Anuman ang hugis ng mga bundok sila'y mistulang sapad at mababa habang kaming basa sa hamog ng gabi'y papalayo sa napakatandang gubat. Abuhing malamlam ang kislap ng aming mga baril sa liwanag ng buwan; tulad ng nakagawia'y sumanib kami sa mga aninong ngayon lamang nasumpungan. Sa may kalayuan, bumubuo ang kayumangging palayan ng malikaw na pinitak, at ang tubuha'y nakalatag hanggang sa abot-tanaw- nakapaninibago sa unang malas ang kapatagan ng aming mga pangarapin!   (Sansaglit, may kung ano pang pananabik, aming nilingon ang napakataas na Taganhin, naghahari sa mga distrito ng baku-bakong mga bundok, at kami'y napangiti ... )   Sa malayo'y umilanlang ang uyayi ng umaga- hayun! sa kulumpon ng kawayang nakahilig sa makinang na dalisdis sa sinapupunan ng sapang mahiwaga't madilim paalun-alon ang sinag ng liwanag mula sa mga kubong layu-layo't di pa nasisilungan, kumakaway sa mga Pulang manlalakbay ng gabi.   Pasa bilis! hudyat ng lider ng aming iskwad. Nagkapakpak ang aming mga paa, bumilis ang pagtibok ng aming mga puso habang kami'y hinihila pasilangan. ng ihip ng kanta, palapit nang palapit sa lupang sakop ng mga asyenda.... (K.M.)