Ang demokrasya sulod sa BHB ug ang kawala niini sulod sa AFP

Prof. Jose Ma. Sison
National Democratic Front of the Philippines
Chief Political Consultant
Agosto 16, 2003

Sukad niadtong Hulyo 27, 2003, gatusan ka mga opisyales ug yanong kasundalohan, nga nagpaila nga grupong Magdalo, ang dramatikong nagpadayag sa ilang dugay nang nagpuut nga mga mulo batok sa ilang commander-in-chief nga si Gloria Macapagal-Arroyo, Sekretaryo sa Depensa nga si Angelo Reyes ug pila ka kadagkoang opisyales sa Armed Forces of the Philippines (AFP).

Nagreklamo sila batok sa korapsyon sa ilang mga kadagkoan, lakip ang pagpalobo sa presyo sa mga ekwipo, pribadong paggamit sa mga eroplano ug sakyanang militar ug panwitik diha sa suplay sa mga sundalo. Nagmulo usab sila batok sa paggamit og mga teroristang pagpamomba aron mahulagway nga satanas ang Moro Islamic Liberation Front, maandam ang dalan alang sa dugang interbensyong militar ug kahimanang suporta sa US ug kahataga'g katarungan ang deklarasyon sa balaud militar.

Mga mulo ug kawala'y demokrasya sulod sa AFP

Seryosong gidawat nako ang mga mulo sa grupong Magdalo. Wala ako mahipugwat sa kalisang nga gihulhog sa rehimeng Macapagal-Arroyo ug pila ka pundok sa masmidya nga ang grupong Magdalo hapit nakalunsad og malampusong kudeta-militar nga mibunga unta sa dili mabanabana nga kaalaotan ngadto sa katawhan, kundili pa sa kamaigmaton, kamaantigo ug kalig-on diha sa mga anaa sa gahum.

Sa Domingo pa lamang, Hulyo 27 sa Oakwood, ang giingong "manakmitay og gahum", "putsista", "mangalsahay" ug "mga adbenturistang militar" nalimitahan na lamang ngadto sa usa ka aksyong protesta. Nawad-an na sila og paglaom tungod kay sukad pa sa Huwebes, Hulyo 24, aduna nay kutay nga mga aksyong pananta ug panghagit batok kanila sa rehimen nga labaw'ng mapasigarbohong nagproklamar sa kaugalingon isip benepisyaryo sa kudeta-militar kaysa ilhon ang nahimong papel sa kalihukang masa sa pagpalagpot kang Estrada niadtong 2001.

Ang labaw pang makapahulga sa kasamtangang rehimen ug sa mosunod niini mao ang kahitak sa korapsyon, ang praktika sa terorismo sa estado ug ang pagpakalimos sa mga kadagkoang opisyales sa AFP diha sa US. Tanan niining kondisyones nag-aghat sa nahaubos nga mga opisyales ug yanong kasundalohan nga mo-alsa taliwala sa dyutay man lamang nga pagbati sa patriyotismo ug kahingawa sa interes sa publiko. Dili ako matingala kung sa dili madugay malunsad ang tinuod nga pagsulay'ng kudeta, nga direkta na sama sa naghaguros nga pana.

Gawas sa grupong Magdalo, aduna pay daghang aktibong sikreto nga mga grupo sa mga nagyugot nga opisyales ug yanong sundalo sulod sa AFP. Anaa kadtong mga grupong walay laing nahibaloan kundili ang paghimo og kudeta aron magtukod og "banana republic" nga nahikot sa US. Anaa usab kadtong gihukot ang ilang kaugalingon sa mga reaksyonaryong politiko ug nagdahom og mga reporma o konsesyon gikan kanila. Ug aduna pay uban nga nakombinsi nga makigkoordina sa nasudnon-demokratikong kalihukan.

Mas paspas ang pagkadunot sa establisimentong militar kaysa tibuok nagharing sistema. Ang pinakatag-as nga mga opisyales sa departamento sa depensa ug pinakatag-as nga opisyales sa AFP nagdawatan og suborno diha sa pagpalit sa mga lokal ug langyaw nga suplay ug nagpadagan usab og mga kriminal nga sindikato sa ismagling, iligal nga pagpang-logging, druga, sugal ug prostitusyon ug uban pa. Gipagawal nila ang ilang mga kinawat nga bahandi pinaagi sa pagtukod og mga building ug pag-angkon og mga mansyon nga lapas kaayo sa ilang opisyal nga kinitaan.

Ang mangilngig nga kalimbongan sa ilang mga superyor mao ang mitukmod sa nagyugot nga mga opisyales ug yanong sundalo nga maglunsad sa dramatikong aksyong protesta niadtong Hulyo 27. Ang kakulang sa demokrasya sa AFP mitugot sa pinakakurakot ug pinakamangtas nga mga opisyal nga hurawon ang ilang mga ginsakpan ug pugngan kini nga mopadayag. Apan ang kasuko sa mga dinaugdaog ug pinahimuslan natigum ug sa ngadto-ngadto mibuto.

