Paspas nga nagkarumpag an kan Gloria Macapagal-Arroyo nga �Madig-on nga Republika�.

National Democratic Front of the Philippines (NDFP)
Hulyo 27, 2003

Naglansar hin usa nga aksyon militar ha pagdemanda ha pagpaparesayn kan Arroyo ngan Defense Secretary Angelo Reyes an mga batan-on nga opisyal ngan sundalo han Armado nga Pwersa han Pilipinas nga personal nga nakakakita han grabi nga kurapsyon sakob han gubyerno ngan tubtob diin an pagkapot ni Arroyo ngan han iya mga kakunsabo ha poder.

Ginbuksas mismo han mga rebelde militar, nga gin-updan han mga gradwado han PMA ha tuig 1995 tubtob 2001, nga hi Reyes ngan AFP Intelligence Chief Victor Corpuz mismo an mastermind han mga pambobomba ha Davao City temprano hini nga tuig.

Waray mapapausa an National Democratic Front of the Philippines hini nga mga ginbubuksas. Nahigara na kami han mga pagkokomiter han AFP ngan Philippine National Police hin mga terorista nga aksyon ngan pagpapasangil hini ha mga rebolusyonaryo nga pwersa para tagan-rason an pamumuypoy.

Waray liwat kami mapapausa ha ginhimo nga aksyon han mga nangangalas nga opisyal nga sundalo. Produkto ini han anti-katawhan, di-demokratiko ngan kurap nga organisasyon militar kun diin gin-gagamit nga pambala ha kanyon an mga ordinaryo nga sundalo ngan nakakaubos nga opisyal. Samtang an mga heneral ngan iba nga higtaas nga opisyal naglunay ha luho ngan kickback sugadman ha ganansya tikang ha mga kriminal nga aktibidad sugad han negosyo ha iligal nga druga ngan kidnapping, nagkamatay an ordinaryo nga mga sundalo ha pag-awayan - ngan para ha ano? Gigugutii ngan atrasado nga mga sweldo ngan benepisyo, pagdepensa ha usa nga kurap ngan dunot nga rehimen.

Nga igsalikway hiya han iya kalugaringon nga mga sundalo - tinutduan ha pira katuig nga sundon an chain of command ngan depensahan an status quo - pangilal-an han grabi nga kahimulag han rehimen Arroyo.

Ini nga kahimulag in dara han tikagrabi nga sosyoekonomiko nga mga kundisyon tungod ha nagpapadayon nga pagpapauripon han rehimen ha langyaw nga monopolyo nga mga interes; samwak nga kurapsyon; tikahitaas nga interbensyon militar han US ha pagtalapas han soberanya ngan teritoryal nga integridad han Pilipinas; pinaduro nga mga kampanya han terorismo ha pagpuypoy ha nag-uursa nga kagiusan masa ha nasud.

Hul-os ngan waray na paglaum nga narumok an ladawan han �Madig-on nga Republika� nga ginhinirotan han rehimen. Iginpakita hini nga waray ini iba kundi buaw nga mga pulong ngan palabas ha publiko.

An baton hini ha krisis - pagdeklarar hin state of rebellion - diri makakasulbar han kabantad sakob han militar ngan nag-eespiho ha haligot, militarista nga panhunahuna nga nagdominar ha rehimen.

Samtang, para mapalandaw an ira lehitimo nga mga araba ngan para mas magigin epektibo an ira pagtipa, kinahanglan makikig-urosa an mga batan-on nga opisyal ngan sundalo ha hiluag nga masa han katawhan. Kinahanglan liwat hira nga magmabinantayon kontra ha pagkakagamit ha ira han reaksyunaryo nga mga pulitiko para ha ira kalugaringon nga mga larang ngan ambisyon.

Nananawagan an NDFP ha ngatanan nga mga rebolusyonaryo nga pwersa nga pasik-onon an pakigbisog kontra ha barkadahan nga Arroyo-Reyes nga asya an responsable ha krisis. Panahon na nga tapuson ini nga rehimen nga waray iba nga gindara kundi kakurian ngan pananalumpigos ha aton katawhan.###