Bag-o nga duso han RSOT dako nga pakyas, kabangis han militar haluagan

Efren Martires Command
New People's Army - Eastern Visayas
Setyembre 02, 2004

Malinampuson nga napapakyas han NPA an mga larang han AFP, ngan ura-ura nga nangangalas an katawhan han mga pagtalapas han mga tawhanon nga katungod ha proseso han kanan militar operasyon, nga an kanan 8th Infantry Division hepe han civil relations Maj. Neneveigh Alcovindas in waray na nasisiring ha pagdepensa han ira kontra-rebolusyunaryo nga kampanya kakulop ha Radyo Diwa. Waray bisan usa nga Pula nga mangaraway an namatay ha luyo han waray wantas nga operasyon han militar, nga may pangilal-an han "reengineered" special operations teams o RSOT, ha tulo nga probinsya ha Samar tikang han Mayo tubtob Agosto 2004. Ha luyo nga bahin, 24 nga sundalo han Army an namatay ha aksyon ngan damo pa an nasamaran ha aksyon durante hini nga panahon. An masunod in listahan han mga engkwentro tikang han Mayo giutan han NPA ngan AFP ha mga probinsya han Samar:

Mayo 5. Brgy. Palanit, San Isidro, Northern Samar. Upat nga Pula nga mangaraway an nakamatay hin unom ngada walo nga sundalo han masobra 40 nga elemento han 20th IB an umatake ha usa nga taktikal nga base han NPA.

Hunyo 4. Amantacop, Borongan, Eastern Samar. Gin-ambush han mga Pula nga mangaraway an usa nga platun han 14th IB ngan nakamatay hin duha nga sundalo ngan nakasamad hin usa pa,

Hunyo12. Usa nga baryo ha Maslog, Eastern Samar. Usa nga pinaguti nga platun han NPA an gin-atake han mga elemento han 14th IB ngan Scout Rangers pero naka-eskapo hin waray manla hibang. Lugod, usa nga sundalo an namatay ngan usa pa an seryoso nga nasamaran.

Hunyo 16. Usa nga baryo ha Maslog. Nakamatay an mga Pula nga mangaraway hin lima nga sundalo ngan nakasamad hin duha pa kahuman

Hulyo 4. Usa nga baryo ha Dolores, Eastern Samar. Gin-raid hin masobra 40 nga sundalo han 14th ngan 63rd IB an usa nga iskwad han NPA, pero naka-eskapo ini hin waray hibang. Napatay an commanding officer han mga sundalo han magkamay-ada misencounter an duha nga yunit han militar.

Hulyo 6. Brgy. Makatingog, Calbayog City, W. Samar. Gin-isnayp han mga Pula nga mangaraway an usa nga yunit han 20th IB ngan nakamatay hin duha nga sundalo ngan nakasamad hin damo pa nga iba.

Hulyo 11. Brgy. Cagdao, Silvino Lobos, N. Samar. Ginpakyas han mga Pula nga mangaraway an reyd han kaaway ngan nakamatay pa hin duha nga sundalo ngan nakasamad hin iba pa tikang ha 63rd IB.

Agosto 2. Giutan han Catarman, N. Samar ngan Calbayog City, W. Samar. Duha nga iskwad han Pula nga mangaraway an nakaatras nga waray patay o samaran, samtang tulo nga sundalo an namatay ngan lima pa an seryoso nga nasamaran kahuman an 80 nga tropa han 20th IB in umatake ha kampo han NPA.

Pinaagi han paghasog han panmaihaan nga gerra han katawhan, nahihimo pakyason han NPA an kanan kaaway "war of quick decision" (gerra nga madagmit nga ginhuhuman). Pukaw an NPA han pagreserbar han iya pwersa ngan pagtirok hin kusog ha hilaba nga panahon pinaagi han haluagan ngan sik-on nga ginerilya nga pakig-away. Nasuporta an katawhan ha NPA tungod han pagpatuman hini han agraryo nga rebolusyon ngan paghatag-gahum ha ira pinaagi han pagtukod han kanan katawhan demokratiko nga gubyerno ha kabaryuhan. Ha damo han mga nailaygay ha igbaw, an mga parag-uma mismo an nag-alerto han NPA han presensya han yunit han kaaway ngan naghatag han pagkaon ngan talwas nga atrasan para han mga Pula nga mangaraway. An AFP in nakikig-away hin pangontra nga diri hini nakikita o nakakatinan ngan an mga opensiba hini in suntok la ha hangin.

Samtang inutil kontra han NPA, talawan nga ginmumurangtan han mga tropa han 8th ID an mga inosente nga sibilyan pinaagi hin paghimo hin tinagdagmo nga pangabuso. Ini nga mga kaso in ginkokonsolida para isalawad an reklamo didto ha GRP-NDFP Joint Monitoring Committee kontra han mga tagapagtalapas han katungod pantawo ngan internasyunal nga makatawo nga balaud. Harapaw nga ginsireng ni Maj. Alcovindas nga ini nga mga panalapas han tawhanon nga katungod in ginhimo la han pipira nga "bugok nga bonay" ha AFP ngan mahihimo nira ini makuha ha ira ranggo. Kundi ha kamatuuran, laktod nga igintutugutan han gubyerno ni Arroyo ini nga mga pangabuso nga magpadayon ngan lugod ginpapasidunggan an mga kilalado nga berdugo sugad kan Gen. Jovito Palparan, nga di pala maiha gintudlok komo hepe han Philippine Army ha luyo han madugo hini nga rekord ha Mindoro, ngan han battalion commander han 19th IB nga hi Lt. Col. Oscar Lactao, nga nakakuha lugod hin study leave tikadto ha US para trabahuon an iya promosyon han naglabay nga tuig ha luyo han pagmasaker han iya tropa han siyam nga nadakop nga Pula nga mangaraway ngan sibilyan ha Kananga, Leyte.

An RSOT, nga ginhimo han AFP han 2001, an ikatulo han recycled nga serye han mga Special Operations Teams nga syahan ginlansar han pasista nga estado kontra han rebolusyunaryo nga kagiusan han dekada 1990. Kinaiya hini an pag-gamit hin tinagdagko nga ihap hin mga tropa (oversized platoons o company) nga nagsasaru-saliwan ha usa nga sustenido nga operasyon nga nahagos hin unom ka-bulan kutob usa ka-tuig ha pinili nga mga lugar nga gintatahapan han AFP nga base han rebolusyon. Nagtutukod liwat hira hin pukot-paniktik para mag-espiya ha NPA, dungan an paghimo hin mga civil-military nga operasyon sugad han pagtutdo ha litarasiya ngan medikal ngan dental missions, nga ha kamatuuran mapanhibang nga operasyon para lipaton an katawhan ngan sabotahion an ira organisado nga pagkaurusa.#

Para han kumpirmasyon, kontaka hi:
Roy Santos, NDF-EV Media Liaison Officer
Cellphone No. 0918-3112138