Baton ha maitom nga propaganda han 8th Infantry Division

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Agosto 05, 2003

Hugot nga ginkokondena han National Democratic Front ha Sinirangan Bisayas an mga buwa ngan waray basaranan nga pagpakaraut han 8th Infantry Division kontra ha rebolusyonaryo nga kagiusan nga sunod-sunod nga nagginawas ha mga radyo ngan mantalaan ha Rehiyon 8.

Angay hibaruan han haluag nga katawhan ha Sinirangan Bisayas nga mismo an militari, diri an rebolusyonaryo nga kagiusan, an naghihimo o nagpapaluyo han damo na nga kaso hin panhohold-ap, paninikas ngan pangingilkil ha aton rehiyon. An mga grupo han magraut nga elemento nga nagios ha Catbalogan, San Jorge, Calbayog, Hinabangan, ngan Paranas in gin-aarmasan hin higtaas nga kalibre nga pusil nga makukuha la tikang ha AFP. An pira hini nga grupo in nagbabase ngan nag-oopereyt duok la ha mga kampo han militar. Nakumpirma han mga yunit han NPA nga nagios ha nasabi nga mga erya nga an usa hini nga grupo in ginpapanguluhan mismo hin mga elemento han Intelligence Service of the AFP (ISAFP), samtang an iba naman nga grupo in ginpapamunuan hin mga elemento han militar nga aktibo ha serbisyo o mga ex-military. Ngani, mayda na higayon nga nadakop an usa nga elemento han AFP nga asya an nagmangulo hin panholdap ha Western Samar. Grabe nga nabibiktima hini nga magraut nga elemento an mga ordinaryo nga molopyo, lakip na an mga gudti ngan midyum nga negosyante. Ha ira mga magraut nga binuhatan, gin-gagamit nira an ngaran han NPA diri la para makapangilkil kundi para ha tuyo nga dum-itan an dungog ngan prestihiyo han NPA ngan bug-os nga rebolusyonaryo nga kagiusan.

An demokratiko nga gubyerno han katawhan nagpapatuman han palisiya han rebolusyonaryo nga pagbubuhis komo kaparte han pag-ehersisyo han pampulitika nga poder hini ha nalulupgupan nga lugar. Hugot nga gindidid-an han demokratiko nga gubyerno han katawhan an anuman nga komersyal nga aktibidad nga magdudurot hin grabe nga kahibangan ha pakabuhi han katawhan ngan ha kalibungan. Para naman hadton gintutugutan mag-opereyt, gin-iimplementar an rebolusyonaryo nga pagbubuhis ngada ha mga dagko nga negosyante, labi na hadton mga langyaw nga monopolyo nga korporasyon, ngan diri ha mga ordinaryo nga molopyo ngan gudti nga negosyante. Gin-gagamit an natitirok nga rebolusyonaryo nga buhis para han padayon nga pagpapadig-on han demokratiko nga poder han katawhan, lakip na an mga kampanyang masa para maisa an panginabuhi ngan pampulitika nga kapukawan han katawhan ha mga rebolusyonaryo nga teritoryo. Hul-os ini nga kabaliktaran han buhis nga ginhuhuthot han Macapagal-Arroyo nga rehimen tikang ha nagtatrabaho nga katawhan Pilipino, nga nahingangadto la ha bursa han mga dagko nga pulitiko o ngadto ha budget han pasista nga militar o ngadto ha pagbibinayad hin langyaw nga utang.

Imbes nga igbinasol ha rebolusyonaryo nga kagiusan an kawaray kauswagan ngan kamurayawan ha katilingban Pilipino, sugad han ginyiyinakan ni Eric Avila ha Eastern Samar ngan iba pa, angay lugod ipaliwanag han 8th ID ha mga taga-Sinirangan Bisayas kun kay-ano nga ginsusuyop han AFP an dako nga parte han nasudnon nga badyet, samtang warikwik nala an nahingangadto ha mga pampubliko nga serbisyo sosyal sugad han edukasyon, pabalay, ngan panlawas. Dako nga baratunon liwat han AFP ha katawhan Pilipino kun kay-ano nga an bilyun-bilyon nga badyet militar in ginkukurakot man la ngahaw han mga higtaas nga upisyal hini.

