Lab-as nga mga hitabo mahitungod sa imperyalismo, gubat ug pakigbisog sa katawhan

Prof. Jose Ma. Sison
National Democratic Front of the Philippines
Chief Political Consultant
Marso 03, 2003

Mga kaabag ug kahigalaan,

Nalipay ko'g maayo nga gihangyoan ko og usa ka update mahitungod sa krisis sa imperyalismo, sa paghandus og gubat sa US ug sa kapadulngan sa pakigbisog sa katawhan.

I. Ang kasamtangang krisis sa imperyalismo

Ang nag-una ug esensyal nga katuyoan sa globalisasyon sa "gawasnong merkado," mao ang paghatag-katakus sa monopolyong burgesya aron makamaksimisa og ganansya pinaagi sa pagpahimulos sa mga mamumuo sa managsamang imperyalista ug neokolonyal nga mga kanasuran ug kunhora'g maayo ang dili pirmidong kapital nga gigasto alang sa suholan ingon man sa katilingbanong pamuhunan ug katilingbanong serbisyo sa mga estado.

Sa tibuok kalibutan, ang mga kontrolado sa US nga mga multilateral nga ahensya sama sa IMF, World Bank ug WTO, direkta ug dili direkta nga namig-ot diha sa mga estado aron abandonahon na ang mga katilingbanong responsibilidad o pagtakuban alang sa mga mamumuo ug magpasiugda sa palisiya sa liberalisasyon, praybitisasyon ug deregulasyon aron distrungkahon ang nasudnon, katilingbanon ug environmental nga mga babag para pasagdan ang pagpangibabaw sa kahakogan sa mga monopolyong kompanya ubos sa islogan sa laissez faire (walay pagpanginlabot sa gobyerno sa pagpadagan sa mga negosyo).

Busa, ang pagduso sa palisiya sa globalisasyon sa "gawasnong merkado" nakadali sa akumulasyon ug konsentrasyon sa produktibo ug pinansyal nga kapital sa kamot sa monopolyong burgesya sa pipila ka imperyalistang kanasuran, nag-una na ang US. Apan ang dili kalikayan nga resulta mao ang pagkuyos sa kita ug katakus-sa-pagpalit (purchasing power) sa mga mamumuo sa entero kalibutan, ilabina sa Ikatulong Kalibutan ug sa mga nag-unlod nga mga kanasuran nga kanhing giharian sa mga rebisyonistang pundok.

Paspas nga miginta ang kita tali sa mga adunahan ug kabus. Ang pinakaadunahan nga 20% sa kalibutan naghakop sa kapin 85% sa kita. Ang tulo ka pinakaadunahang mga tawo sa kalibutan, adunay gitapo nga bahandi nga mas dako pa sa gitapo nga gross national product (GNP) sa 48 nga pinakakabus nga kanasuran nga anaay gitapong populasyon nga 600 ka milyon. Ang mayorya sa sangkatauhan, nagpakapaigo na lamang sa mokubos sa US$2.00 matag adlaw, o 1.2 ka bilyong tawo nga nagpakapaigo na lamang sa mokubos sa US$1.00 matag adlaw.

Sa kaugalingon niining pag-andar, napamatud-an pag-usab nga ang imperyalismo o monopolyong kapitalismo mao ang pinakataas ug ulahing yugto sa kapitalismo ug nagting� ug dun�t na kini. Naotro-otro nga nabutyag ang lungtad nga krisis sa monopolyong kapitalismo nga gibunga sa pagpahimulos sa mga nanag-iya sa kapital diha sa mga mamumuo. Ang paggamit sa mas taas nga teknolohiya alang sa komersyal nga produksyon ug ang gipapaspas nga akumulasyon sa produktibo ug pinansyal nga kapital kalambigit sa bag-ong teknolohiya, nagdasok sa pundong panuhol ug sa sangputanan, nagpahiyos sa merkado.

Makapahikugang ang krisis sa produksyon ug pinansyal nga pagkahugno ug padayon ang pagsamot niini matag tuig sukad niadtong 2000, dihang nagsugod ang pagtidlum sa stock market (merkado sa mga sapi) niadtong Marso ug midaus-os usab ang industriyal nga produksyon sa US niadtong Oktubre. Sulod sa tulo ka tuig lamang, nahanaw ang US$8 ka trilyong balor sa stocks sa inanay'ng matang sa pagkahugno. Ang pagkabangkrap sa mga industriya nagbutyag usab sa dinagkong mga panikas sa pagpangutang sa bangko ug transaksyon sa stocks (Enron, WorldCom, Global Crossing, Lucent, Adelphia, Xerox ug K-Mart). Ang paspas nga pagdaus-os sa ekonomiya sa US maoy nagpasamot sa krisis sa pangkalibutang sistemang kapitalista. Ang pagkabangkrap sa mga industriya ug ang dinaghang tinangtangay sa trabaho mikuyanap sa pangkalibutang linangkuban ug miresulta sa paspas nga paglobo sa kawalay trabaho. Dili mokubos sa ikatulo ka bahin sa tulo ka bilyong kusog pamuo sa kalibutan ang walay trabaho o kaha hilabihan-pagkakulang sa trabaho.

