Diri an NPA kundi an AFP an waray-wantas nga nangangabuso han mga sibilyan ngan nananabotahe han negosasyon pankamurayawan

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Setyembre 02, 2004

<--Pahayag ha Media

Septyembre 2, 2004

Fr. Santiago Salas, Tagapagyakan ha Eastern Visayas

han National Democratic Front of the Philippines-->

Hul-os nga buwa an diri pala maiha nga alegasyon han AFP nga an CPP-NPA in responsable han panmatay hin 91 nga sibilyan yana nga tuig. Nakatadong ini ha dugang nga pagsabotahe han gidaan na nadus-og nga negosasyon pankamurayawan pinaagi han pagpagawas nga may basaranan an utro nga paglista han US komo "terorista" han CPP-NPA ngan hi Prof. Jose Ma. Sison. Kundi komo tinuod nga hukbo han katawhan, an NPA in hitaas an disiplina, prinsipyado ngan tuptop ha Comprehensive Agreement on Respect for Human Rights and International Humanitarian Law, ngan nahasog ha Geneva Conventions ngan iba pa nga internasyunal nga makatawo nga pagsurundon. Aada an makatadungan, makatawo ngan mabayanihon nga rekord han rebolusyonaryo nga kagiusan ha 36 katuig nga armado nga pakig-away para ha nasyunal ngan sosyal nga kagawasan. Giutan hini ngan han militarisasyon ha kabaryuhan han reaksyunaryo nga gubyerno nga suportado han US - an mga pagmasaker, pagtortyur, panunog, pamomba ha mga sibilyan nga komunidad, panhibang han mga pananum ngan pakabuhi han katawhan - hin-o an tinuod nga terorista?

Ha Eastern Visayas, an di pala maiha nga kabangisan han 8th Infantry Division dida ha utro nga ginpakusog nga opensiba hini in nagpapanhimuwa han pamomostura nga kulaos nagtatagad hira han kinabuhi han mga sibilyan. Ha miting han Municipal Peace and Order Council han Agosto 23 ha Basey, Western Samar, ginpirmahan hin sobra 200 nga molopyo an usa nga petisyon nga nagdedemanda han pag-undang han mga operasyon militar han 46th IB. Direkta nga ginpamatud-an mismo han mga biktima han 46th IB nga an mga sundalo in nanutok han ira mga pusil ha kabataan, iligal nga nanrekisa hin kabablayan ngan nanhibang han pananum han mga parag-uma.

Nagpapadayon an makahayop ngan pauro-utro nga panmamatay hin waray-depensa nga mga sibilyan. Han Agosto 8, gin-istraping han mga sundalo ngan CAFGU han 63rd IB an balay han pamilya Conge ha Catubig, Northern Samar, kun diin namatay hi Mely Conge, 29 anyos ngan upat-kabulan nga burod, ngan grabe nga nasamaran an iya asawa ngan tulo nga anak. Gin-atentar ni Col. Manuel Usi, kumander han 63rd IB, nga tahuban an insidente ngan ibasol ini ha NPA kundi nabuksas ini ha gilayon.

Ha Eastern Samar, ginpatay han mga sundalo ha mga operasyon militar han Hunyo ngan Hulyo an upat nga parag-uma. Han Hulyo 4 ha Brgy. Can-ilay, Can-avid, ginpusil ngan ginpatay han mga sundalo han 14th IB ha pamumuno ni 2Lt. Arbern Rommel Abiva hi Bernardo Amado, usa nga may-deperensya ha ulo, ha simple nga rason nga diri niya nababaton an ira mga pakiana. Hiton manta nga adlaw, ginpatay han mga elemento han 14th IB ngan 63rd IB an usa nga diri pa nakikilala nga parag-uma ha Dolores kanay ulo in ginbuak pa hin bolo. Han Hulyo 2, natad-an an patay nga lawas ni Rogelio Nurcio ha sakob mismo hin kapilya ha Brgy. Tangbo, Maslog; tungod la kay mayda hiya bugto nga kaapi han NPA, hiya in ginpusil, gintigbas hin bolo ngan ginlukat an mga mata hin mga elemento han 14th IB. Han Hunyo 12, ginbuno ngan gintigbas tubtob nga namatay hi Freddie Rebato hin mga Scout Ranger ngan mga sundalo han 14th IB ha Brgy. Tugas, Maslog.

Ini ngan damo pa nga iba nga panalapas han tawhanon nga katungod in diri nakakapatarhog ha katawhan, nga lugod mas nagkukusog an kangalas ngan pagdemanda hin hustisya. Diri la kay ginbabale-waray han reaksyunaryo nga gubyerno an araba han katawhan, kundi diri pa hini ginseseryoso an negosasyon pankamurayawan. Ngani, pursigido ini nga papintason pa an kontra-rebolusyonaryo nga gerra, nga usa nga gerra nga waray balaud ha balayan han kanan US "gerra kontra terorismo", nga posible magpakusog pa han panginginlabot militar han US. Samtang ginpapas-an han katawhan an krus han sosyo-ekonomiko nga krisis, ginlalatigo pa liwat hira hin militarisasyon, mas grabe nga pampulitika nga pamomoypoy, ngan panginginlabot han langyaw.

Adton mga taga-Eastern Visayas nga mayda konsyensya ngan pag-ugop ha katawhan in kinahanglan sumuporta ha nagkukusog nga demanda nga undangon an militarisasyon, maghatag hin bayad-danyos ha mga biktima, ngan sirutan an mga parupanalapas han tawhanon nga katungod. Adton naghihingyap hin usa nga makatadungan ngan panmaihaan nga kamurayawan in kinahanglan manawagan ha gubyerno ni Arroyo nga tumanon an mga obligasyon hini ilarum han duha nga Oslo joint statements han Pebrero ngan Abril: maghimo hin pitad agud matanggal an CPP-NPA ngan hi Prof. Sison ha lista han mga "terorista"; pagawason an ngatanan nga pampulitika nga priso; ngan padagmiton an indemnipikasyon han mga biktima han balaud militar. Kun an gubyerno nga Arroyo ngan an AFP in hul-os nga magserra ha erestorya pankamurayawan ngan magpakusog la han kontra-rebolusyonaryo nga gerra, ira la lugod iginduduso an katawhan han Eastern Visayas ngan bug-os nga nasud ha ira minilyon-milyon ngadto ha pagrerebolusyon ngan magpapaboylo la han nagpapadayon nga pakig-away para ha nasyunal nga katalwasan, demokrasya ngan kamurayawan.#

Para han kumpirmasyon, kontaka hi:
Roy Santos, NDF-EV Media Liaison Officer
Cellphone No. 0918-3112138

Back to top