Lain na usab nga 'dirty trick' sa 4ID:
MINI NGA PAGPASURENDER

Emiliano Libertad
Tigpamaba
Ignacio "Eking" Balacut Command
New People's Army--Misamis Oriental
Marso 21, 2003

Dako ang kahikurat sa tanang mga rebolusyonaryong pwersa ug masa sa Front 4B sa pagkakita sa telebisyon sa kunohay pagsurender sa usa ka Mercy Obsid kaniadtong Marso 21, 2003 panahon sa binisayang edisyon sa regional news sa ABS-CBN.

Lain na usab kining produkto sa barot nga propagandang gilubid ni Lt. Col. Macanas isip tigpamaba sa 4ID. Dili ikatingala kun buhaton niya ang tanan bisan pa kun mosangpot sa pagpanglingla ug pangilad basta lang matagbaw niya ang iyang mga superyor ug ang maki-kaugalingong kahakog niya sa promosyon.

Usa ka dakong pangilad ug panglingla sa katawhan ang pagpaila ngadto sa publiko kang Mercy Obsid isip usa ka "NPA nga wala na makaangay ug makaagwanta sa sulod busa nakahukom pagsurender".

Alang sa kasayuran sa tanan, kini si Mercy Obsid tinuod usa ka lumulupyo sa Lantad apan wala gyod gani mapasulod bisan na lang sa pinakaubos nga ang-ang sa rebolusyonaryong organisasyong masa. Ang kadali nilang masilaw sa kaharuhay ug bahandi maoy nagtukmod kaniya aron mahimong 'modelo' sa 4ID sa ilang psychological operation batok sa rebolusyonaryong kalihokan.

Ang bisag kinsang lumulupyo sa Lantad, nasayod nga kini si Mercy Obsid tungod sa naghingapin niyang tinguhang makalingkawas sa ilang kapobrehon nakigrelasyon sa usa ka Amerikano pinaagi sa sinulatay ug gani nagdawat gyod og binulan nga kuwartang ipadala sa iyang karelasyong Amerikano. Apan wala siya dayona pag-minyo niini dihang nasayran sa iyang pamanhonong Amerikano nga wala pa man gani sila si Mercy ma-sapian nahimo na kining matapobre bisan pa ngadto sa ilang mga kadugo. Ug dinhi natapos ang dautang damgo sa pamilyang Obsid.

Dinhi mi-entra sa esena ang mga militar. Sa mga sayong bahin sa dekada 90 sa paghimong showcase sa Lantad isip "teritoryo nga ilang nabawi kunohay sa kamot sa mga NPA", ilang nakita ang pamilyang Obsid isip materyal alang sa ilang psychological operation batok sa rebolusyonaryong kalihokan. Busa ilang gipalutaw si Mercy Obsid nga kunohay usa ka "NPA" nga nagsurender.

Ang usa ka gubat dili lang gubat sa natad sa ekonomiya ug militar. Gubat usab kini sa propaganda. Ang matag tampi naningkamot nga gawas sa ekonomiya ug militar mapilde niya sa propaganda ang kaaway nga pwersa aron sa ingon sa level pa lang sa panghunahuna nadis-armahan na niya ang iyang kaaway nga tropa. Ug ang tam-is nga kadaugan sa usa ka komander sa gubat mao ang pagpilde sa iyang kaaway nga walay bisan usa ka tulo sa dugo. Ug dinhi nanukad ang kamahinungdanon sa gimbuhatong propaganda.

Ang New People's Army nagahimo og gimbuhatong propaganda apan nanukad kini diha sa kamatuoran tungod kay sa gubat sa katawhan nga iyang gilunsad kun bakak ang iyang propaganda kinsa pa man ang motuo kaniya? Busa aduna kiniy Tulo ka Batakang Lagda sa Disiplina ug Walo ka Puntong Angay Timan-an nga nagpakita sa binuhatan isip pinakaepektibong propaganda kaysa sinultihan.

Sa pikas bahin ang AFP nagahimo usab og gimbuhatong propaganda pinaagi sa iyang makinarya sa psychological warfare. Apan ang kalahian tungod kay mismo sa oryentasyon pa lang sa pagbansay ug pagpabarog sa AFP pasista na daan, natural nga ang iyang mga opisyal ug elemento mga pasista usab. Kun nagpakita man sila og "kabuotan" karon, kana tungod kay nagkakusog ug nagkadako ang suportang gitagamtam karon sa New People's Army.

Apan tungod kay ang AFP, usa ka Lobo nga nagsapot lang sa pagka-Karnero, molutaw ra ang tinuod niyang dagway diha sa pagpanglabay sa mga adlaw. Ug sa kasaysayan sa kontrainsurhensyang gubat daghan na ang mga kaso sa mini nga pagpasurender ang nahukasan ug nabisto mismo atubangan sa katawhan. Mo-boomerang ra kini kanila. Sama sila sa usa ka hungog nga mibaswat og dakong bato aron lang ibundak sa ilang kaugalingong tiil.###

Back to top