Nawala na ang mga propagandista sa monopolyong kapitalismo nga nanghambog nga ang "bag-ong ekonomiya" sa US nakaangkon og paglambo nga walay implasyon tungod kay gidasok ang suholan ug kanunay'ng nakapakati og kalamboan ang taas nga teknolohiya, ug ang ekonomiya sa US mao ang pangkalibutang kahimanan sa paglambo ug "pinakaulahing kasaligang merkado" tungod sa konsumerismong Amerikano ug sa pagsulod sa mga langyaw'ng pundo diha sa mga bonds ug stocks sa US.

Sa kamatuoran, anaay krisis sa sobrang produksyon sa high tech nga mga produkto gawas pa sa mas nauna nga krisis sa mga hilaw'ng materyales ug batakang produktong industriyal. Dili na ang US ang nanguna sa paggama og mga high tech nga produktong pangkonsumo ug pangproduksyon. Nagpadayon kini sa pagpakunhod sa produksyon sa tanang uban pang matang sa produkto, gawas sa produksyon sa mga armas. Kini ang pinakadakong tiggamitan sa mga pundo sa estado alang sa galastohanang militar ug produksyong militar. Tungod sa pagtibhang sa buhis sa mga korporasyon ug kalit nga pagsaka sa galastohanang militar ug nasudnong seguridad, kalit usab nga nakatagamtam ang US og mga depisit sa badyet ug malagmit nga pahatan niini ang mga pundo alang sa katilingbanong seguridad.

Padulong sa pagsamot ang lanat nga resesyon sa US. Dili makapasaka sa US ang pangempleyo ug demand sa mga magkokonsumo pinaagi sa high tech nga produksyong militar nga makahatag lang og gamay'ng pangempleyo. Tidlum nga midaus-os ang tantos sa ganansya ug nakapauk-ok og pamuhunan sa negosyo. Ang utang sa mga korporasyon nga mikabat na sa US$7 ka trilyon o 70% sa GNP sa unang kwarter sa 2001, mao ang pinakataas na nga rekord sa kasaysayan. Daghan ang mga korporasyon nga dili makabayad sa bonds ingon man sa mga nangutang sa bangko nga dili makabayad usab.

Sa kadak-on sa utang sa mga panimalay (prenda sa balay, utang-pangbayad sa sakyanan ug utang sa credit card), miuk-ok ang paggasto sa mga magkokonsumo. Sa pinaka-unang higayon niadtong 1999, ang mga panimalay'ng Amerikano mas dako ang utang itandi sa disposable income (kita nga mahimong gastohon human makabayad og buhis). Pag-abot sa sayong bahin sa 2001, ang utang sa mga panimalay miusbaw ngadto sa 120% sa disposable income. Ingon pa man, ang depisit sa current account, padayon nga nagkadako lapas sa ang-ang sa US$450 ka bilyon tungod sa padayon nga pagdaus-os sa industriyal nga produksyon sa US.

Sa katapusan sa 2001, ang kinatibuk-ang misulod nga langyaw'ng pamuhunan (nag-una gikan sa Japan ug Europe) nga kapin US$9.3 ka trilyon (lakip ang gipanag-iyang mga sapi ug bono sa mga negosyo), mas dako sa pamuhunan sa US sa ubang nasud nga mokabat sa US$6.9 ka trilyon. Sukad niadto, ang limpyo nga langyaw'ng utang sa US nga mokabat sa US$2.3 ka trilyon, midako na sa gibanabana nga ang-ang nga US$2.8 ka trilyon. Tungod sa paghugno sa tantos sa ganansya sa US, ang ekonomiya sa US dugang nahimong bulnerable sa paglayas sa kapital.

Ang US, ang Group of 8 ug ang mga nasud sa OECD tanan napakyas sa pagpangita og unsamang epektibong solusyon sa nagakasamot nga ekonomikanhon ug pinansyal nga krisis sa pangkalibutang sistemang kapitalista. Natural, tanan kanila, tinagsa ug managkakuyog nga nagsulay'ng migambalay ug misugyot og mga solusyon. Nabubalansi nila nga katihon ang ekonomiya pinaagi sa mga paketeng pinansyal gikan sa kapitalismong estado.

Gisagol sa US ang neoliberal nga kahakogan diha sa Keynesianismong militar: pagtibhang sa buhis, subsidyo alang sa pagpanukiduki ug paglambo ug mga kontrata alang sa produksyong militar para sa monopolyong burgesya. Sa bersyon sa US sa monopolyong kapitalismo sa estado, gipugngan sa nasudnong gobyerno sa US ang kaugalingon nga direktang mamuhunan apan nagpatuyang sa dili direktang pamuhunan pinaagi sa guided loans, garantiya sa pamuhunan, mga subsidyo ug kontrata sa pagpalit, ilabina sa natad sa produksyong militar.