An kamatuoran amo nga 88% han aton populasyon - o sobra 70 milyon nga Pilipino - in nabubuhi ha kakablasan. Bisan hi Gloria Macapagal-Arroyo ha iya SONA in napiritan magtug-an nga waray hiya signipikante nga igindurot nga pag-ursa han ekonomiya ngan kamutangan han nagkukuri nga katawhan. Nagtitikahilarum la an krisis tungod mismo han mga palisiya han rehimen nga Arroyo nga napabor ha mga agaron maytuna, burgesya kumprador ngan langyaw nga dagko nga kapitalista. Diri la kay diri gintatagad han rehimen an mga batakan nga araba han katawhan para ha tuna, trabaho, serbisyo-sosyal, kundi pirit pa gud nga ginpapasugbong ha ordinaryo nga molopyo an bug-at han krisis. Ha luyo nga bahin, padayon an waray-awod nga pagpinatakas ha pangawat ngan pangurakot han mga madumagko nga tawo nga aada ha poder, ha pangunguna na han mag-asawa nga Gloria & Mike Arroyo.

Umaraba man ha inhustisya ngan makig-away man para ha mga katungod an katawhan Pilipino - lakip na an mga junior officer ngan ordinaryo nga sundalo ha sakob mismo han AFP - madarahug naman nga tatapuon ini hin panmomoypoy ngan panmamasista han pwersa militar. Tikadamo nga katawhan Pilipino an napupukaw ha kamatuoran nga kinahanglan rumpagon ini nga diri na maiilob nga matiyupion, madarahug ngan bangkarote nga naghahadi nga sistema nga gintataglawasan han Macapagal-Arroyo nga rehimen. Ini an rason kun kay-ano nga padayon nga paspas nga nagkukusog an rebolusyonaryo nga armado nga pakig-away han katawhan Pilipino.

Desperado an 8th ID ha pagsurapo hini nga pagsulong han rebolusyonaryo nga kagiusan ha rehiyon ngan pipitad-pitad nga kahimulag han militar ha ranggo han katawhan. Karuyag igladawan han militar nga mga terorista nga akto an mga magdinaugon nga taktikal nga opensiba han NPA. Ginpapamatud-an han sunod-sunod nga reyd ha Calbiga, Samar, Quinapondan ngan Oras, Eastern Samar ngan ambus ha Catlbalogan, Samar nga istriko nga ginsusunod han NPA an mga internasyunal balaud ha gerra. Sahid mga lehitimo nga target-militar an gin-operasyunan han NPA. Ha mga taktika han pagsalakay, hitaas nga gintagad an kalibrehan han kinabuhi ngan propyedad han mga sibilyan. Testigo an mga survivor nga kapulisan ngan kasundaluhan han mga nasabi nga reyd nga ginrespetaran han NPA an mga katungod han mga sumurender, nasamaran ngan iba pa nga hors de combat. Kun hugot nga nahasog an NPA ha mga internasyunal nga balaud ha gerra mismo ha butnga han mapintas nga agway, asay pa ba ha balaud kontra ha pagrekluta hin mga menor-de-edad komo kombatant? Diri liwat madidiwara nga ini nga mga operasyon han NPA in nakatagamtam hin mahinungdanon ngan haluag nga suporta han masa han katawhan tikang ha pangangandam, aktwal nga pag-atake ngan tubtob ha pag-atras han mga Pula nga mangaraway.

Ha luyo nga bahin, an 8th ID mismo an angay papagbatunon para hin mga terorista nga akto ngan diri pagsunod han mga balaud ha gerra. An 19th Infantry Battalion ilarum han pagdudumara hini in kinahanglan magbaton para han pagmasaker hin unom nga sibilyan ngan tulo nga hors de combat nga NPA ha Kananga, Leyte. An 52nd IB in kinahanglan papagbatunon liwat han pagpatay hin mga sibilyan nga parag-uma ngan panunog hin propyedad han parag-uma ha Pinabacdao ngan Calbiga, Samar. An mga tropa-militar nga naglalansar hin special operations yana ha maabot 10 nga baryo han Calbiga, in nasalado hin pangukoy ha mga sibilyan nga parag-uma ha baryo ngan nag-iimponer hin baga-hamlet nga kaayusan ha mga taghimaryo. An 34th IB in nag-salvage hin usa nga ira gindakop nga mangaraway han NPA ha San Jose de Buan, Western Samar. Ngan ini ngatanan in naghihisgot pala han pinakamayor nga kaso han militar ha pagtalapas han katungod pantawo ngan international nga mga balaud ha gerra para han tuig 2003 ngan 2002.

Ginpapaabot han NDF an pagdapig ha katawhan ngan industriya han masmidya ha Sinirangan Bisayas ha pagdemanda han kamatuoran, tungod kay amo ini an kaangayan. An pagsarig ha mga buwa, hinimo-himo ngan waray-basaranan nga propaganda han mga saywar nga ahente han 8th ID ha sayop nga paghuna-huna nga makakabig nira an opinyon publiko kontra ha rebolusyonaryo nga kagiusan in dugang la nga nagbubuksas han pagigin diri-makatadungan han kontra-rebolusyonaryo nga gerra han rehimen Macapagal-Arroyo. ###

Back to top