Dandangran ni Macapagal-Arroyo ti panagtuloy ti tungtongan iti kappia iti baet ti GRP-NDFP

Prof. Jose Ma. Sison
National Democratic Front of the Philippines
Chief Political Consultant
Enero 28, 2003

Ti militar, pulis, pwersa a paramilitar ken "vigilante" ti manmandaran ti US a rehimen a Macapagal-Arroyo ket agisaysayangkat kadagiti narurungsot nga operasyon a mangpatay kontra iti rebolusyonaryo a puersa ken umili. Manipud idi nagtugaw kas presidente idi Enero 2001 ni Macapagal-Arroyo, nagiyaramid da kadagiti nakadangdangkok a panaglabsing ti karbengan kas tao, nga iti unos ti dua a tawen ket ad-adu pay ngem ti bilang ti panaglabsing iti unos ti innem a tawen ti rehimen a Ramos.

Naidokumento dagiti human rights organizations iti Pilipinas ken naiyulat iti Amnesty International manipud idi Enero 2001 inggana Enero 2003 ti 172 biktima ti pammapatay; pulitikal nga asasinasyon ken masaker; 127 biktima ti tortyur; 879 biktima ti arbitraryo a panangaresto ken pannakaibalud; 5,418 biktima ti ilegal a panagrekisa; 4,043 biktima ti panangpilit; 9,219 biktima ti panagbomba ken straping; 19,917 biktima ti harasment; 11,179 biktima ti panangdadael ti sanikua; 8,638 biktima ti panangagaw ti sanikua ken 17,564 biktima ti puersado nga ebakwasyon.

Kinaluban ken pinalubosan ni Ms. Macapagal-Arroyo amin dagitoy a panaglabsing iti karbengan kas tao iti uneg ti patakaran na iti terorismo ti estado. Iparparang na ti bagi na kas inosente iti terorismo ken kas kampion ti kontra-terorismo iti aniaman a kanito nga iyaramid ti Baro a Buyot ti Umili dagiti taktikal nga opensiba laban kadagiti napeklan a kriminal ken nanglabsing ti karbengan kas tao. Iti kasta, kalpasan ti panangdusa ti NPA kenni Romulo Kintanar, isuna ken dagiti aso-aso na ket agsarsarita ken agak-akto a mangdangran iti pannakaituloy manen ti negosasyon para iti kappia.

Inggana a saan a marisut ti gubat a sibil, dagiti dua nga armado a puersa ket agtultuloy a mangiwayat kadagiti opensiba ken kontra-opensiba. Suspendien ngarud Macapagal-Arroyo ti tungtongan iti kappia kalpasan ti tunggal taktikal nga opensiba ti NPA ken panagpammarang na kas kontra-terorista? Ipagarup na kadi a palubosan ti NDFP nga agpabanglo isuna babaen ti panangiparang a demonyo dagiti rebolusyonaryo a puersa ken lider ken panangpabasol kadakuada ti panangsuspendi na mismo iti tungtongan iti kappia?

Ti Nasyunal a Konseho ti NDFP ket mabalin nga ikonsidera da dagiti sumaganad nga usapin iti panangideklara ti awan-keddeng a suspensyon ti negosasyon iti kappia iti GRP:

1. Awanan sarday nga ipatpatungpal ti rehimen dagiti brutal a kampanya ti pananglipit babaen iti militar, pulis, puersa a paramilitar ken "vigilante", a mangbikbiktima iti nakaad-adu nga umili ken masuspetsa a rebolusyonaryo.

2. Salsalakniban ti rehimen dagiti notoryus a nanglabsing ti karbengan ti tao kas kada Col. Rodolfo Aguinaldo ken Romulo Kintanar ken pinakawan na dagiti nadangkok a krimen da laban iti umili. Inikkan na pay ketdi ti pammadayaw dagitoy.

3. Ti rehimen ket agtaltalinaed a napeklan nga aso-aso ti US ken dadduma pay a ganggannaet a gubyerno babaen ti panangipalubos nga iturayan dagitoy ti rebolusyonaryo nga aksyon dagiti Filipino iti Pilipinas ken panangipalubos iti US a mangiparang a dagiti aramid a terrorista ket dagidiay aramid nga iti panagkita ti GRP ket madusa kas rebelyon.

4. Linabsing ti rehimen ti Joint Agreement on Safety and Immunity Guarantees (JASIG) babaen ti panangdawat iti US ken dadduma pay a ganggannaet a gubyerno a pagbalinen a kriminal a terorista ti PKP, NPA ken ti NDFP chief political consultant ken ikabil iti peggad dagiti negosyador, konsultant, istap ken para-suporta ti NDFP.

5. Linabsing ti rehimen ti Comprehensive Agreement on Respect for Human Rights and International Humanitarian Law (CARHRIHL) babaen iti pannakitipon iti US ken dadduma pay a gubyerno iti panangkalub a ti armado a dangadang iti baet ti buyot ti GRP ken NDFP ket saklawen ti international humanitarian law (Geneva conventions and protocols).

6. Awanan interes iti nainkalintegan ken napaut a kappia ken agregget laeng iti awanan prinsipyo a kapitulasyon ti NDFP a mailabsing iti The Hague Joint Declaration. Ti ilaslatog da a balangkas ti "final peace agreement" ket awan sabali no di panangpasuko iti prinsipyo ken armas ti NPA.

Iti panangsugsog ti US, pair-irtengen ti rehimen a Macapagal-Arroyo ti armado a kampanya ti pananglipit ken idurduron na ti panangrubrub iti rebolusyonaryo a puersa ken umili a pairtengen ti armado a rebolusyon para iti nailian a wayawaya ken demokrasya laban iti imperialismo nga US ken dagiti lokal a mananggundaway a dasig.