|
Servando Magbanua 22 Agosto 1977
:Halad kay Waling-waling
Waling-waling.
Bulak sa talon nga tumalagsahon.
Maidlas. Makahas. Maamyon.
Mutya sang Jalaud sa sining dinag-on
Hangaway'ng dumaan nga labing magayon.
(Pamatii, Kaupod, sa bukid kag latagon
Ang pagtangis sang masa sa imo kamatayon
Dugo mong ginhalad sa ngalan sang rebolusyon
Dugang nga kaisog namon, dugang nga kalig-on')
Waling-waling:
Ang mga makahang nga tinaga mo
Sa tutunlan sang kaaway, matalom nga sanduko
Samtang sa masa ang gin-amba nimo
Tulalay sang paghilway nga labing malulo.
(Ang pagtangis, Kaupod, amon na ginatapos
Ang ginbilin mo sa amon binaid nga dumot
Dugo mo naghawan sang banas nga masiot
Bataan nga panaad, amon ang pagtimalos!)
Waling-waling!
Tubtob katubtuban ka pagahandumon.
Pagapadunggan ka, pagadayawon.
Sa kaidlas. Sa kakahas. Sa kaamyon.
Martir sang rebolusyon. Tumalagsahon.
Mabuhi ka!
|
|