Binutig sang 303rd Brigade, Pangbawi sa ila Nagakaagnas nga Moral

Nilo Magtanggol
Roger Mahinay Command
NPA-Southwest Front
Negros Island
Setyembre 14, 2003

Binutig kag scripted ang ginhimo nila Col. Jeffrey Sodusta kag Gob. Joseph Maranon sa pagpasurender sang 11 ka sibilyan nga pumuluyo sang Brgy. Manlocahoc, Sipalay City sang nagligad nga Septyembre 12, 2003 sa Igmayaan Hall, Provincial Capitol, Bacolod City, Negros Occidental.

Gusto pagwaon sa sini nga script nga sila Gobernador Maranon, Major Gerona kag Col. Sodusta ang mga bida, 11 ka sibilyan nga pumuluyo sang Brgy. Manlocahoc ang mga cast nga mga katapu kuno sang lokal nga yunit milisya (YM) kag propaganda organizing team (POT) sang NPA. Ang scriptwriter sini nga palabas amo man sila Col Sodusta kag Gob. Maranon kag ang producer amo si Pacman Danding Cojuangco. Lunsay kabutigan ang unod sang script. Ang matuod wala sa rooster sa listahan sang katapuan sang Roger Mahinay Command sang Southwest Front ang 11 ka elemento nga ginpasungka nanday Gobernador Maranon kag Col. Sodusta kag indi man matuod nga katapu sila sang YM kag POT sang NPA. Ang mga ini mga sibilyan kag simple nga mga imol nga mangunguma kag indi katapu sang anuman nga armadong yunit sang NPA.

Indi na bag-o ang kabutigan nga ginhimo sang 303rd Brigade kag ni Gob. Maranon sa pagpatuman sang ila kontra-insureksyon nga kampanya. Ari ang pila ka hitabo nga gintago nila ang kamatuoran;

Sang nagligad nga Sept. 25, 2002 nga engkwentro sa tunga sang yunit sang AFP kag NPA sa Sitio Taysikan, Brgy. Balicotoc kag Sitio Abta, Brgy. Tapi, gintago dayon nila ang ila kaswalti kag pilason nga katapu sang 61st IB PA kag nagpaggwa sila dayon sang pahayag nga madamo sang pilason sa yunit sang NPA. Naglunsad man sila dayon sang pulong-pulong kag psywar nga kampanya sa pumuluyo kag ginpilit ang mga Brgy. Officials sa pagpatukod sang military detachment pero indi nagmadinalag-on tungod sa indi pagpasugot sang Brgy. Officials kag pumuluyo.

Nob. 11, 2002 nga engkwentro sa Sitio Binus-ay, Brgy Manlocahoc, Sipalay City, ila man tani taguon ang ila kaswalti kag pilason nga katapu sang Scout Rangers kag ipangibabaw ang binutig nga pahayag pero tungod nga nabulgar sa mass media dayon nila himo sang mahigko nga maniobra kag pagpanghalit sa mga sibilyan nga pumuluyo. Gusto nila papatihon ang malapad nga pumuluyo nga may nadakpan sila nga katapu sang NPA pero ang matuod isa ka sibilyan kag simple nga imol nga mangunguma nga si Morito Arcadenia ang konkreto nga gintortyor kag ginpatay sang mga terorista kag mga butigon nga AFP.

Hunyo 22, 2003 naman nga engkwentro, gintago naman nila ang ila pagpang-istraping sa mga sibilyan sa Sitio Buyog, Brgy. Nabulao, Sipalay City.

Agosto 17, 2003, engkwentro sa Sitio Mambut-oy, Brgy Locotan, Kabankalan City, nagpagwa dayon sang binutig nga pahayag si Maj. Gerona nga madamo ang pilason sa yunit sang NPA kag wala sang anuman nga kaswalti kag pilason sa ila tropa pero indi natago ang kamatuoran sa pumuluyo sa erya sang engkwentro nga may 2 ka patay kag 2 ka pilason sa ila elemento sang composite operatives (Scout Ranger, Phil. Army kag RPA) kag wala sang isa ka pilason sa yunit sang NPA.

