Mahitungod sa mga kaswalidad nga sibilyan sa Kabasalan ug Bacungan

Ismael Marte
Spokesperson
CPP-NPA in Western Mindanao
Mayo 18, 2004

Sugod niadtong April 19 hangtod Mayo 12, 2004 gilunsad sa mga armadong pwersa sa New People�s Army sa Kasadpang Mindanaw ang 5 ka taktikal nga opensiba didto sa kalungsoran sa Tambulig ( Abril 19 ), Kabasalan ( Mayo 10 ), Sapang Dalaga ( Mayo 4 ), Concepcion ( Mayo 11 ) ug Bacungan ( Mayo 12 ). Sa maong mga taktikal nga opensiba, nasakmit sa NPA ang 5 ka M14, 1 ka carbine ug 2 ka M 16 rifles gikan sa mga kamot sa kaaway ug napuo ang 2 ka sundalo sa PA, 7 ka Cafgu, 2 ka goons samtang 2 ka sibilyan ang napagan sa sinukliay sa bala. Walay namatay o naangol sa pwersa sa NPA.

Ang maong mga taktikal nga opensiba gilunsad batok sa lehetimong armadong mga target nga kaaway kinsa gikasilagan tungod sa padayon nilang pasistang binuhatan batok sa mga mag-uuma sa kabukiran. Sa pagpili sa mga himulag nga target nga kayang daugon, matngon ang mga Pulang kumander ug manggugubat sa paggamit sa hustong mga taktika sa kadaogan samtang matinud-anong naninguha nga mapanalipdan ang mga katungod sa mga combatants nga dili na makasukol ug mga non-combatants gikan sa posibleng kabangis nga kalit mosilaob human dusliti ang unang pabilo sa panagsangka.

Gipakita kini sa NPA dihang, human madis-armahi si Mayor Balaod, iyang mga bata-bata ug duha ka sakop sa PNP sa Tambulig, gibuhian sila nga walay garas ni gipasipad-an ang ilang pagkatawo. Ang duha ka managlahing taktikal nga opensiba sa NPA sa Front JVSIS didto sa Jampak, Kabasalan ug Tinuyop, Bacungan mibunga sa 5 ka M14 rifles nga nasakmit, mipatay sa 8 ka pasistang tropa, apil na ang pila ka banggiitang Cafgu nga dugay nang perwisyo sa kinabuhi sa masa. Apan wala sa tinguha ug dili tinuyo nga usa ka sibilyan ang nakalas ug laing usa ang naangol diha sa sinukliay sa bala.

Ipadangat sa CPP-NPA ang kinasingkasing nga pahasubo sa pamilya sa napatay nga Alan Anghag, usa ka habal-habal driver sa Bacungan, ug sa samarong Amelinda Remorca, usa ka maestra sa Kabasalan. Dungan usab giila nga bisan pa man kun dili tinuyo ang pagkaangin sa mga hingtungdan, usa kadto ka kasipyatan nga angayan kutloan og pagtulun-an sa tanang Pulang kumander ug pulang manggugubat aron malikayan, kutob sa tanang posibleng mahimo, ang susamang ingong mga kahimtang diin adunay bisan usa man lamang ka sibilyan nga masagol sa target nga kaaway. Diha sa pagpili sa target, pagplano ug aktwal nga panagsangka, ang NPA kanunay nagahatag og bug-at nga importansya sa kasigurohan sa mga sibilyan, katungod sa nga hors de combat ug mga dinakpan sa gubat. Ang CPP-NPA usab maningkamot nga motabang base sa kakayahan ngadto sa mga pamilya sa hingtungdan sa hustong panahon ug lugar.

Back to top