|
Servando Magbanua 25 Marso 1978
Pamat-ud
(Kay Kaupod Maone)
1. utod ko sa sahi:
isa ka pat-ud nga tion
sa imo kabuhi
ang nagpamattuod
sang imo kaputli.
bisan nag-ibwal ang kalayo
sa utbong sang ila pusil
labaw pa ang kalayo
sa imo dughan- busa kilat
ang pamat-ud
nga indi na magbalik
sa kahapon nga napun-an
sang tuman nga pagtampalas.
2 utod ko sa sahi:
isa ka pat-ud nga tion
sa imo kabuhi
ang nagpamatuod
sang layi sang rebolusyon.
bisan napukan ka karon
kag ang kalayo mo napalong
sa amon tagipusuon
diri pagabuhion - busa yari
ang pamat-ud
nga hinganiban pagahugton
sa kabuhi-kag-kamatayon
nga pagpakigsumpong
batok sa kaaway
tubtob nga maagum
ang langit sang paghilway!
|
|