Ang minandoan sa U.S. nga magkasagabay nga GMA-Reyes nagbabag sa pormal nga panaghisgot sa GRP-NDFP

Prof. Jose Ma. Sison
National Democratic Front of the Philippines
Chief Political Consultant
Hulyo 30, 2003

Taman nga si Presidente Gloria Macapagal-Arroyo ug Secretary of National Defense Angelo Reyes nagkahiusa isip lunud-patay'ng mga itoy sa US, padayon nilang babagan ang subling pagbukas sa pormal nga panaghisgot sa negosasyong kalinaw tali sa Gobyerno sa Republika sa Pilipinas (GRP) ug National Democratic Front of the Philippines (NDFP).

Ang ilang atik-atik sa pagsanta sa negosasyong kalinaw mao ang pagpanginsulto ug pagpanghagit sa NDFP pinaagi sa inutro-otrong pagbungat niini nga mosurender o kaha motagamtam sa pinakangilngig nga mga kampanyang militar. Ang pamaagi sa pagsurender nga gitanyag mao ang pagpirma gilayon sa usa ka "final peace agreement" nga makausa-ka-bahin nga gihimo sa GRP. Ang pinakangilngig nga mga kampanyang militar nalunsad na ubos sa pasumangil sa gubat batok sa terorismo ug gisustinir sa interbensyong militar sa US ug gipadakong suplay-militar gikan sa Pentagon.

Ubos sa direksyon sa US, gibuhian ni Reyes ang dinagkong mga kampanyang militar batok sa 12 ka piniling natarang gerilya sa Bagong Hukbong Bayan (BHB) sukad niadtong 2001. Kining mga kampanyahang militar napakyas nga hurawon ang rebolusyonaryong kalihukan. Inay, nagkakusog ug nagaasdang ang BHB. Ang mga estratehistang militar sa GRP hadlok nga nagtagna nga ang BHB makapuo sa nagkadaghang reaksyonaryong armadong pwersa kun makabuylo na ang mga regional strike unit sa BHB ug magamit na ang puloan nga mga natarang gerilya isip panukaranan sa mga taktikal nga opensiba.

Ingon pa man, ang nag-unang interes sa US mao ang pagbasura sa negosasyong kalinaw sa GRP-NDFP tungod kay buot niining pakusgon ang interbensyong militar niini, padak-on pa ang imprastraktura alang sa mga pwersang militar niini, moabanti gikan sa pagbaton og access rights ngadto sa pagbaton og katungod sa pagbase ug busa pakusgon ang Pilipinas isip base (reinforced base) alang sa agresyong US sa East Asia.

Kalambigit niini, ang US maoy nagpaluyo sa pagduso sa pag-amenda sa 1987 konstitusyon sa GRP aron mosakar ang bill of rights niini sa US Patriot Act, buhian ang terorismo sa estado ug tangtangon ang mga probisyon nga naggikan sa Miranda doctrine ug ingon man kadtong mga restriksyon sa pagdeklarar og balaud militar, ibasura ang mga probisyon sa ekonomikanhong soberanya ug nasudnong patrimonya ug tangtangon ang mga nasudnong restriksyon sa langyaw'ng pamuhunan ingon man sa mga probisyon nga nagdili sa mga langyaw'ng base militar, langyaw'ng tropa ug nukleyar ug uban pang weapons of mass destruction.

Salamat sa pagbutyag nga gihimo sa Hulyo 27 nga aksyong protesta sa 300 ka mga sundalo lakip ang 70 ka mga opisyales, nasayran nato nga si Gen. Angelo Reyes mao ang sistematikong nagmugna og teroristang kahimtang sa Mindanao ug nagdaot sa negosasyong kalinaw tali sa GRP ug Moro Islamic Liberation Front (MILF) pinaagi sa pagpaluyo sa teroristang pagpamomba gawas pa sa pagmando sa dili makatarunganong pagpangataki ngadto sa MILF sa Buliok complex niadtong Pebrero.

Gipahugno ni Macapagal-Arroyo ang ekonomiya sa Pilipinas pinaagi sa pagsunod sa linya sa US nga globalisasyon sa "gawasnong merkado." Apan gihanduraw gihapon niya nga mapalabong niya ang ekonomikanhon ug katilingbanong kahimtang sa katawhan ug hurawon ang mga nanupak sa iyang dunot nga mga palisiya pinaagi sa mahinangupon nga pagdawat sa interbensyong militar sa US ug gipadakong suplay-militar alang sa iyang armadong pwersa. Busa, halos gitugyan na niya kang General Reyes ang gahum sa presidente sa mga hisgutanang gidala sa Cabinet Oversight Committee.

Kinahanglan nga mahibaw-an sa publiko nga ang NDFP kanunay'ng andam nga subling makignegosasyon-kalinaw sa GRP nahasubay sa The Hague Joint Declaration of 1992 ug misunod nga mga kasabutan. Sa wa damha intawon, ang magkasagabay nga Arroyo-Reyes nga gidirektahan sa US nagbabag sa negosasyong kalinaw. Basin hulaton na lamang sa NDFP ang bag-o nga presidente, kundili tangtangon ni Arroyo si Reyes ug usbon ang iyang palisiya mahitungod sa negosasyong kalinaw tali sa GRP-NDFP. ###

Back to top