Ang "Kusganong Republika" ni Gloria Macapagal-Arroyo paspas nga nabungkag gikan sa sulod.
National Democratic Front of the Philippines (NDFP)
Hulyo 27, 2003
Ang mga batan-ong opisyales ug sundalo sa Armed Forces of the Philippines nga nakakita mismo sa sulabing korapsyon sulod sa gobyerno ug asa taman mosangpot si Arroyo ug iyang mga kakunsabo aron magpabilin sa gahum, naglunsad og aksyong militar aron ihingusog ang pagluwat nila Arroyo ug Defense Secretary Angelo Reyes.
Ang mga rebeldeng militar, nga naglangkob sa mga gradweyt sa PMA niadtong 1995-2001 mao ang nagbutyag nga si Reyes mismo ug si AFP Intelligence Chief Victor Corpus ang tigpaluyo sa pagpamomba sa Davao City sa sayong bahin niining tuiga.
Wala makugang ang National Democratic Front of the Philippines sa niining mga pagbutyag. Naanad na kami nga ang AFP ug Philippine National Police maoy nagbuhat og mga teroristang aksyon ug gipasangil kini diha sa mga rebolusyonaryong pwersa aron mahataga'g rason ang pagpamig-ot.
Wala usab kami mahibulong sa aksyon nga gibuhat sa nagmulo nga mga opisyales ug sundalo. Produkto kini sa anti-katawhan, dili demokratiko ug dunot nga organisasyong militar kundiin ang mga yanong sundalo ug nahaubos nga mga opisyales gigamit nga pangbala sa kanyon. Samtang ang mga heneral ug uban pang kadagkoang opisyal-militar nagpakatagbaw sa luho ug kikbak ingon man sa ginansya gikan sa mga kriminal nga aktibidad sama sa pamatigayon sa iligal nga druga ug pagpangidnap, ang mga yanong sundalo nangamatay sa nataran sa pakigsangka-ug para asa? Sa pinudyot ug dilatar nga mga sweldo ug benepisyo, pagpanalipod sa usa ka korap ug dunot nga rehimen.
Alang sa iyang kaugalingong kasundalohan-nga na-indoktrinisa sulod sa daghang katuigan nga mosunod sa chain of command ug manalipod sa nagtunhay nga sistema (status quo)-ang pagsalikway kaniya timaan sa grabing pagkahimulag sa rehimeng Arroyo.
Kining pagkahimulag gihimugso sa nagkasamot nga sosyo-ekonomikanhong kahimtang bunga sa padayon nga pagpangalyupo sa rehimen diha sa mga langyaw'ng monopolyong interes; kuyanap nga korapsyon; nagkagrabing interbensyong militar sa US nga naglapas sa soberanya ug teritoryal nga integridad sa Pilipinas; ug nagkasamot nga mga kampanyang terorista aron sumpuon ang nagkakusog nga kalihukang masa sa nasud.
Ang hulagway sa usa ka "Kusganong Republika" nga maampingong gimugna sa rehimen hingpit ug dili na mamidyusan nga nagupok, ug nabutyag nga walay unod kundili haw-ang nga mga pulong ug pangatik ngadto sa publiko.
Ang tubag niini sa krisis-ang pagdeklarar og state of rebellion-dili makasulbad sa kagil-as sulod sa militar ug nagsalamin sa mabaw ug militaristang panghunahuna nga nangibabaw sa rehimen.
Samtang, aron mapasibaw ang mga lehitimong mulo ug mahimong epektibo ang ilang pagsupak, ang mga batan-ong opisyales ug kasundalohan angay'ng magkatambayayongay sa mabagang masa sa katawhan. Angay usab sila nga maigmaton sa paggamit kanila sa mga reaksyonaryong politiko alang sa ilang kaugalingong mga laraw ug ambisyon.
Nanawagan ang NDFP sa tanang rebolusyonaryong pwersa nga pakusgon ang pakigbisog batok sa pundok Arroyo-Reyes nga responsable sa krisis. Panahon na nga tapuson kining rehimena nga walay laing gihatag kundili kaalaot ug pagpanglupig sa atong katawhan. ###
Back to top
| 