Dili makapahimugso og signipikanteng pangempleyo ug dili makapabuylo og lungtad nga paglabong sa ekonomiya ang monopolyong pagpundo sa estado alang sa produksyong militar ug pwersang militar sa US. Lakip sa milutaw nga pormula (panundanan) sa rehimeng Bush mao ang paghulhog og pagsalimoang sa gubat, pag-ilog sa lana ug uban pang kahinguhaan gikan sa laing kanasuran pinaagi sa gubat ug pagbahad og gubat ug pagbaligya og mga armas apan paghikaw sa taas nga teknolohiya aron mukamugna niini.

Gisulayan sa mga tigpanalipod sa imperyalismo, ilabina sa mga tigpakaylap sa globalisasyon sa "gawasnong merkado" nga buhion pag-usab si Kautsky gikan sa lubnganan sa pag-ingon nga ang monopolyong kapitalismo nagpakaylap sa kapitalistang paglambo, nagpadako sa hut-ong mamumuo ug nagpala sa mga panaglahi sa mga nasudnong ekonomiya sa hisgutanan sa ang-ang sa paglambo. Apan matag pagdaus-os ngadto sa dugang kalalom sa krisis sa pangkalibutang sistemang kapitalista, labaw'ng nahimong tin-aw kaayo nga ang mga imperyalistang nasud ug mga atrasadong nasud adunay kalainan sa ekonomiya ug politika.

Walay sama kabililhon alang sa monopolyong kapitalismo ang nasud-estado (nation state) ug ang pagbase sa nasud. Gigamit sa mga imperyalista ang kaugalingon nilang mga nasudnong estado ug mga neokolonya aron mapahamtang ang monopolyong interes sa uban pang mga nasud ug katawhan. Nanginahanglan ang monopolyong kapitalismo ug monopolyong kapitalismo sa estado og basehan nga panukaranan nila paingon sa ubang kanasuran. Sa kasamtangang krisis, gikonsentra sa padayon nga nagkagamay nga ihap sa mga monopolyong burgesya ang nagkadakong pinansyal ug industriyal nga kapital, nga gihukhok nila gikan sa kaugalingon nilang nasud ug sa laing kanasuran.

Sa nagpadayon nga panahon sa imperyalismo ug rebolusyong proletaryo, ang pag-eksport sa sobrang kapital gikan sa mga imperyalistang kanasuran paingon sa mga atrasadong nasud nahimong mahinungdanon kaayo itandi sa pag-eksport sa sobrang produkto. Dili lalim nga mas dako ang superganansya nga makuha sa mga imperyalistang nasud gikan sa bayad-utang itandi sa pakigbinayloay og produkto sa mga atrasadong neokolonyang estado.

Gipas-an karon sa mga nasud sa Ikatulong Kalibutan ang US$2.8 ka trilyong langyaw'ng utang. Alang niini, kinahanglanon nilang mobayad og interes gawas sa nautang nga prinsipal pinaagi sa takdang data-data matag tuig. Ang kapakyasang makabayad magkahulugan nga magkapatong-patong ang palas-anong utang. Sa pulupanahon, nagpasiatab ang mga imperyalista pinaagi sa pagkanselar sa gagmay'ng kantidad sa wala kabayring utang sa pinakakabus nga mga nasud. Apan bisan ni kausa wala nila lung-i ang internasyonal nga pag-usura ug paghan-ok sa mga kanasuran ngadto sa ulipnan sa pagkautang.

Sa kasamtangang kahimtang kundiin nagkiyos ang pangkalibutang pamatigayon tungod sa krisis sa sobrang produksyon ug mga paghugno sa pinansya, nagbagood ang mga atrasadong kliyenteng estado sa mga depisit sa pamatigayon ug mga palas-anon nga utang. Kini ang panahon kundiin ang mga imperyalistang bangko ug kompanya nakakab-ot og kontrol sa kabtangan sa mga nabangkrap nga empresa sa kliyenteng estado ug sa mga lokal nga negosyante pinaagi sa pagdiktar sa baratilyong presyo ug pag-convert sa utang ngadto sa sapi.

Sa pagpanglimbasog aron mabuhi taliwala sa mga sosyalistang nasud ug mga kalihukan alang sa nasudnong kalingkawasan human sa Ikaduhang Pangkalibutang Gubat, ang mga imperyalistang nasud misunod sa kagustohan sa US sa Cold War. Nanguna ang US sa paggamit sa mga instrumento sa monopolyong kapitalismo sa estado aron subling itukod ang mga ekonomiya nga nagun-ob sa gubat pinaagi sa mga utang ug subsidyo sa estado, pagpasiugda ug paggarantiya sa ekspansyon sa kapital, pagtukod og gahum militar, pagdeploy sa mga base militar ug tropa sa laing kanasuran ug paglunsad og mga gubat pagpanulong.