Sa serye sang mga engkwentro nga nahitabo sa tunga sang yunit sang 303rd Brigade upod sa RPA-ABB kag sa yunit sang NPA indi matago nga nag-angkon sila sang kapierdihan sa pulitika kag militar nga aspeto sa patag-awayan, gani gusto nila nga mag-angkon sang signipikante nga kadalag-an sa CPP-NPA-NDF.

Ano pa gid bala ang pinakatuyo sa ginhimo nga binutig nga script ni Col. Sodusta kag Gob. Maranon?

Gusto nila magbawi sa naangkon nga kapierdihan sang 303rd Brigade sa patag sang pulitika kag militar nga aspeto nga patag-awayan sa sakop sang Southwest Front kag mag-angkon sang signipikante nga kadalag-an para pataason ang moral sang mga upisyal kag katapu sang yunit sang 303rd Brigade.

Magpatuhaw sang mga "peke" nga katapu sang NPA paagi sa paggamit sang mga sibilyan ukon daan nga mga surenderee para I-dramatisa nga madamo na ang nagasurender kag pagwaon nga nagahuyang/nagakawasak ang CPP-NPA-NDF.

Maghimo sang pilot area para sa ila holistic approach (joint coordination sang LGU, military, Govt. Agencies, NGO kag PO) sang counter insurgency campaign kag maghimo dayon sang sunod-sunod nga pagpasurender sang mga sibilyan nga ginapatihan nila nga kontrolado sang CPP-NPA-NDF, winning the hearts and minds of the masses ang gusto nga lab-uton sang sini nga taktika sang counter-insurgency (COIN) nga programa.

Gusto man paggwaon sa sini nga script nga ang AFP kag sibil nga gobyerno nagatamod sa sosyo-ekonomiko nga kinahanglanon sang pumuluyo kag paggwaon nga indi sila mga warmongorers.

Nga ang Brgy. Manlocahoc ang ginhimo nila nga pilot area sa Southwest sa ila holistic approach sang COIN program?

Ginapatihan nila nga stronghold ini sang CPP-NPA-NDF.

Ari diri ang malapad nga cassava plantation ni Pacman Danding Cojuangco nga ila Big Boss.

Ari man diri ang HQ sang Bravo Coy sang 61st IB PA nga ginahanas sa TRIAD ops (intel, psywar kag strike operations) kag training ground sa holistic approach sang COIN program.

Diri man natabo ang ila daku nga military kag political blunder sa kaso ni Morito Arcadenia, nga tubtub karon wala pa matagaan sang hustisya.

Ari man diri ang konsentrasyon sang mga project ni Mayor Montilla nga nagapalig-on sa COIN program.

Ang ini nga estratihiya kag taktika nila sa COIN program wala sang kinatuhay sa mga nagliligad nga mga Oplan sa panahon ni Cory Aquino sang 1986-87, Lambat-bitag ni Ramos, OPMAK ni Estrada. Ila lamang ginrecycle kag ginkalkal ang ginlubong na nga ginakangidlisan sang pumuluyo. Ang pinaka-ubod sang sini nga estratehiya amo ang pagsabwag sang psywar kag terorismo sa pumuluyo.Pat-ud gid ang ginhimo nila Major Gerona kag Gobernador Maranon magatuga sang lapnagon nga paglapas sang tawhanon nga kinamatarung sa sibilyan nga pumuluyo.

Ginapanawagan sa pumuluyo nga mangin muklat sa pagpamatok sa mga kabutigan nga ginahimo sang AFP kag reaksyonaryo nga gobyerno nga ginapamunuan ni Gob. Maranon.

Paslawon ang holistic approach sa COIN nga programa sang 303rd Brigade sang AFP!

Back to top