PAMATUKAN ANG KABUTIGAN NI BRIG. GENERAL JEFFREY SODUSTA!

Ka Quintero Magtanggol
Spokesperson
Bonifacio Pasakan Command
New People's Army
Larangang Gerilya2
Negros Island
Pebrero 24, 2004

Madamo ang nakibot sa binutig nga pahayag ni Brig. General Jeffrey Sodusta, ang CO sg 303rd Brigade, 3ID, PA nga ang POW nga si CAFGU Eduardo Raya indi kuno CAFGU kundi katapu sg Civilian Volunteer Organization (CVO).

Ngaa gulpi na lamang nangin CVO ang POW nga CAFGU nga si Ed Raya? Nainsultuhan ang intelligence sg mga upisyales kag pumuluyo sg Brgy. Mahalang, Himamaylan City, sa binutig nga pahayag ni Brig. General Sodusta. Lapnagon ang ihibalo sg mga pumuluyo sa Brgy. Mahalang nga si Ed Raya isa ka CAFGU kag nagapatuman sg hilikuton sg CAFGU. Pati ang intelligence ni Mayor Mencit Bascon ginpakanubo sg butigon nga heneral. Kahibalo si Mayor Bascon nga CAFGU si Ed Raya kay siya gani ang nag-officiate sg kasal sini nga isa ka civil-wedding sadtong Enero, 2004.

Kumpyansado si Brig. Gen. Sodusta nga masusteni niya ang kabutigan bangud sg nabihag sg NPA si CAFGU Raya, nabilin ang iya diploma sa pag-graduate niya sa training bilang CAFGU sa iya knapsack didto sa gin-reyd nga detachment. Apang may iban pa nga legal documents kag amo ang makapamatuod sa pagka-CAFGU ni Eduardo Raya.

Gen. Sodusta, basi mag-backfire sa imo ang pagbinutig mo? Indi bala tuman ka nubo kag ka baraghal nga kondukta ini bilang isa ka mataas nga upisyal sg AFP? Kabahin bala ang pagbinutig para mapromote sa pagkaheneral? Gina-insulto mo ang mga sibilyan nga upisyal sg local government sa Brgy Mahalang kag syudad sg Himamaylan. Apang naintiendihan namon ang kahadlok ni Gen. Sodusta sa POW nga status ni Ed Raya. Para sa iya maayo kakason sa pagka-CAFGU si Ed Raya kag himuon na lamang nga CVO para paggwaon nga ini ordinaryo lamang nga sibilyan kag indi organiko nga katapu sg AFP, demodo indi mangin POW. Apang amo bala ini ang dapat madangtan sg mga CAFGU nga ara sa unahan sg linya sg depensa sg kontra-rebolusyonaryo nga gyera sg rehimeng -US Macapagal Arroyo? Sa panahon sg ital-ital kag kon mabihag sg NPA, hapos lang sg AFP nga isikway (disclaim) ang CAFGU?

Ara sa unahan sg kontra-rebolusyonaryo nga gyera ang CAFGU apang tuman ka gamay sg ila nga sweldo. Ahaw P1,800.00 kada bulan nga indi kaigo sa mga sandigan nga kinahanglanon para mabuhi. Permi man ini nagakadelatar sa tagduha ka bulan. Gwa pa sini, wala sila benepisyo parehas sg mga regular nga katapu sg Army. Halimbawa clothing allowance, longevity pay, hazard pay, combat pay, laundry allowance, PERA kag iban pa nga mga benipisyo.

Tuman ka puraot ang kahimtangan sg mga CAFGU kumpara sa sitwasyon sg regular nga katapu sg Army. Apang sila ang ginapaon o ginabutang sa unang linya sa depensa sa kontra-rebolusyonaryo nga gyera sg pasistang rehimeng Arroyo.

Mga CAFGU magbugtaw na kag mag-isa batuk sa pagpanghimulos sa inyo sg AFP. Idemanda nga sa husto nga panahon ninyo mabaton ang sweldo kada bulan. Magdemanda man sg mga benepisyo parehas sg regular nga militar kaangay sg clothing allowance, longevity pay, hazard pay, combat pay, laundry allowance kag iban pa.

Ang mga CAFGU bilang mga mangunguma dapat nga mag-upod sa kawsa sa pagpangapin sa interes sg malapad nga pumuluyo batuk sa kontra-pumuluyo nga mga polisiya sg papet kag garuk nga panggobyerno ni Macapagal Arroyo.Pinakamataas nga mahimo ninyo amo ang pag-upod sa armadong paghimakas para wasakon ang nagahari nga sistemang mapiguson kag mahimuslanon kag tukuron ang gobyerno sg pumuluyo nga nagapangapin sa interes sg kadam-an kag indi sa pipila lang nga manggaran.###

Back to top