Mga Operasyong Paggukod kang AL-GHOZI: Pantalya sa Rehimeng US-GMA Aron Padayong Mangatake sa Bangsamoro

Adan Sindapan
Spokesperson
National Democratic Front-Western Mindanao
Agosto 28, 2003

Ang National Democratic Front-Western Mindanao Region mikondenar sa militarisasyon sa mga erya sa Moro alang kunohay sa paggukod sa kombiktadong terorista nga si Fathur Rohman Al-Ghozi. Ang giingong pag-ikyas ni Al-Ghozi gikan sa labihan ka gwardyado nga Kampo Crame gimaneho ug usa ka binuhatan ni Gen. Angelo Reyes.

Usa kini ka desperadong lakang sa rehimeng US-Arroyo sa pagduso sa hinulhogan-sa-US nga gubat kontra terorismo dinhi sa nasud, ug ilang maniobra aron maluwas gikan sa kaulaw sa eleksyong 2004.

Walay kalainan sa opensiba sa Pikit diin ang AFP mipagarpar nga ilang gigukod ang Pentagon Gang, ang giingong pag-ikyas ni Al-Ghozi nahimong lisensya na usab sa pasistang rehimen aron langanon ang mga negosasyong pangkalinaw tali sa MILF ug pahamtangan og militarisasyon ang katawhang Moro. Ang AFP walay ulaw nga miakusar sa Moro Islamic Liberation Front (MILF) sa pagpasilong kang Al-Ghozi bisan pa sa pagkondenar sa MILF sa terorismo ug pagsalikway niini sa Al Qaeda ug Jemaah Islamiah.

Ang dili pa lamang dugay nga panagsangka tali sa AFP ug MILF didto sa Sultan Naga Dimaporo, Lanao del Norte ug ang pagsakmit sa mga tropa sa AFP sa Kampo Salaman Al-Farieshi sa MILF nagbutyag sa dautang laraw sa pundok Arroyo-Reyes sa tinuy� nga �pagbuh� kang Al-Ghozi.

*Niadtong Agosto 7, human naglunsad og operasyong paggukod ang AFP kang Al-Ghozi, si Major General Trifonio Salazar, hepe sa Task Force Tabak ug 1st Infantry Division Commander mipresentar ngadto sa media sa mga patay�ng lawas sa giingong mga manggugubat sa MILF nga napatay sa mga tropa sa Tabak. Ang alegasyon sa AFP nga usa kanila mao si Mukim Edris, kauban ni Al-Ghozi ug ang identidad sa ubang napatay dili mapamatud-an gumikan kay sila gilubong gilayon sa mando ni SND Mayor Motalib Dimaporo.

Walo ka tawo ang nawala human sa operasyon sa Tabak didto sa Barangay Bauyan, Sultan Naga Dimaporo. Ang liderato sa MILF miila kanila nga sila Sakib Esmail, Mohmin Abdul, Rasul Hasim, Jeran Ulanda, Gayson Ulanda, Siddiq Edris, Sapra Bago ug Mahmod Esmail. Mga non-combatant nga membro sila sumala sa MILF. Si Mahmod Esmail nakit-ang patay didto sa Brgy. Bansarvil 2, SND niadtong Agosto 8. Samtang ang mga patay�ng lawas nilang Jeran Ulanda, Gayson Ulanda, Sapra Bago ug Siddiq Edris nakaplagan sa mga kaparyentihan niadtong Agosto 18 sa Kumalarang, Zamboanga del Sur. Silang Sakib Esmail, Mohmin Abdul ug Rasul Hasim nagpabiling wala hikit-i.

Ang mga pamilya sa mga nawala ug gipatay hugtanong mipamatuod nga sila mga dili-armado dihang gidakop sa mga tropa sa Task Force Tabak ubos sa kamandoan sa usa ka Col. Rodriguez.

Si Maj. Gen. Salazar namahayag nga sila napatay sa usa ka lehitimong engkwentro. Apan dunay mga impormante gikan sa sulod nga mibutyag nga ang mga nawala nga nakaplagang patay gidala ug gidetiner sulod sa buhatan sa 1st Infantry Division sa Upper Pulacan, Labangan, Zamboanga del Sur. Niadtong Agosto 19, si Hadji Yunos Esmail, igsoon sa nawala nga Sakib Esmail gidagit usab didto sa Lapasan, Cagayan de Oro City sa mga armadong tawo nga lulan sa mga sakyanang walay plaka.

*Ang AFP midaub ug miguba sa mga kabalayan ug suplay sa pagkaon niadtong pag-atake sa SND ug gatosan ka mga sibilyan ang namakwit gikan sa gikahitaboan. Ang mga tigpaluyo sa kalinaw ug tawhanong katungod mibutyag nga niadtong pag-atake sa Camp Salaman tulo ka wala mailhing sibilyan ang gipatay usab sa Charlie Coy sa Task Force Tabak.

Ang terorismo sa estado sa rehimeng US-Arroyo nga gimandoan sa US adunay seryosong sangpotanan sa kasamtangang kahimtang sa kalinaw sa Mindanao. Mipahamtang kini og kadaut ug kamatayon ngadto sa mga lumulupyong Bangsamoro. Kini nagapakita lamang nga ang rehimen ug ang iyang militaristang mga laraw maoy usa sa pinakadako ug pinakabug-at nga babag sa pagkab-ot sa makatarunganong kalinaw dili lamang dinhi sa Mindanao kundili ingonman sa tibuok nasud.

Ang NDF-Western Mindanao Region nanawagan sa tanang makinasudnon ug progresibong pwersa sa Mindanao nga kusganong ibutyag ug batokan ang pagpanghanggat og gubat sa rehimeng US-GMA batok sa Bangsamoro ug sa entiro Mindanao.

Among ginaawhag ang relihiyosong mga pundok ug makinasudnong mga lokal nga opisyal nga maningkamot alang sa luwas nga pagbuhi sa mga gidagit ug magpahigayon og imbestigasyon sa padayong pagpangawala ug pagpamatay sa ordinaryo ug inosenteng mga Moro nga sibilyan, tanan sa ngalan sa hinulhogan-sa-US nga �gubat kontra terorismo.� ###