ti all-out war ni Estrada.

Itay Oktubre 1, iti panagbisita ni Macapagal-Arroyo idiay Mindoro, diretsa nga inyendorso na ti nasaknap nga operasyon militar ti AFP ken PNP iti dua a prubinsya ti Mindoro ken iti intero a Southern Tagalog. Ninayunan na pay ti dati a lima a batalyon ti AFP ken PNP iti Oriental Mindoro. Isu nga addan innem a batalyon ditoy malaksid pay iti maysa a task force ti Philippine Navy, ti Naval Task Force 31 (NTF31) a naipauneg iti operational control ti 204th Bde (ti kumand ti AFP iti Mindoro ken Romblon). Kas nayon a suporta kadagitoy, immandar pay ni Macapagal-Arroyo ti panangidutok ti Army Engineering Battalion iti Abra de Ilog, Occidental Mindoro.

Isu nga agsasaruno itan dagiti pammapatay ken dadduma pay a langa ti terorismo militar iti Oriental Mindoro a direkta nga inisponsor mismo ni Gloria Macapagal-Arroyo. Nasurok 95 kaso ti panaglabsing iti karbengan kas tao ti napasamaken iti Southern Tagalog iti umuna a siyam a bulan ti panagtugaw ni Macapagal-Arroyo. Maibilang kadagiti biktima ti rinibu nga internal refugees, a kaaduan ket katutubo a Mangyan.

Ipatpatungpal ti rehimen a Macapagal-Arroyo, babaen ti AFP ken PNP ken dagiti pwersa a paramilitar, ti sistematiko a patakaran ti panangisaknap ti terorismo babaen ti Campaign Plan Balangai. Iggem daytoy ti oryentasyon a "Back To Basics", ti kontra-rebolusyonaryo a doktrina ti US a mangipakat ti panagusar ti lantay militar ken pinakabrutal a panangsupring kadagiti rebolusyonaryo a pwersa ken kadagiti sibilyan a kaddua ken mangdungdunggo kadagitoy.

Gapu ditoy nga oryentasyon, gagaraen ken siguradoen dagiti yunit ti terorista nga AFP ken PNP ni Macapagal-Arroyo nga iti tunggal engkwentro iti baet ti AFP-PNP ken NPA ket adda mairaman a sibilyan. No awan met ti mapasamak a labanan, mangkidnap ken mangtiliw ti AFP ken PNP. Dagiti kakaasi a biktima a sibilyan ket masalbeyds, permanente a mailemmeng wenno awanan asi a mapaltugan ken maparuar a natay kadagiti labanan iti baet ti AFP wenno PNP ken dagiti yunit ti NPA.

Panggep daytoy a terorismo ti mangisaknap ti buteng iti intar ti umili iti aw-away tapno saan da a suportaran ti NPA.

Kas iti napatalaw a ni Estrada, nalawag nga ipakpakita ni Macapagal-Arroyo ti panangiduron na ti terorismo militar iti kaaw- awayan ken ti kinaaso-aso na iti "todo-todo a suporta" iti gubat nga agresyon nga idadauluan ti US laban iti Afghanistan.

Iti sango dagitoy, rumbeng nga agkaykaysa a supiaten ken labanan dagiti puersa a demokratiko ken progresibo ti terorismo a militar nga inyendorso mismo ni Macapagal-Arroyo. Dagiti kangrunaan a pwersa a nangipatugaw kenni Macapagal-Arroyo ket rumbeng itatta nga agkaykaysa manen ken agtignay tapno sangoen ken pasungbaten isuna iti panangibaddek na iti umili.###

Back to top