Ginpanhimua han NPA an ambus ha Alang-alang, ginsusnan an PNP ha paglambigit han Anakpawis

Jose Sumoroy
Spokesperson
Efren Martires Command
New People's Army-Eastern Visayas
Mayo 04, 2004

Para ha kumpirmasyon, kontaka:
Roy Santos, NDF-EV Media Liaison Officer
Cellphone No. 0918-3112138

Mahugot nga iginpapanhimua han New People's Army ha Siniranagn Bisayas an pag-ambus ha mga elemento han Philippine National police ha Alang-alang, Leyte ha kaagahon han Mayo 3. "Waray aksyon-militar an NPA ha Alang-alang hadto nga partikular nga petsa ngan lugar, sumala han kumpirmasyon han responsable nga yunit han NPA ha nasabi nga erya," sering ni Jose Sumuroy, tagapagyakan han Efren Martires Command (EMC).

Ginkastigar ni Sumuroy an PNP ha pagduon han responsibilidad hadto nga ambus ha mga NPA tungod la han presensya ha lugar han nahitabuan han mga poster ngan iba pa nga gamit ha pangampanya han Anakpawis, usa nga progresibo nga party-list group. " Naghahasog an PNP han kontra-komunista ngan pasista nga linya han National Security Adviser nga hi Norberto Gonzales ha paglambigit han Anakpawis ngan iba pa nga grupo hin progresibo nga party-list ngadto ha NPA," sering pa han tagapagyakan han EMC. "Ha pagpakahulugan nga an Anakpawis ngan NPA in pareho ngan usa la, gin-aaghat han PNP an pagpasakit ngan panmatay han reaksyunaryo nga estado ha mga diri-armado ngan waray kapas umato nga mga myembro han Anakpawis. Ha kamatuoran, an Anakpawis ngan iba pa nga progresibo nga party-list in diri kunektado ha NPA ngan ha armado nga pakig-away kundi mamurayaw nga nakikipag-kumpetensya para ha kongreso ha Mayo 10 nga eleksyon."

Gindugang pa niya nga diri urusahon nga mahiagian han PNP an mga materyales ha pagkampanya han Anakpawis "tungod kay an grupo han progresibo nga party-list in duro ka popular ha masa, asya nga an ira mga poster in mahiaagian ha bug-os nga rehiyon." Gindig-unan ni Sumuroy nga an PNP in nakikiuyon la han kanan AFP maglara nga maitom nga propaganda ngan tinagdamo nga mga bayolente nga pag-atake ha rehiyon ngan ha bug-os nga nasud kontra ha mga progresibo nga party-list sugad han Anakpawis, Bayan Muna, Gabriela Women's Party ngan Anak ng Bayan.

"An mga kontra-Bayan Muna nga mga islogan in makikita ha bug-os nga Catbalogan, Samar, kun diin aadto an headquarters han 8th Infantry Division," pagtudlok pa ni Sumuroy. Han naglabay nga Abril 13, nag-atentar liwat pag-reyd an mga elemento han AFP ngan PNP ngan padayon nga nag-harass han headquarters han Bayan Muna ha Catarman, Northern Samar. Ngan bangin naton hingalimtan, an mga miyembro han Bayan Muna nga hira Rolando Fortaliza ngan Jacqueline Paguntalan in padayon nga waray kahiaagii kahuman han pagsikmita ha ira ha Baybay, Leyte han mga ahente han AFP intellegence hadton Pebrero 21." 5

Back to top