Apan sukad sa katapusan sa Cold War niadtong 1991, gimobilisa sa US ang uban pang mga imperyalistang gahum, lakip ang Russia, aron manimalos ngadto sa hut-ong mamumuo, independenteng mga nasud ug sa sosyalistang kawsa pinaagi sa pagmaniho ubos sa prinsipyo sa walay rendang personal nga kahakogan ug ubos sa bandera sa globalisasyon sa "gawasnong merkado." Sa mga gubat pagpanulong batok sa Iraq, Yugoslavia ug Afghanistan, sayon ra nga maghiusa ang mga imperyalistang gahum batok sa mga kaaway gikan sa Ikatulong Kalibutan.

Apan karon, ubos sa dagway sa nagpadayon nga imperyalistang alyansa ubos sa pagpangulo sa US, adunay daghan kaayong nanagtiging mga imperyalistang gahum ubos sa kahimtang sa krisis sa sobrang produksyon ug mga pinansyal nga pagkahugno. Ang mga panagbingkil makita na karon sa alyansa diha sa mga kontradiksyon tali sa US, Britain, Spain ug Italy sa usa ka bahin ug France, Germany, Russia ug China sa pikas bahin mahitungod sa hisgutanan sa paglunsad og lain pang gubat pagpanulong batok sa Iraq.

Sukad pa sa sinugdanan sa ika-20 ka siglo, nakompleto na ang pagkabahin-bahin sa tibuok kalibutan ngadto sa mga teritoryong pang-ekonomiya sa mga imperyalistang nasud. Ang mga nasud o kaha kayutaan gawas sa mga nasud sa imperyalista nahimo nang mga kolonya, semikolonya ug dependenteng kanasuran. Nagtigi ang mga imperyalistang kanasuran alang sa mga tinubdan sa mga hilaw'ng materyales, mekado, nataran sa pamuhunan, estratehikong posisyon ug natad sa impluwensya. Ang panagtigi alang sa subling pagbahin-bahin sa kalibutan mahimong motipas gikan sa malinawong panagtigi ngadto sa mga gubat pagpanulong, sama sa napamatud-an na sa kasaysayan.

Ang mga gubat pagpanulong nagsulbong kun ang usa o daghan pang mga imperyalistang gahum nahimong mas kusganon kaysa niadto ug nangandoy nga makaangkon og mas dakong pahat sa ekonomikanhong teritoryo ug anaay lain pa o mas daghang imperyalistang gahum nga dili gustong mabintahaan. Ang nag-uros-uros nga kaaghatang maglunsad og gubat pagpanulong alang sa ekonomikanhong ekspansyon o pagmintinar sa kasamtangang kahimtang dili lamang tungod sa mga ekonomikanhong paktor kundili mas mahinungdanon pa, tungod kini sa mga politikanhong paktor, sama sa pagsulbong sa mga ultra-rightist nga mga pwersa sa jingoismo (pag-aghat og gubat), rasismo, panatisismo sa relihiyon (religious bigotry) ug pasismo.

II. Ang kaaghatan sa US nga makiggera

Walay sapayan lamang sa US nga pabuthon ang barko de gera nga Maine ug mopatay og hapitan 300 ka mga opisyal ug ginsakpan sa navy aron duslitan ang Gubat Amerikano-Espanyol ug tugotan ang US nga sakgawon ang mga kolonya sa Spain sama sa Cuba, Puerto Rico ug Pilipinas. Busa, daghang mga tawo ang nag-ingon nga wala igsapayan sa US nga mahimong hinungdan sa kamatayon sa 3,000 ka mga tawo sa Septembre 11 nga pagpangataki tungod kay dili lalim nga mas dako ang nasugal niini. Gisulti nila kini, ilabina kay wala pay makakombinsi nga pagpatin-aw ngano ang mga otoridad sa US wala milihok gilayon sa abanteng taho-paniktik mahitungod sa mga nagbansay nga mga piloto nga nahimong Septembre 11 nga mga hijacker.

Gigamit karon sa US ang Septembre 11 nga pagpangataki isip lisensya aron sayop nga ilarawan isip "terorista" ang mga nasud nga nagmalimbasog sa nasudnong independensya, mga kalihukan alang sa nasudnong kalingkawasan ug mga progresibong lider aron aghaton ang salimoang sa "permanente ug walay utlanan nga gubat batok sa terorismo," iduso ang doktrina sa preemptive strike ug pagpamitol sa katawhan, ibalhin ang mga kahinguhaan ngadto sa mga pwersang militar sa US, kaugalingnang seguridad, pagpangandam alang sa gubat ug produksyong iggugubat ug gamiton ang palisiya sa agresibong gubat ug pagpamahad aron padak-on ang ekonomikanhong teritoryo sa US.

Human gilayon sa Septembre 11 nga pagpangataki, nakahimo ang US nga labaw'ng nakasulod pa diha sa Central Asia ug South Asia ug nakaangkon og dugang katakus nga makakuha og mga kahinguhaan sa lana ug gas sa Caspian Sea ug Central Asia. Gibase niini ang kaugalingon sa niaging pamuhunan nga mokabat sa US$20 ka bilyon diha sa rehiyon. Gihawanan usab niini ang dalan alang sa oil pipeline ngadto sa Indian Ocean pinaagi sa Afghanistan ug Pakistan, sa pasumangil nga patyon si Osama bin Laden ug gub-on ang al Qaeda diha sa Afghanistan.

