Aksyong protesta sa gatusan ka mga sundalo nagbutyag sa kadunot sa rehimeng US-Arroyo

Prof. Jose Ma. Sison
National Democratic Front of the Philippines
Chief Political Consultant
Hulyo 28, 2003

Ang Hulyo 27, 2003 nga aksyong protesta sa hapit 300 ka mga sundalo sa reaksyonaryong gobyerno, lakip ang 70 ka mga opisyales gikan sa army ug navy, epektibong nakabutyag gikan sa sulod sa kadunot sa gimandoan sa US nga rehimeng Arroyo sa tin-aw kaayong pamaagi.

Ang mga mulo sa mga sundalo naglanog dili lamang sa tibuok Pilipinas kundili sa tibuok kalibutan. Lig-on ang kapasikaran niini. Dili kini angay'ng palubogon pinaagi sa mga balos-ataki gikan sa rehimen. Naghatag kini sa mga sundalo og makatarunganong hinungdan aron ihingusog ang pagluwat nila Presidente Arroyo ug sa Defense Secretary nga si Gen. Angelo Reyes.

Ang mga mulo naglangkob sa korapsyon sa rehimen kundiin kalambigit ang naingong kadagkoang opisyales taliwala sa kaalaotan sa mga nahaubos nga mga opisyales ug mga yanong sundalo ug sa teroristang pagpamomba nga gipaluyohan ni General Reyes ug iyang tuong-kamot nga si Gen. Victor Corpus sa Mindanao aron kahataga'g dalan ang interbensyong militar sa US, gipadaghang suplay-militar gikan sa Pentagon ug ang deklarasyon sa balaud militar sa Agosto.

Ang kunohay'ng pagbaligya sa rehimen og mga armas ngadto sa Bagong Hukbong Bayan ang bugtong mulo nga wala gidawat ni Ka Roger Rosal, tigpam�b� sa Partido Komunista sa Pilipinas, sa usa ka pamahayag sa midya. Giduso niya nga relatibong pipila ka mga armas lamang ang gibaligya sa pila ka opisyal ug sundalo diha sa BHB. Apan gideklara niya nga ang BHB nakaangkon sa kadaghanang armas niini gikan sa AFP pinaagi sa pagsakmit niini sa mga taktikal nga opensiba.

Determinado ang rehimeng US-Arroyo nga kamenosan ug dauta'g dungog ang mga nagprotestang kasundalohan isip mga rebeldeng buot luwason ang kalibutan (messianic mutineers) ug mga walay-buot nga instrumento sa mga kaaway sa politika sa rehimen. Sa akong pagtan-aw, ang pinakamahinungdanon sa tanan, mao ang pag-ila sa kamatuoran nga ang rehimen nahimong hilabihan ka dunot ug himulag nga bisan ang mga kaugalingong opisyales ug sundalo nag-alsa na batok niini.

Ang gatusan nga nangahas nga nagprotesta sa publiko nagpakita sa mga mulo sa linibo-libo nga mga sundalo sa reaksyonaryong armadong pwersa. Sa umaabot nga panahon, adunay mga pagbusikad og mga mulo ug managkakuyog nga mga protesta sa mga sundalo. Tabunok kaayo ang yuta. Hinanaling tahas sa mga patriyotiko ug progresibong kadre nga maglunsad og rebolusyonaryong gimbuhtaon sulod sa reaksyonaryong hukbo.

Sama sa gihimo sa mga Bolshevik sa czarist nga hukbo, ang mga rebolusyonaryong kadre mahimong modani sa mga sundalo sa reaksyonaryong hukbo nga mobalhin sa dapig sa katawhan ug busa mahimong bungkagon ang reaksyonaryong hukbo aron paspasan ang kadaugan sa rebolusyon. Ugani, ang mga yanong sundalo sa reaksyonaryong hukbo maoy nag-unang girekrut sa nag-ilaid nga mga mamumuo ug mag-uuma.

Dyutay kaayo ang mitubag sa panawagan ni Cardinal Sin sa katawhan nga moanha sa Edsa shrine ug panalipdan ang nangalisbo nga rehimeng Arroyo. Ingon usab, ang mapatuyangon sa kaugalingon nga mga kaaway sa politika sa rehimen makahatag lamang og pudyot nga mga tawo aron suportahan ang mga nagprotestang sundalo. Tin-aw nga bugtong ang makatarunganong kawsa nga nakakab-ot un� sa suporta sa nasudnon-demokratikong kalihukan ang makapukaw sa mabagang masa sa katawhan ngadto sa taas nga ang-ang sa komitment ug militansya.

Ang aksyong protesta sa mga sundalo sa reaksyonaryong armadong pwersa nahitabo sa disperas sa kunohay'ng state of the nation address ni Presidente Arroyo. Usa kini ka dakong angayang silot kaniya. Importante alang sa nasudnon-demokratikong kalihukan nga gipangulohan sa BAYAN nga ipahibalo sa tanang katawhan ug tanang anaa sa reaksyonaryong gobyerno nga atubangon ang kamatuoran--ang taho sa BAYAN mahitungod sa tinuod nga kahimtang sa nasud itandi sa mga binutbot ni Arroyo.

Masaligon ako nga tin-aw nga ibutyag sa BAYAN ang pagka-itoy, naghingapin nga dagway sa pagpahimulos, korapsyon ug kabangis sa rehimen ug ihingusog ang mga batakang reporma ug pundamental nga mga pagbag-o nga kinahanglan aron tapuson ang neokolonyal nga paghari sa kabangis ug kahakogan sa Pilipinas. Mahimong imposible na karon kang Gloria Macapagal-Arroyo nga manangpit og ilusyon sa kusganong republika taliwala sa mga negrebeldeng tropa sa kaugalingon niyang hukbo ug sa katawhang nabuhi sa kagutom ug kaalaotan. ###

Back to top