Raid Iti Sta Lucia MPS, Naimballigian A Naisayangkat Ti ACC

Armando Silva
Spokesperson
Alfredo Cesar Command
New People's Army
Ilocos Sur
Setyembre 18, 2003

Naimballigian nga insayangkat ti Alfredo Cesar Command-NPA Ilocos Sur ti panangraut iti Sta Lucia Municipal Police Station (SL-MPS) idi rabii ti Sept. 15, 2003 a nagresulta iti pannakakumpiska dagiti armas ti Sta Lucia Police, pannakatay ti tallo ken pannakasugat ti uppat nga elemento ti PNP. Mainayon a balligi ti panaka-ipatungpal ti desisyon nga impaulog ti Korte ti Umili a dusa a patay kada SPO2 Ricardo Isidro ken PO3 Alberto Barbado a kabilang kadagiti tallo a natay.

Iti kabuklan, balligi a nagun-od ti kangrunaan a panggep a panangdis-arma ken panangnyutralisa iti nasao a police station babaen ti panangkumpiska kadagiti armas� 11 a nangangato a kalibre ti paltog ken 7 a pistola. Nakumpiska pay ti 872 a bala ti nadumaduma paltog, 38 a magazines ti M16 ken 8 magazines ti pistola. Mainayon ditoy a balligi ti panakarippuog ti nasao nga estasyon ti pulis ken panakauram ti maysa a lugan ken 2 a motorsiklo dagiti pulis. Nairaman met a nakumpiska ti sumagmamano a gramo ti marijuana manipud iti packpack a naala iti locker ni PO3 Barbado.

Ti panakatay ni SPO2 Simeon Aquino ken panakasugat dagiti dadduma pay a pulis ket saan a naliklikan gapu ta dagus da a limmaban idi mapasungadan da dagiti NPA. Ni SPO2 Aquino ti immuna a pimmutok, nagkakaribuso met dagiti dadduma pay a pulis a nagala iti cover ken simmaruno ti napuskol a panagpappaputok da iti uneg ti estasyon. Limmaban ken nagpatangken dagitoy a pulis iti laksid ti panangpaspasuko ken panangpatalged dagiti operatiba ti NPA a dagiti armas laeng ti kasapulan da. Nu pay saan a panggep ti NPA a patayen wenno dangran isuda (malaksid kada SPO2 Isidro ken PO3 Barbado a nababaan ti dusa a patay), napilitan dagiti kakaddua a paayen ken i-nyutralisa ti reaksyon ken tignay da. Idi napasag ni Aquino ken nai-nyutralisa dagiti 3 a pulis, timmulong pay ti maysa kadakuada a nagpasuko iti nabatbati pay a palaban a pulis.

Panangiyabante ti Armado a Rebolusyon

Manipud pay idi, ti SL-MPS ket maysa kadagiti target ti NPA gapu ta aktibo daytoy a lumalaok iti kampanya ken operasyon ti reaksyunaryo a turay tapno kano marebbek ti rebolusyonaryo a tignayan. Idi Agosto 1995, daytoy nga MPS ti nagserbi nga instrumento ti nagtipon a pwersa ti Philippine Army ken PNP a nangkubkob iti maysa a yunit ti ACC iti paset ti Palali Sur, Sta Lucia a nagresulta iti panakasamsam ken panakadadael dagiti ramramit ti yunit. Iti daytoy nga insidente, adu a masa iti asideg iti lugar ti inraman da a binugbog ken pinarparigat, ken pinilit da pay a linabusan ti maysa a maestra. Daytoy met laeng nga MPS ti nangkubkob ti maysa a team ti ACC iti paset ti Bani, Sta Lucia idi July 1997 a nagresulta iti panakatiliw, panaka-tortyur ken panakaibalud ti maysa a kaddua. Manipud idi, nagtultuloy ti kinaaktibo daytoy nga MPS a lumalaok kadagiti Combat Operations nga isaysayangkat ti reaksyunaryo nga AFP-PNP ken aktibo pay iti panagrek-rekrut ti Civilian Informers (CI) ken panagiwaywayat ti Intelligence Network kadagiti barbaranggay iti Sta Lucia laban iti ACC-NPA.

Mainayon pay kadagitoy, kaadduan kadagiti kameng ti pulisya a naidestino iti daytoy nga MPS ket naruay ken kankanayon nga irekreklamo ti umili iti Sta Lucia ti kinaabusado ken ti saan da a panangikankano kadagiti darum ken reklamo iti umili. Adu pay kadakuada ti konektado kadagiti sindikato iti Illegal Drug Trade, protector ti illegal nga operasyon ti jueting ken handler dagiti kriminal nga elemento. Paneknekan daytoy ti panakaibalud idi kallabes ti nag-Chief of Police ti nasao nga MPS a ni Captain Benjamin Alviento, gapu iti kaso mainaig iti Illegal Drug Trade. Daytoy met laeng a dati a Chief of Police ket napeklan a kontra umili ken handler dagiti kriminal nga elemento. Ngem iti bangir na, isuna ti taltalken ken pinaka-paborito a Chief of Police dagiti Hernaez iti daytoy a panawen.