Walay demokrasyang maundanon nga motunhay sa AFP tungod kay mao kini ang mapitolon nga instrumento sa mga mapahimuslanong hut-ong sa dagkong komprador ug agalong yutaan. Kahimanan usab kini sa langyaw'ng gahum, ang imperyalismong US. Kusganon kining misupak sa nasudnon ug demokratikong katungod ug interes sa katawhan. Bisan lamang sa hisgutanan sa pamaagi, ang kasamtangang mekanismo sa pagpadangat og mulo sulod sa AFP dili magtugot og demokrasya. Ang pagkamanunuton diha sa US ug mga lokal nga mapahimuslanong hut-ong hanoy lang nga matransporma ngadto sa pagkamasulondon diha sa mga dunot ug mangtas nga opisyal.

Demokrasya sulod sa BHB

Lambo ang demokrasya sulod sa Bagong Hukbong Bayan (BHB), luyo sa limitadong kahinguhaan niini ug sa dakong gimbuhaton niini sa pag-atubang sa kaaway. Una sa tanan, nakigbisog kini alang sa rebolusyonaryong kawsa sa katawhan. Mao kini ang instrumento sa armadong rebolusyon aron makab-ot ang nasudnong kagawasan ug demokrasya. Ang mga Pulang komander ug manggugubat nagsakripisyo alang sa pag-alagad sa katawhan.

Ang palisiya alang sa politikanhong gimbuhaton sa BHB sa kinatibuk-an mao ang pagpukaw sa masang kasundalohan niini, sa tanang komander ug tanang naglihuk nga personel aron makab-ot pinaagi sa demokratikong kalihukan ubos sa sentralisadong pagpangulo, ang tulo ka nag-una nga tumong nga mao ang taas nga ang-ang sa pangpolitikang panaghiusa, pagpalambo sa kahimtang sa panginabuhi ug mas taas nga ang-ang sa mga teknika ug taktikang militar.

Mahitungod sa demokrasya sa politika, ang mga opisyal ug yanong personel sa BHB adunay katungod nga gawasnong maghisgot sa mga prinsipyo, palisiya ug linya sa bag-ong demokratikong rebolusyon. Ang mga nahaubos nga opisyal ug ginsakpan adunay katungod nga mosaway sa mga nahataas nga opisyal ug mga kadre sa mga pagtuon ug mga tigum aron magtul-id sa mga kasaypanan ug kakulangan ug ipalambo ang paglihuk ug estilo sa paglihuk.

Mahitungod sa demokrasya sa ekonomiya, ang mga gipiling representante sa mga sundalo adunay katungdanan nga motabang sa nangulo sa yunit sa pagdumala sa mga suplay ug makaon ug katungod nga tukion ang mga kwentada kung adunay mangutana o moreklamo nga bisan kinsang sundalo. Walay paagi ang mga opisyal sa BHB nga makapanikas sa mga suplay.

Mahitungod sa demokrasya-militar, sa panahon sa pagbansay-bansay magtinudloay sa isi'g usa ang mga opisyal ug sundalo ug sa han-ay mismo sa kasundalohan; ug sa panahon sa panagsangka, ang mga yunit sa nataran kinahanglan maglunsad og nagkadaiyang mga tigum. Ubos sa direksyon sa pangulohan sa yunit, ang masang kasundalohan gi-aghat nga mohisgot unsay mga pamaagi sa pag-ataki ug pag-ilog sa mga posisyon sa kaaway ug unsaon pagpatuman sa uban pang mga tahas pangkombat.

Demokratikong kalihukan sulod sa AFP?

Ang mga kadre nga buot mopatuman og rebolusyonaryong gimbuhaton sulod sa reaksyonaryong armadong pwersa mahimong magiyahan sa mga demokratikong sukdanan sa BHB. Mahimo silang magpasiugda og usa ka matang sa demokratikong kalihukan nga makatarunganon ug madawat sa mga kadete militar, mga reserbang opisyal ug mga aktibong opisyal ug yanong kasundalohan. Kining demokratikong kalihukan mahimong ipunting ngadto sa pagbutyag sa pro-imperyalista ug reaksyonaryong kinaiya sa armadong pwersa, nga mosangpot sa ilang pagkabungkag ug makapahapsay sa pagtumaw sa usa ka bag-o ug makatarunganon nga katilingbanong kahusay.

