Bahin sa pagkiha sang mga utok kag nagkomiter sang pagdukot sa kanday Ma. Luisa Posa-Dominado kag Nilo Arado

Julian Paisano
Tagapagsalita
Coronacion "Waling-Waling" Chiva Command
NPA-Panay
Disyembre 10, 2007

Sa adlaw sang komemorasyon sang Kinamatarong Pangtawhanon sa kalibutan luyag sang NPA sa Panay nga makaamot sa paghimakas para sa hustisya sa mga nabiktima sang paglapas sa ini nga mga kinamatarong. Pormal nga ginkiha sang "Waling-waling" Komand sa Korte sang Pumuluyo sa sala nga pagdukot kanday Ma. Luisa Posa-Dominado kag Nilo Arado, legal nga mga aktibista sang mga organisasyon sang pumuluyo, sang Abril 12, 2007 ang mga masunod:

1. Kol. Noel Buan sang Internal Security Group(ISG) sang Philippine Army

2. Kol. Marianito Perez sang Military Intelligence Battalion (MIB), 3ID, PA

3. Major General Juvenal Narcise, Comanding Officer sang 3rd Infantry Division (3ID)

4. Captain Lowen Gil Marquez, tagapamaba sang 3rd Infantry Division

5. Demetrio "Hugo" Capilastique sang RPA, espesyal nga CAFGU sang Phil Army

6. Sekretaryo Norberto Gonzalez, National Sercurity Adviser ni Gloria Macapagal Arroyo kag pila ka upod pa sini sa Cluster E sang Gabinete

7. Presidente Gloria Macapagal Arroyo

8. Pila ka John Does nga sa subong indi pa mamensyonar pero nagpartisipar sa amo nga pagdukot

Ginapadayon pa ang imbestigasyon kag mahimo mapasaka pa ang dugang nga mga kiha sa nasambit sa posible sala sang pag-torture kag pagpatay sa duha kon matipon pa ang dugang nga mga testimonya kag ebidensya sa kapat-uran sang amo nga kasaypanan. Lakip man nga kiha ang pagtinguha nga pagpatay kay Leeboy Garachico.

Duha pa lang diri ang na-indict sa sala sang paghinago kag pagsugyot nga magpatay bangod sa kadepinido na ang datus nga sila mismo ang nagapakita sa publiko. Ang mga nasambit nga may kiha, mga armado nga elemento sang estado nga daan na gani nga lehitimo nga target sa mga taktikal nga opensiba sang NPA. Ang iban sa ila may mga kiha kag indictment man sa pagpamatay, pagtorture kag rape sang pumuluyo sa iban nga lugar pareho kanday Kol. Noel Buan, Hugo Capilastique, Captain Lowen Gil Marquez.

Ang mga prinsipal gid sa kaso amo man ang mga yabi nga tawo sang rehimen Arroyo nga nagpadihot sang napaslawan nga Oplan Bantay Laya(OBL) I kag OBL II. Bangod sini, sila kag ang ila reaksyonaryo nga Armado nga Kusog sang Pilipinas (AFP) ang may salabton sa sobra 800 nga extrajudicial nga pagpamatay nga ginbuyagyag na sang United Nations Rapporteur, Professor Alston, sa Human Rights Council sini. Amo man sa indi pag-ako nila sang ila responsibilidad sa pagpamatay.

Indi mahimo mapahayag ang madamo nga nakuha nga datus sa mga testigo bangod sa katalagman sang pag-salvage sa mga ini. Pila sa mga testigo ara mismo sa gubyerno kag may mga elemento man sang armadong kusog sang estado nga indi na makabatas sa kapintas kag katuso sang ila organisasyon mismo. Gani pila lang diri nga yabi nga testimonya/konklusyon ang mahimo mapagwa.

Ang mga masunod ang pila lang ka mabuyagyag nga basihan sang pagkiha kag pag-indict sa kada nakiha:

1. Kol. Noel Buan, PA-ISG -- Ang presensya niya namutikan antes sang hitabo kag kahimbon siya sa padihot sa pagtukod sang "death squad" kag paglikida sang mga lider sang rebolusyonaryo nga hublag sa Panay. Naimbolbar man ini siya sa probokasyon sang pagsunog sang produksyon center sang Bayan Muna sa Villa, syudad sang Iloilo sa lote nanday Luisa Posa antes sang insidente.

2. Kol. Marianito Perez, MIB -- naghimbon upod kay Kol. Buan kag sa iban pa nga aktwal nga nagkomiter sang pagbangga kag pagdukot. Nalagyo sa mando sang iya HQ (isa ka palatandaan sang kasal-anan) kag waay gani nag-atubang sa habeas corpus nga kaso nga sa diin ginmando sang reaksyonaryo nga korte sa iya nga mag-atubang.