Ti saludsod da Mayor ti Sta Lucia, dagiti opisyal ti AFP-PNP ken dagiti kameng ti media kadigiti local radio stations nga �Apay a ti Sta Lucia Municipal Police Station ti rinaut dagiti NPA?� Ti sungbat daytoy ket simple a lohika: Kas makita kadagiti nailanad a basaran, a ti SL-MPS ket nalawag ken awan duadua a lehitimo a target ti armado a rebolusyon. Awaten tayo man wenno saan adda ti agdama a mapaspasamak a Civil War - ti panangirusuat ti armado a rebolusyon ti umili babaen ti rebolusyonaryo nga organisayon na nga NPA, iti intero a Pilipinas. Ti panggep ti armado a rebolusyon ket: 1) gibusan ti mananggundaway ken manangidadanes a turay dagiti dasig ti Apo't Daga, Dadakkel a Burgesya Kumprador ken ti amo da nga Imperyalismo a US, ken 2) itakder ti masya a turay a pudno nga agserbi iti umili ken gimong nga addaan naan-anay a wayawaya ken demokrasya. Ngarud, ania man nga ahensya, organisasyon wenno pannakabagi ti reaksyunaryo a turay nga aktibo a mangirusrusuat ti armado a reaksyon wenno armado a panangikuspil (fascism) ken sinno man nga indibidwal nga addaan utang a dara ken napeklan a mangparparigat iti umili ken palaban iti rebolusyonaryo a tignayan ket target ti armado a rebolusyon.

Ti panangdis-arma ken panangdadael kadagiti pasdek ken ramit ti reaksyunaryo nga AFP-PNP ket paset ti taktika ti gerilya a pannakigubat tapno mai-nyutralisa ken mai-demobilisa ti reaksyon ken mapakapsut ti kabaelan da a lumaban.

Ngem gapu ta ti NPA ket maysa a rebolusyonaryo ken disiplinado a hukbo, nairut a sursuroten dagiti kameng na dagiti Annuruten ti NPA ken Linteg ti Gubat (Rules of War) a nailanad kadagiti International Covenants and Agreements, kangrunaan ti linteg mainaig ti hors the combat . Paneknek iti daytoy, sinigurado dagiti kakaddua a nairuar ken naiyadayo amin a kameng ti pulisya, pakairamanan ti bangkay ni SPO2 Aquino nga immuna a napasag, tapno saan da a madangran iti panakarippuog ti estasyon. Mainayon pay ditoy, ti kabuklan a proseso ti operasyon ket naan-anay a sinigurado nga awan ti mairaman a civilian ken awan ti madadael a sanikua ti umili. Kinapudno na, adda iti kakaddua ti gundaway tapno papatayen pay dagiti dadduma a pulis ken uramen ti munisipyo ngem saan da nga inaramid dagitoy gapu ta mailabsing iti disiplina ken annuroten ti NPA ken maikaniwas kadagiti internasyunal a paglintegan ti gubat. Ngarud, ti pablaak ni Mayor Hernaez ken dagiti opisyal ti AFP-PNP a �daytoy nga aramid ket kina-terorista� ket awanan basaran.

Iti sabali a bangir, dawatenmi ti dispensa iti umili ti Sta Lucia mainaig iti panakadarang ti apoy ti bassit a paset ti municipal building. Saan a naliklikan gapu ta asideg daytoy iti kuerpo ti pulisya ken saanen a nakontrol ti apoy. Ti panakairaman na ket saan a ginandat ti kakaddua.

Rebolusyonaryo nga Hustisya Nagun-od ti Umili

Kabayatan na, kasla napag-ot a siit iti barukong ti masa ti panakaipatungpal ti dusa a patay kada SPO2 Ricardo Isidro ken PO3 Alberto Barbado. Ti panakaipatungpal ti rebolusyonaryo a hustisya kadagiti napaneknekan a nagbasolan dagiti nasao a pulis ket nabayagen a kalikagum ti masa. Nalatak iti sibubukel nga ili ti Sta Lucia a ni SPO2 Isidro kas maysa a notorious a pulis a mangparparigat kadagiti masa (panagbugbog, masansan a panagpappaputok tapno i-harass wenno butbutngen dagiti kumontra kenkuana, panangkamat-kamat na ti putok ti paltog, panagkikil ken daddumay pay a panagabuso iti masa). Us-usaren na ti posisyon a kas pulis ken ti paltog na a mang-terrorize iti kabaryoan na ken iti kabangibang a baryo. Ni PO3 Barbado ket masansan nga irekreklamo iti masa ti kinaabusado na ken ti panangusar na ti posisyon a kas pulis ken ti paltog na iti panaggamgam ti daga ti masa iti paset ti Sta Cruz, Ilocos Sur. Malaksid kadagitoy, ni SPO2 Isidro ken PO3 Barbado ket napeklan a palaban iti rebolusyonaryo a tignayan. Isuda ket aktibo a makipagpaspaset iti Kampanya ken Combat Operations kontra iti ACC-NPA. Aktibo da pay nga agrekrekrut ken handler dagiti CI ken dakes nga elemento iti barbaranggay. Gapu kadakuada masansan a maam-ammoan ti reaksyonaryo a tropa ti AFP ken PNP ti presensya ken lokasyon ti yunit ti ACC iti nasao nga ili. Napaneknekan pay nga isuda ket konektado iti illegal Drug Trade syndicate ken protector dagiti Illegal Drug Pusher.

Ti balligi ti naisayangkat a Taktikal nga Opensiba (TO) ket maigapu iti kinapino ti plano, kinadeterminado ken ti naurnos a koordinasyon dagiti operatiba ti ACC-NPA. Napateg met a ramen iti panagballigi ti operasyon ti dakkel a paset ti masa iti sibubukel a proseso ti panakaipatungpal ti operasyon. Daytoy nga operasyon ket paset ti nailian a panangiwayat kadagiti TO tapno ikkan ti nadagsen a danog a pakaulawan ti bulok a rehimeng US-GMA ken tapno lallalo pay a mapakapsut aginggana iti panakarippuog na.

Agbiag ti Gubat ti Umili!

Iyabante ti Armado a Rebolusyon!

Back to top