Matapos nga nagmadaugong nakaplastar og bag-ong itoy nga gobyerno sa Afghanistan apan napakyas sa pagpatay kang Osama bin Laden ug pagguba sa al Qaeda, ang US nahimong okupado sa dugang pagpangandam og gubat pagpanulong batok sa Iraq sa pasumangil nga ang gobyernong Iraqi nagmugna ug nagtapok og weapons of mass destruction (WMD o mga armas nga makapuo'g daghan kaayo). Ang US, nga maoy pinakadakong prodyuser ug tigkamada og WMD, dili makombinsi ang tanan niining mga kaalyado nga ang Iraq nagtipig niining mga armasa.

Kining huyang nga pasumangil sa US hingpit nga nabutyag sa relatibong dili lalim nga mas pugong nga reaksyon diha sa deklarasyon sa Democratic People's Republic of Korea (DPRK) nga anaa kini'y nagpadayon nga programa sa pagpalambo og mga armas nukleyar ug anaa na kini'y pila ka mga armas nukleyar alang sa kaugalingong depensa. Gihinganlan sa US ang DPRK isip bahin sa giingon nga "axis of evil" (sentro sa kasatanasan) apan sa niining partikular nga kaso, inanay ang reaksyon sa US tungod sa determinasyon sa DPRK nga mosukol. Dugang pa niini, ang kasikbit niini nga China mibalibad sa pagsunod sa mando sa US tungod kay makadaot kini sa DPRK.

Sa unang gubat pagpanulong nga gipangulohan sa US batok sa Iraq niadtong 1991, nakapabaton sa US og mas hugot nga kontrol sa Middle East ug daghang mga benepisyo sama sa introduksyon sa mga permanenteng pwersang militar sa US, pasilidad ug mga base, pagsakgaw sa gikitang salapi sa Saudi Arabia ug mga emirates gikan sa lana pinaagi sa pagbaligya kanila sa US og mga kahimanang militar, pagpig-ot sa nasud nga Palestinian ug uban pa. Ang katuyoan sa kasamtangang planong gubat sa US batok sa Iraq mao ang pag-angkon sa direktang kontrol sa US ug rekolonisasyon sa Iraq ug mas hugot nga kontrol sa US sa tibuok Middle East.

Sama sa mga gubat pagpanulong karong bag-o lamang, tin-aw nga ang US mao ang makahakop sa dakoay kaayong pahat sa kinawat pinaagi sa pagsakop ug rekolonisasyon sa Iraq sa umaabot. Buot sa US nga makakab-ot og direktang kontrol sa mga kahinguhaan nga lana sa Iraq: 112 ka bilyon nga bariles sa napamatud-ang reserbang lana ug kapin 250 ka bilyon nga potensyal nga reserba. Pinaagi sa pagkontrol niini, mahimong hingpit nga dominahan ug himuong inutil sa US ang Organization of Petroleum Exporting Countries. Human niini, makakab-ot kini og dili malalis nga hegemonya sa kahinguhaang lana sa tanang dapit sa kalibutan.

Usa ka kusog nga hinungdan aron mouyon-uyon ang Britain ngadto sa US mao ang paglamon sa American Oil Company (AMOCO) diha sa British Petroleum. Matinguhaon kaayo ang US nga mabali ang dagan, nga gisugdan sa Iraq niadtong Nobembre 2000, sa pagbalhin ngadto sa Euro isip salapi alang sa mga transaksyon bahin sa lana sa kasanuran sa OPEC. Dugang pa niini, nasuko ang US sa pag-angkon sa France, Russia ug China sa mga konsesyon sa oil fields (exploration ug development) sa Iraq ug pagkab-ot sa Germany diha sa mga kontrata sa engineering ug suplay aron subling tukuron ang imprastruktura ug industriya sa Iraq.

Hisabtan kaayo sa basehang ekonomikanhon ug politikanhon kun nganong ang US makahimo ra nga makakab-ot og "coalition of the willing" (koalisyon sa mga miuyon). Ang France, Germany, Russia ug China wala mouyon nga mahimong kabahin sa usa ka imperyalistang alyansa alang sa gubat nga naghulga sa ilang ekonomikanhon ug geopolitical nga interes sa rehiyon, tin-aw nga dili makatarunganon ug makapuo sa tibuok kaliwat (genocidal) ug kundiin ang US ang bugtong o kaha kinadak-ang makabenepisyo. Ang nagkatiging mga interes sa mga imperyalistang gahum makabungkag sa imperyalistang alyansa nga gipangulohan sa US sukad sa pagsugod sa Cold War.

