Isinilang kang hubad Sa ugali at muwang; Sa 'yo namang paglaki, Isip mo'y natatakan.   Noong ihinahanda ka Sa sariling paghakbang, Isip, gawi ay nahubog At tunay na nasalalay...   Sa uri ng mga kamay Na sa iyo ay gumabay- Kamay bang nagpapakain? nagmamandong ipaghain?   May sarili ka nang isip; Ngunit marka'y nakikintal Ng ginagawa ngayon Ng iyong mga kamay   Sila ba ay bumubuhay? O batay sa minamay-ari'y Kumakamal, nakapang-aagaw? At, sa papaanong paraan?   Mahigpit nga. itong ugnayan Ng isip at karanasan, Ng iyong ugali at ng uri Ng iyong mga kamay.