   May motibo ang Kol. Buan kag Kol. Perez nga magdukot bangod sa patakaran sang rehimen kag sa mando sa ila. Pero ang personal nga motibo nila amo ang pagtimalos sa ila kahuy-anan kag dumot sa gintuga nga kaswalidad sa ila yunit sang NPA sa pag-ambus sa Calinog sang Nobyembre 19, 2005. Sa amo nga insidente, Komander sang 1st Scout Ranger Battalion kag 47th Infantry battalion ang duha ka dati magkaklase sa Philippine Military Academy. Bangod indi nila maigo ang NPA, ginpaupok nila ang ila kapaslawan sa mga legal nga aktibista nga waay labot sa insidente kag waay sang inugbato nga armas.

3. Major General Juvenal Narcise -- Sa iya ang komand responsibility nga nagpahanugot sa pagtuga sining pagpamintas sa mga legal nga aktibista nga waay ginmeteran sa Panay sang mga nauna nga mga Komander sang 3ID nga iya binuslan. Salabton man niya ang kuno "pagsaylo" sa kay Kol. Perez kag ang paghinago sang ila krimen paagi sa pagpakunokuno nga magahatag sang P100,000 bilang padya sa pagkadakop kuno sang nagkomiter. Responsibilidad man niya ang mga pagsugyot sa pagpatay/dukot sang mga ligal nga aktibista nga ginangasal sang iya tagpamaba nga si Captain Marquez ang paghinago sang krimen paagi sa baliskad nga pagpasibangud sa NPA mismo! Napamatud-an nga may probable cause nga ma-indict siya sa amo nga sala.

4. Captain Lowen Gil Marquez -- nagsugyot sang paghalit (pagpatay/ dukot) sa mga legal nga aktibista, mga lider sang progresibo nga Party-list kag organisasyon masa sa patarasak nga pagbansag sa ila bilang "prente" sang NPA. Tubtob subong waay untat ang pagpamansag niya nga mga tag-suporta sang rebolusyonaryo nga hublag ang mga kandidato kag nagdalaog nga kapitanes sang baranggay nga ang solo nga "sala" amo nga kakontra sila sa burgis nga pulitika sang mga ginpaboran sang militar o ni Major Marquez mismo. Instrumento man siya sa paghinago sang krimen paagi sa pagpanginwala, kag dayon malisyoso nga pagpasibangud sa NPA nga amo kuno ang nagbiktima sa iya ginabansagan sadto nga tagsakdag sang NPA mismo. Nagpadihot, nagpartisipar pa sa pagpicket nga nakabonnet sa isa ka pagtililipon sang nagapinangita sa kanday Luisa kag Nilo kag pilit nga ginabasol sa NPA ang natabo. Maathag nga may probable cause sa pag-indict sa kay Marquez, base sa pampubliko sini nga pahayag kag buhat, sa pagsugyot sa pagdukot sa duha ka aktibista kag paghinago sang krimen.

5. Demetrio Capilastique alias Hugo -- may supisyente nga testimonya nga nakighimbon ini sa kanday Kol Buan kag Perez sa pagserbe bilang isa ka lider sang "death squad" nga may papel sa pagdukot sa kanday Luisa kag Nilo. May mga ebidensya nga may papel ang grupo sini sa pagcasing sa mga biktima antes sang pagdukot tubtob sa pagdukot mismo.

6. Sekretaryo Norberto Gonzalez -- direkta nga may papel sa pagpahanugot sa pagdukot sa kanday Luisa kag Nilo.

7. Ang rehimen Arroyo kag ang mga pangunahon nga tinawo sini sa Cluster E sa Gabinete may salabton sa tanan nga nangin biktima sang pagpatay kag pagdukot sang rehimen. Husgahan sila sang kasaysayan kag sang pumuluyo sa mas masangkad nga kriminalidad kag brutalidad nga ila nakomiter nga sa diin isa lang ka instansya ang pagdukot sa kanday Luisa kag Nilo.

Ang ini nga pagkiha kag pag-indict ginpalab-ot na sa pungsudnon nga pamunuan sang Partido Komunista sang Pilipinas kag sang NPA. Ginamanduan na ang tanan nga yunit sang NPA sa Panay nga arestuhon kag paatubangon sa Korte sang Pumuluyo para manabat sang ila krimen ang mga nasambit nga mga akusado. Ginaabisuhan ang publiko nga ang mga nasambit nga akusado armado kag makatalagam gani ipaabot sa natungdan nga otoridad sang rebolusyonaryo nga hublag ang kon ano nga impormasyon bahin sa ila kag maglikaw nga mag-upod sa ila para indi malamita.

Julian Paisano
Tagpamaba
Coronacion "Waling-waling" Chiva Rehiyonal nga Komand sa Operasyon
NPA Panay Region
Disyembre 10, 2007