Punasen ti abang ti daga ken utang, irupir ti kalintegan! Mainaig iti Didigra ti Bagyo nga Harurot

Ka Juan Pobre
Tagapagsarita
Pambansang Katipunan ng Magbubukid
Cagayan Valley
Agosto 05, 2003

Dakkel unay ti didigra nga impaay ti naglabas a bagyo nga Harurot. Nangruna kadatayo a mannalon. Nasurok-kumurang nobenta porsyento (90%) ti naperdi a mulmula a mais, saba, nateng ken prutas. Natukkol ken nailaplag iti daga dagiti mais, saba, natnateng, ken prutas. Adu a pagtaengan, kamalig ken kalapaw ti naan-anay a narebba. Ad-adu pay ti natulid, nagirig ken naikkatan ti atep a balbalay. Iti kastoy a napasamak, dakkel manen a pukaw ken panagrigat ti sagabaen tayo.

Daytoy a pasamak ken kasasaad ket dakkel a nayon a panagrigat kadatayo a mannalon. Nangruna ta inutang dagiti bin-i, abono, pestisidyo ken panangdan. Dakkel a saludsod, sadino ngata manen ti mabalin a pangalaan iti pagbiag ken pagbayad ti utang? Pagalaan manen ti madagdagus a maimula a bin-I a pangsukat kadagiti naperdi? Kasta met ti panagabono, pestisidyo ken panangdan? Daytoy ti kasapulan a maikkan ti annatop a solusyon.

Saan tayo a namnamaen a ti gubyerno ket mangted ti subsidyo iti relief ken rehabilitation para iti naperdi a mulmula ken balbalay. Ti laeng maikari na ket maysa a lata nga sardinas, maysa a kilo a bagas ken maysa a Payless. Iti panangipatungpal na iti patakaran a liberalisasyon, ken deregulasyon, awan pulos subsidyo ti maitulong na kadatayo, inikkat na pay ketdi.

Ania ti rumbeng nga aramiden?

Aw-awagan ti PKMP-Cagayan Valley dagiti maseknan a mannalon, nga ilaban dagiti sumaganad a linaon ti Rebolusyonaryo a Tarabay iti Reporma iti Daga:

1. no ti nadadael iti apit ket saan a bumaba ngem iti 20% wenno apagkalima ti apit, saan nga agbayad ti makidagdaga ti aniaman nga abang iti daga iti apo�t daga;
2. no ti nadadael iti apit ket saan a basbassit ngem iti 50%, ti makidagdaga ket saan nga agbayad ti aniaman nga abang iti daga para iti agdama nga apit ken uray iti sumaruno nga apit;
3. Ti bayad kadagiti nagbalin nga utang gapu iti pannakadadael ti mulmula, apit ket nainkalintegan a disisyunan ti timpuyog dagiti mannalon segun iti kongkreto a kasasaad;
4. mabalin a punasen ti timpuyog ti mannalon dagiti utang agingga iti gatad a kabatog ti gatad ti nadadael, nangruna no ti nagpautang ket dagiti apo�t daga ken dadduma pay a dadakkel a pribado nga agpapautang.

Madagdagus nga ilaban ti timpuyog ti mannalon a pautangan manen dagiti komersyanteusurero ti bin-I, abono, pestisidyo ken panangdan dagiti mannalon. Kasta met ti pagbiag da agingga a makapagapit da.

Puersaen ti lokal a gubyerno a mangted ti libre a bin-i, abono ken pestisidyo. Dagitoy ti nainkalintegan, makatao ken naindasigan a gun-oden kadaytoy a panawen gapu iti pasamak a kalamidad. Awisen dagiti pada a mannalon nga agorganisa ken agtignay tapno saan tayo malmes iti utang. Katungtongen tayo dagiti apo�t daga ken agpapautang. Awan ti mauray tayo no saan tayo nga agtignay. Adda ti pigsa tayo gapu ta nainkalintegan ti ilablaban tayo.

Daytoy laeng ti nabatbati a pamuspusan tayo tapno makalung-aw iti agdama a sagsagabaen a panagrigat.

Ilaban ti karbengan dagiti mannalon iti ekonomya! Buklen ti nairot a panagkaykaysa dagiti mannalon! ###

Back to top