Ang rehimeng Bush matinguhaon nga palapdon ang pangkalibutang hegemonya sa US ug padak-on ang industriya sa lana ug depensa sa US. Adunay kini'y espesyal nga interes sa paghatag-benepisyo sa pila ka grupong namuhunan sa mga kompanya sa lana sa US nga adunay kalambigitan sa interes sa pamilyang Bush (Carlyle Group ug Enron), kang Vice President Cheney (Haliburton), kang national security adviser Condoleezza Rice (Chevron) ug mga susama niini. Si Defense Secretary Donald Rumsfeld adunay hugot nga kalambigitan sa mga kompanya sa US nga naninguhang magtukod og mga base militar sa US ug mga proyektong rekonstruksyon.

Ang mga inter-imperyalistang kontradiksyon mahimong mograbi pa dili lamang tungod sa walay rendang kahambog ug kahakogan sa bugtong superpower ug sa kasuko sa laing mga imperyalistang gahum kundili tungod usab kay ang mga gitarget nga kanasuran sa Third World naghingusog sa ilang kaugalingnan ug aktibong nagsulay nga bungkagon ang imperyalistang alyansa pinaagi sa paghatag og mga konsensyon diha sa ubang mga imperyalistang gahum. Usa ka positibong panghitabo nga ang Non-Aligned Movement (NAM) mibangon na gikan sa iyang pagkahinanok aron makmakon ang kahakogan ug pagkamagubaton sa US.

Samtang ang pagtagad sa kalibutan nakapunting sa nagbung-aw nga gubat pagpanulong sa US diha sa Iraq, gidasig sa US ang rehimeng Sharon nga sayop nga ihulagway ang mga rebolusyonaryong organisasyong Palestinian isip "terorista" ug walay bugti nga pagsilot nga pamatyon ang mga Palestinian, palapdon ang nga Zionist nga settlements ug bungkagon ang Palestinian Authority. Nagpadayon usab kining pakusgon ang interbensyong militar ug mga agresibong aksyon dinhi sa "ikaduhang natad batok sa terorismo" sa Pilipinas ug Southeast Asia.

Hinambog nga gi-anunsyo sa US sa kalibutan nga ang US special operations forces maglunsad og mga operasyong pangkombat batok sa grupong Abu Sayyaf sa Sulu, habagatang Pilipinas, nga dayag nga paglapas sa soberanya ug teritoryal nga integridad sa Pilipinas. Gihawan niini ang dalan alang sa agresyong militar batok sa mga rebolusyonaryong pwersa ug katawhan nga girepresentahan sa National Democratic Front of the Philippines.

Naglunsad kini og mga kontra-rebolusyonaryong aktibidad sa Nepal, Colombia, Venezuela ug daghang uban pang kanasuran sa takuban nga gubat kontra-droga ug kontra-terorista. Sa pagtanyag og ayuda kang Haring Gyandara ug Prime Minister Sher Bahadur Deuba sa Nepal, yanong gisulti ni US state secretary Colin Powell nga "ang insurhensyang Maoista nga nanglimbasog nga lumpagon ang gobyerno mao gyu'y among gipakigbatokan sa tibuok kalibutan". (the Maoist insurgency that is trying to overthrow the government (is) really the kind of thing that we are fighting against throughout the world)

Tungod sa iyang dako kaayong interes sa lana, ang US naningkamot nga hugtan ang iyang kontrol sa Pilipinas, Indonesia, Colombia ug Venezuela. Nagmaniobra usab ang US sa pagkontrol sa mga kahinguhaang lana sa Angola, Nigeria, Congo, Gabon, Cameroon ug Equatorial Guinea. Naglaom ang US nga kining mga nasura mao ang mosuplay sa US og 25% sa lana pag-abot sa 2015.

Naningkamot ang US nga makasakgaw og ekonomikanhong teritoryo sa mas daghang pamaagi kaysa paglunsad og gubat pagpanulong batok sa Iraq. Dili nato kalimtan nga samtang ang US naakatar sa gubat agresyon niini sa Vietnam, nakahimo pa kini gihapon sa pagpanghulhog og anti-komunistang masaker nga gikamatay sa kapin usa ka milyong Indonesian ug kundiin naangkon sa US ug mga kaalyado niining British ug Dutch ang kontrol sa lana ug laing kahinguhaan sa Indonesia.

Damha nga human sa paglampos sa mga magubatong aksyon niini sa Iraq, magpadayon ang US sa pagpakusog sa produksyong militar, pagpadako sa mga pwersang militar ug pagtukod og daghan pang base militar sa laing kanasuran (karon miihap na sa 80) aron makamintinar og politikanhon ug pangmilitar nga superyoridad sa iyang mga kaugalingong imperyalistang kaalyado ug makapadayon sa iyang inisyatiba sa paglunsad og mga unilateral ug multilateral nga aksyon aron pahimuslan ug lupigan ang katawhan sa kalibutan.

