KA Bob: Isganan Nga Pulang Kumander, Bugal Sang Tumanduk Sa Panay

Jurie Guerrero
Spokesperson
Jose Percival Estocada Command
New People's Army-Central Panay
Pebrero 25, 2003

Sa tunga sang pagpangasubo, nagasaludar ang Jose Percival Estocada Command sa pagkabaganihan ni Ismaelito Giganto ukon Ka. Bob sa pagpursiger nga matigayon ang pinasahi nga taktikal nga opensiba sang Pebrero 24, 2003 sa Daan Sur, Tapaz, Capiz. Si Ka Bob nagtaliwan samtang maisog nga nagabato sa pinakamasupog kag pinakahanas nga mga tropa militar sang Task Force Panay agud lamang pangapinan ang interes sang mga pumuluyong pigos, labi na ang mga tumanduk sa Sentral nga Panay.

Sa malawig na nga tinuig, ginduso sang mga tumanduk ang tanan nga dagway sang pakig-away agud lamang mabawi ang duta sang ila katigulangan kag mapangapinan ang ila kabuhi batok sa mga nagapanghimulos kag nagapang-ulipon sa tumanduk sa ila dutang natawhan. Sa bulig sang Partido Komunista sang Pilipinas kag sang Bag-ong Hangaway sang Banwa (NPA), nakanuto ang mga pumuluyo nga mag-organisa sa kaugalingon, magtuon sang mga prinsipyo, magbinuligay sa produksyon, magprotesta sa mga dalanon, kag magsakdag sa rebolusyon tubtob sa pag-entra sa hangaway sang banwa. Namuklat kag naghiliusa ang pumuluyo nga mapanumbalik ang ila dignidad, maagom ang kahilwayan kag mapauswag ang ila pangabuhi. Ang ginsabat sang reaksyunaryong gubyerno sa paghimakas sang pumuluyo waay liwan kundi ang mapintas nga militarisasyon, pagpangsunog sa mga pamalay, pangsamad sa mga panananum, pagpangbomba sa mga kabaryuhanan, panakaw, pamuyong, pangdakop kag pamatay sa mga sibilyan. Ini nga malaparan nga kapintas ukon etnosidyo nagatuyo nga papason ang mga tumanduk agud maburaw sang naghaharing sahi ang duna nga manggad sa kabukiran.

Ang inagihan sa militarisasyon mismo ang nagtudlo sa pumuluyong tumanduk nga wala sang masaligan nga banas sa pagbawi sa duta kag pag-agom sa matuod-tuod nga kahilwayan luwas sa armadong paghimakas. Isa si Ka Bob sa isganan nga mga tumanduk nga walay pagpangduha-duha nga nag-uyat sang armas, naghimud-os sa rebolusyon, kag naghalad sang kabuhi sa pag-alagad sa pumuluyo.

Sa kabuhi kag tubtob sa kamatayon, ginpamatud-an ni Ka Bob ang iya lubos nga paghakos sa paghimakas sang mga tumanduk para sa pagbawi sa duta sang katigulangan halin sa nang-agaw nga mapiguson nga reaksyunaryong gubyerno kag mga dumuluong nga korporasyon kag ang manugpatuman sini nga 3ID, PA. Ginpakita ni Ka Bob nga ang mga tumanduk indi na magpasugot nga mentras tanto himuon lang nga ulipon.

Apang indi lang ini. Sa iya pagpangapin sa interes sang mga tumanduk ginsulong man ni Ka Bob ang pag-alagad sa interes sang bilog nga masang anakbalhas, tumanduk kag syudadnon, bukidnon kag balodnon, batok sa pagpanghimulos kag pagpamigos sang imperyalismong US, mga dalagku nga agalon nga mayduta, kag mga dalagku nga garok nga pulitiko. Isa siya ka matuod-tuod nga rebolusyonaryo nga lider, bugal sang tumanduk sa Panay.

Ginakalipay sang reaksyunaryong militar kag sang ila mga idu-ido ang magmulay kay Ka Bob bisan sa panahon sang pagpangasubo sang iya pamilya kag mga abyan. Sa ila paghuna-huna, mahinabunan sang pagpakanubo kay Ka Bob ang kadalag-an nga naagom sang pumuluyo sa pagpapas sa yunit sang SOT. Sa ila makitid nga pamensaron, nagadamgo sila nga ang kamatayon ni Ka Bob makapahuyang sa paghimakas sang tumanduk Sa matuod, inspirasyon si Ka Bob sa labi nga pagbaskog sang paghimakas, sa pagpadayon sang madamo pa nga Ka Bob sa pagsulong sang rebolusyon.

Back to top