Mini nga demokrasya gipasundayag sa Eleksyon 2004

Ismael Marte
Spokesperson
CPP-NPA in Western Mindanao
Mayo 14, 2004

Sa makausa pa, dugang nabutyag sa katawhang Pilipino ang sa sinugdanan pa anti-demokratiko ug dunot nga kinaiya sa sistemang elektoral ubos sa kasamtangang semikolonyal ug semipyudal nga sistema sa nasud. Mas mitataw, imbes matabonan, ang kainutil ug kabangkarota sa liderato sa reaksyonaryong mga hut-ong sa pagsulbad sa grabeng katilingbanong krisis nga bunga sa imperyalismo, pyudalismo ug burukrata kapitalismo. Ug ang ang gipasibantog nga demokratikong proseso mas mitataw nga dakong kontra-demokrasya.

Sukad magsugod ang election campaign period hangtod sa Mayo 10, mikabat sa 30 ka mga sibilyan, militar ug goons ang napatay ug kawhaan ang angol, tanan resulta sa init ug bangis nga panagbangga sa mga reaksyonaryong pulitiko dinhi sa Kasadpang Mindanaw. Labing daghang kandidato sa pagka-gobernador, kongresman ug mayor misandig sa mga tropang militar, private goons ug hired killers. Labing duguon sa tibuok rehiyon ang 2nd District sa Zamboanga del Sur diin 20 ang patay. Natala ang labing daghang kaso sa armadong enkwentro, pagpamugos ug ginulatay sa mga kontra-partido ug botante sa kalungsoran sa Tampilisan, Siayan, Kalawit, Salug ug La Libertad sa sa Zamboanga del Norte; Concepcion, Sapang Dalaga, Ozamis, Tangub ug Don Victoriano, Misamis Occidental; Ramon Magsaysay, Tambulig, Dumingag, Dumalinao, San Pablo, Kumalarang, Dimataling, Dinas, Bayug, Lapuyan ug Pitogo, Zamboanga del Sur; Buug ug Kabasalan sa Sibuguey Province. Sa Lanao del Norte, ang paramilitar nga pwersa sa Rebolusyonaryong Partido ng Manggagawa-RPA dungan sa AFP nga milunsad og mga operasyong militar aron hulgaon ang masa ug progresibong mga kandidato batok sa pagbotar sa Bayan Muna ug ubang progresibong partylists.

Dungan usab sa maniobrahay ni Macapagal Arroyo ug mga reaksyonaryong anti-Arroyo nga oposisyon nga makadaog ginamit ang tanang anti-demokratikong paagi, mibaha ang pinalitay sa mga botante sa katapusang duha ka adlaw ayha ang eleksyon, gikan sa P300-P1,000 kada ulo. Ang labing tag-as nga pusisyong nasyonal ug lokal klaro nang gireserba alang niadtong mga hut-ong nga adunay dagkong puntil sa salapi, armory, ug elektoral nga makinaryas. Prebilihiyo lamang kana sa pipila ka dagkong agalong yutaan, dagkong burgesya komprador ug dagkong burukrata kapitalista, kun mao, demokrasya lamang alang sa pipila ang reaksyonaryong eleksyon.

Pipila ka progresibong partylists nakaangkon tuod sa lingkoranan sa reaksyonaryong Kongreso apan human makatagamtam sa labing anti-demokratiko ug pasistang pagpanumpo ug pagpanglutos sa rehimeng Macapagal Arroyo. Sa kasyudaran ug kabukiran, ang AFP ug mga anti-komunistang pundok sama sa NAD, walay puas nga milunsad sa kampanyang psywar batok sa mga partylists nga gibansagan nilang �kaabin sa mga terorista ug kriminal nga CPP-NPA�. Kay wala sila molampos sa paglubag sa panghunahuna sa katawhan, siguradong mokambyo na usab ang anti-komunistang mga tirada nila sa pag-ingon, �Kana ang nakanindot sa demokrasya, pasalamat kanang mga mga komunistang partylists kay gitugotan pa silang mahimong mga kongresman! Gipatuo sa mga reaksyonaryo nga ang bangis nga pagpanumpo sa tawhanong mga katungod sa tabil sa anti-komunismo ug anti-terorismo usa ka pagpanalipod sa demokrasya, nga ang saop ug agalong yutaan may patas nga kahigayonang modagan pagka-kongresman o gobernador, ug nga ang bilyon-bilyong kurakot ug pagwaldas sa salapi sa katawhan sa mga burukrata kapitalista sukad pa sa sinugdangan mahimong itumbas ug ipakang batok sa mumhong PTC nga nakolekta sa CPP-NPA alang sa siguradong kaayohan sa rebolusyon ug katawhan.

Sa pikas bahin, adunay nagatubo nga bag-ong klase sa demokrasya karon sa Pilipinas nga gipahimugso dungan sa pagtumaw sa mga pulang organo sa pulitikanhong gahom sa kabukiran. Dili kini hinatag ni kinsa mang reaksyonaryong hut-ong kun dili gipakigbisogan kini diha sa mga pabrika, umahan, plantasyon, eskwelahan, kadalanan ug ubang lugar-trabahoan. Kining bag-ong demokrasya alang sa kinabag-ang masang mamumuo ug mag-uuma ug ubang demokratikong sektor. Kun ang mga reaksyonaryo ug pasista lamang ang pagbut-on, walay ni usa ka progresibong elemento ang makasulod sa Kongreso ug sa tanang ang-ang sa lokal nga kagamhanan.

Gikan karon ug mosunod pang katuigan, mas molig-on ug mas molapad pa ang rebolusyonaryong kusog sa katawhan sa tibuok nasud ug dinhi sa Kasadpang Mindanaw. Dili na mahimong mababale-wala pa sa mga reaksyonaryong hut-ong ang CPP-NPA-NDF sa bisan unsang mayor nga pulitikanhong agenda ug ug kasulbaran sa mga batakang suliran sa nasud. Dili na mahimong makahari pa ang mga reaksyonaryong hut-ong sa karaang mga pamaagi. Dugang nagatubo karon ang ang kahimatngonan, kasinatian ug kaandaman sa katawhan aron ibutyag ug batokan ang tanang pasistang kabangis ug panglingla ug, pinaagi sa malungtarong gubat sa katawhan, hingpit sakmiton ang rebolusyonaryong kadaogan. Kun libkason sa mga reaksyonaryo ang demokratikong pagtakoban pabor sa dayag nga pasistang paghari, siguradong sugaton kini sa nagkakusog nga hampak sa armado ug militanteng pagsukol sa katawhan.

Human masaksihan sa katawhan ang kadunot ug kahugaw sa reaksyonaryong eleksyong 2004, angayan lamang nga mas paspason pa sa tanang rebolusyonaryong pwersa ang pagtubag sa hagit sa katawhan alang sa hingpit nga katilingbanong kabag-ohan, sulbaron ang suliran sa yuta sa masang mag-uuma, tubagon ang interes sa demokratikong mga sektor, ilunsad ang malampusong taktikal nga mga opensiba subay sa mga balaod sa pakiggubat, ug hiusahon ang mabagang katawhan aron pukanon ang pasistang rehimen sa estadong semikolonyal ug semipyudal.

Back to top