Ang mga kadre makapasiugda og demokrasya sa politika pinaagi sa paglunsad og nagkadaiyang dagway sa edukasyon sa bag-ong demokratikong rebolusyon batok sa US ug sa mga mapahimuslanong hut-ong. Makatukod sila og mga patriyotiko ug progresibong kapunongan nga adunay ligal nga mga tumong diha sa han-ay sa mga kadete ug mga aktibong opisyal ug yanong kasundalohan. Atubangan sa posibleng pagpamig-ot, mahimo sila magtukod og mga sikretong grupo.

Makapasiugda sila og demokrasya sa ekonomiya pinaagi sa pagpili og mga komite sa kasundalohan aron molantaw sa pagkuha ug modumala sa mga suplay ug makaon ug mosuta sa mga kwentada ug istak ugaling anaay mangutana o moreklamo nga bisan si kinsamang sundalo. Mahimo nilang ihingusog ang katungod sa pagtukod og mga unyon sa kasundalohan aron manalipod ug mopauswag sa ilang pang-ekonomiya ug katilingbanong katungod ug interes ug aron mapugngan o mawad-a'g kadasig ang korapsyon ug pagpangawat sa mga benepisyo sa pagritayr, pagpahawa ug pagkamatay sa mga sundalo.

Mahimo nilang mapasiugda ang pagptuman sa internasyonal nga balaud mahitungod sa tawhanong katungod ug tawhanong kondukta sa gubat ug sa GRP-NDFP Comprehensive Agreement on Respect for Human Rights and International Humanitarian Law. Samtang anaa pa sila sa reaksyonaryong hukbo, ang mga kaaway nga opisyal ug yanong kasundalohan gi-obligar gihapon sa ilang mga agalon nga makig-away sa BHB ug sa katawhan. Apan ang mga rebolusyonaryong kadre sulod sa reaksyonaryong hukbo mahimo palumoyon ang pagbuhat nila og terorismo sa estado ug aghaton sila nga modapig sa katawhan.

Dili tinuod nga walay pulos ug walay kapadulngan ang paglihuk sa mga kadre sa nasudnon-demokratikong kalihukan sulod sa reaksyonaryong hukbo. Ang kadaghanang sundalo dinhi naggikan sa naghagong masa sa mga mamumuo ug mag-uuma. Sa ingon, mahimo sila nga positibong motubag sa panawagan alang sa bag-ong demokratikong rebolusyon. Bisan ang mga opisyal nga kasagaran naggikan sa hut-ong petiburgesya mahimong madani nga mo-anib sa rebolusyonaryong dapig sa katawhan sa mga mahukmanon kaayong higayon.

Ang NDFP mibarog nga ang negosasyong kalinaw niini sa GRP mahimong pamaagi aron ang minilyon-milyon nga katawhang Pilipino ug bisan ang mga personel nga burukratiko ug militar sa GRP paspas nga makat-on sa unod sa programa alang sa demokratikong rebolusyon sa katawhan ug palandongon unsaon pagkab-ot sa makatarunganon ug malanatong kalinaw.

Apan ang susama nila Gloria Macapagal-Arroyo ug Angelo Reyes nagbasura sa negosasyong kalinaw sa GRP-NDFP tungod kay sa ilang pagtuo, mahawanan nila ang dalan alang sa mas dako ug kusog nga interbensyong militar ug hinabang pinansyal sa US ubos sa pasumangil nga anti-terorismo pinaagi sa paglunsad og larga-tudong gubat batok sa rebolusyonaryong pwersa ug katawhan ug sa pagpamomba ngadto sa mga sibilyan. Gibanabana nila nga kini mao ang makapalungtad sa ilang gahum ug makahatag-higayon kanila nga mas makapaadunahan pinaagi sa korapsyon.

Sa proseso, si Arroyo ug Reyes nagpaburot og gasto sa pagpalit og mga kahimanang militar ug uban pang mga suplay nga nahitak sa kurakot ug sa ingon, gipalobo nila ang depisit sa badyet. Giinat nila pag-ayo ug gilam-an paghago ang ilang armadong pwersa ug gibahog nila ang mga opisyal ug yanong kasundalohan sa nataran diha sa mas maalaoton ug mas makamamatay nga kahimtang. Bunga niini, nagkadaghan ang mga opisyal ug yanong sundalo nga nanagmulo ug nag-alsa.

Ang sosyo-ekonomikanhon, politikanhon ug moral nga pagkabangrap sa semikolonyal ug semipyudal nga nagharing sistema nagkasamot na sa punto nga dili na makapahimulos ug makapanaugdaog ang reaksyonaryong estado kundili niini pahaiton ang pagpanaugdaog ug pagpahimulos sa mismong mga personel sa mapitulong mga instrumento. Nagkasamot ang krisis sa nagharing sistema sa matag adlaw ug giduso niini ang pagkabungkag sa estado. Nagkakusog ang mga suhetibong pwersa sa rebolusyon sa kasamtangang sirkunstansya. #

Back to top