Nagtagana ang rehimeng Bush og kapin US$300 ka bilyon alang sa galastohanang militar sa kasamtangang tuig. Naggahin kini og dili mokubos sa US$600 ka bilyon alang sa produksyon sa bag-ong mga weapons of mass destruction sulod sa moabotay'ng lima ka tuig. Nagplano kining mogamit og mga tactical nuclear weapons (mga gagmay'ng armas nukleyar). Nagtukod kini og dagkong mga base militar sa kanhing bahin sa Soviet Union diha sa Central Asia ug gikompleto ang pagliyok sa China. Ubos sa estratehikong konsepto sa full spectrum dominance (FSD o malukpanong dominasyon), gimilitarisa niini ang kawanangan aron makab-ot ang superyoridad sa kawanangan ug kombinasyon sa superyoridad sa kayutaan, kadagatan ug kahanginan.

Ang tendensya mao ang paghulhog sa US og jingoismo, rasismo, pasismo ug salimoang sa gubat (war hysteria). Dili kini yanong gibunga sa Septembre 11 nga pagpangataki. Labaw pang mahinungdanon, bunga kini sa nagkasamot nga ekonomikanhon ug pangpinansyang krisis sa US ug pangkalibutang kapitalistang sistema. Dugay pang panahon us� nahitabo ang Septembre 11 nga pagpangataki, gipalobo na sa mga otoridad sa US ang hulga sa terorismo aron kahataga'g katarungan ang mga aksyong mapitolon batok sa mga mamumuo, de-kolor nga mga tawo ug uban pang nanghagit o kaha manghagit sa umaabot sa imperyalismo diha sa US ug laing nasud.

Nag-uros-uros sa kahambog ang US tungod kay sa ulahing tulo ka gubat pagpanulong batok sa Iraq, Yugoslavia ug Afghanistan, nakalikay kini sa mga kaswalti sa kombat pinaagi sa tinalawan nga estratehiya ug taktika sa paggamit sa high tech nga mga armas aron gupokon ang mga pirmidong istruktura sa nagkalain-laing matang ug puohon isip "collateral damage" ang tibuok sibilyan nga populasyon ug pagsuborno sa mga papet nga moilog og gahum dihang ang kasamtangang mga otoridad dili na makadumala sa gupok na nga ekonomiya. Nakalikay usab kini sa mga kaswalti pinaagi sa pagpundo ug pagmando sa mga puli (surrogate) nga armadong pwersa gikan sa lokal nga militar, paramilitar, bandido o uban pang nagkalain-laing pwersang mersenaryo.

Sama sa Indochina niadtong dekada 1960 ug 1970, ang silot-panimalos ngadto sa gahum militar sa US pinakadako ang posibilidad nga mahimo kun malihukon ang armadong rebolusyonaryong kalihukan ug wala pa nagmintinar og mga pirmidong istruktura. Gigamit sa US kaniadto ang high tech nga mga armas, lakip na ang pinakamodernong mga eroplano, barko, kahimanang elektroniko, daghan kaayong matang sa mga bomba ug mga kemikal apan napildi gihapon kini sa gubat.

Ang kombinasyon sa gubat sa katawhan sa mga agraryong kanasuran ug nagkalain-laing dagway sa rebolusyonaryong pakigbisog sa mga mas lambo nga kanasuran mahimong makapangibabaw sa gahum militar sa US. Kini nga superpower pakigsangkaan sa usa ka butang nga mas gamhanan ug mas lapad kaysa gilauman niini sa umaabot nga katuigan.

III. Ang pakigbisog sa katawhan

Traynta milyon nga katawhan ang mi-alsa sa protestang masa sa 600 ka kasyudaran ug kalungsoran sa tibuok kalibutan niadtong Pebrero 15 ug mga nait nga kapetsahan. Ang pinakadako sa mga pangmasang aksyong protesta nahitabo sa US, Britain, Italy ug Spain, nga ang gidak-on gikan sa 500,000 ngadto sa 2.5 ka milyon ka mga tawo matag syudad. Kini ang mga nasud kundiin ang mga nangulo pinakahala-hala sa paglunsad og gubat pagpanulong batok sa Iraq. Sa pila ka mga syudad sa US ug Europe, ang mga pangmasang aksyong protesta gilabwan na kadtong gilunsad batok sa gubat agresyon sa US batok sa Indochina sa ulahing bahin sa dekada 1960 ug sayong bahin sa dekada 1970.

Ang higanting mga aksyong masa gibunga sa palisiya ug mga taktika sa lapad nga pakighiusang prente sa mga organisador. Nagtapok ang gagmay'ng mga partido ug grupo sa US aron tukoron ang mga ad hoc nga grupong tigkoordina sama sa ANSWER, Not in Our Name (NION) ug United for Peace and Justice. Ang ubang mga grupo nga nalambigit sa European Social Forum ug mga susama niini, nag-inisyatiba nga mag-isyu og mga panawagan sa aksyon ubos sa lapad nga islogan nga anti-gubat o kaha kalinaw. Silang tanan tina-aw nga nanghimaraot ug nanupak sa giplanong gubat pagpanulong sa US batok sa Iraq.

