Ngayong ako'y nandito At ika'y naririyan Tuwing umaga'y tangan ko ang pahayagan. Sulyap sa petsa Tutok sa hedlayn At gagapangin ng mga mata Ang mga balita. Minsa'y may nagkukubling kaba Lalo't sa lugar na banggit Ay naroroon ka. Nagkaroon na naman daw ng tambang Di tiyak ang bilang ng mga sugatan Di na umabot sa ospital Ang mga napalabang bayaran. Tiklop na ang dyaryo Pangamba'y dama ko pa rin. Maayos kaya ang pagkakaatras ninyo? Naisip ko, Higit na tunton ng mga kasama Ang kasukalan. Muling bubuklatin ang mga pahina Di ka makawala sa isip ko At ako'y matatauhan Kaydaming pangyayaring di ibabalita ng pahayagan Mga tagumpay ng masa't hukbo sa kanayunan.