Ang mga koordinetor ug organisador nanawagan sa mabagang masa sa katawhan batok sa hinambog nga singgit sa US alang sa gubat. Ang mga mitubag naglangkob sa mga progresibong pwersa sa mamumuo, kababayen-an ug kabatan-onan, yanong katawhan, propesyonal, institusyong rehiyoso, burgis nga mga partido, ang burukrasya ug mga seksyon sa reaksyonaryong mga hut-ong.

Ang mga koordinetor ug organisador nagpadayon sa pagpalapad sa ilang mga han-ay. Ang ilang mga batakang pamahayag sa komon nga kawsa sayon nga madawat ug mapirmahan sa lapad nga han-ay sa katawhan. Wala sila'y bisan unsang komplikadong sistema sa organisasyon o dakong pundo. Giimbitar nila ang mga prominenteng personalidad ug mga nagsalmot nga organisasyon aron danihon ang uban nga mo-entra. Gidumalaan nila'g maayo ang ilang mga website ug email addresses ug gibaligya nila ang ilang mga materyales sa kampanya.

Ang mga organisasyong masa nga nalambigit sa International League of Peoples' Struggle aktibo kaayo sa pangkalibutang kampanya batok sa gubat pagpanulong sa US batok sa Iraq ingon man sa giingong gubat sa US batok sa terorismo. Mahimo pa silang mas aktibo kaysa niadto ug maka-inisyatiba pa'g maayo, ilabina sa mga kontinente, nasud ug syudad kundiin ang kampanyang masa huyang pa ug wala pay mga grupong tigkoordina nga susama ka prominente sa ANSWER ug NION.

Ang mapadayunong gimbuhaton sa mga progresibong pwersa ug ang ilang nasulayan nang katakus sa pagkabig ngadto sa kadalanan og puloan ka milyong mga tawo maoy mas makapukaw, maka-organisa ug makapalihok og mas daghang ihap sa katawhan. Bisan ang relatibong progresibo ug hatungang mga seksyon ug ang signipikanteng bahin sa konserbatibong seksyon sa mga burgis nga partido, institusyong relihiyoso ug sa Non-Aligned Movement sa kanasuran mi-anib na sa kalihukan batok sa gubat ug gitugotan ang ilang masang ginsakpan nga motambong sa mga aksyong masa.

Sa han-ay sa mga lider, organisasyon ug masa nga lambigit sa kalihukang anti-gubat, adunay nagkalain-laing politikanhong tendensya sama sa anti-imperyalismo sa han-ay sa mga progresibong pwersa, burgis nga pasipismo, relihiyosong pasipismo ug ang dayag nga nasudnong kinaugalingong interes sa pila nga kanasuran ug gobyerno nga buot pahimuslan sa US.

Maayo nga ang palisiya ug mga taktika sa lapad nga nagkahiusang prente naghugpong sa masa sa nagkalain-laing ang-ang sa kahimatngon. Bunga niini, ang mga progresibong pwersa mahimong makapakaylap sa anti-imperyalista ug demokratikong kahimatngon diha kanila. Ang kalihukang anti-gubat angay'ng mahimatngon ug militanteng hatagan og anti-imperyalistang unod. Mahimo lamang kini kun mangulo ang mga rebolusyonaryong partido sa proletaryado, madugangan ang ilang inisyatiba ug modako sila sulod sa ingon nianang kalihukang masa. Kini nga kalihukan angay'ng maantigong mobutyag ug mosupak sa interbensyonista, agresibo, pasista, terorista ug mapanulison nga kinaiya sa imperyalismo.

Matag paglunsad og magun-ubong gubat sa imperyalismo, ang rebolusyonaryong partido sa proletaryado ug tanang anti-imperyalista ug demokratikong pormasyong masa angay'ng paspasan ang pagpanglimbasog aron pukawon, organisahon ug palihukon ang nagkadaghang katawhan subay sa linya sa lapad nga nagkahiusang prente. Angay nilang palihukon ang mabagang masa sa katawhan aron moalsa sa mga pangmasang aksyong protesta ug mohikyad sa hinanaling mga hangyo.

Sa samang higayon, ang rebolusyonaryong partido sa proletaryado angay'ng hatagan og estratehikong konsiderasyon ug motrabaho aron makab-ot ang katumanan sa potensyal sa pagpakusog sa tanang rebolusyonaryong pwersa ug pagpabali sa imperyalistang gubat ngadto sa rebolusyonaryong gera sibil sa angay'ng panahon. Napamatud-an sa kasaysayan nga ang kahimtang sa imperyalistang krisis ug gubat mopahimugso sa armadong rebolusyon alang sa nasudnong kalingkawasan, demokrasya ug sosyalismo.

Tukma kaayo nga kun ang krisis sa pangkalibutang kapitalistang sistema nagkahait ug ang bugtong imperyalistang superpower o kaha usa ka grupo sa mga imperyalistang gahum nagsalimoang sa pagpanglungkab ug pagpamatay ug naghimo og sulabing kadaotan sa katawhan, mao kana ang panahon nga ang pakigbisog sa katawhan alang sa nasudnon ug katilingbanong kalingkawasan paspas nga nag-asdang batok sa imperyalismo ug tanang reaksyon. ###

Back to top