Ti Pannakaperdi ti Monumento ni Marcos
Martin Montana Chadli Molintas Command New People's Army Ilocos-Cordillera Region
Disyembre 29, 2002
Ti monumento ni Marcos idiay Taloy Sur, Tuba, Benguet ket monumento ti absoluto a kinaarogante ken kinalastog ti maysa a diktador. Naiyablat kadatayo nga umili a Pilipino 29 a tawen ti napalabasen. Maysa a gaddil iti daga nga ansestral a pagnanaedan dagiti umili nga Ibaloy. Maysa a nakabutbuteng a palagip kadagiti nakadakdakes a krimen da Marcos kadagiti umili. Maysa a makapasarua a banag a kinasapulan a maikkat.
Naikkat koma idi pay narippuog ti turay da Marcos babaen iti People Power idi 1986. Ngem awan ti politikal a pangngeddeng ti rehimen a Cory Aquino a mangtumba, ken nakarkaro pay, mangisaklang iti utek ti pannakapapatay iti asawa na ken ti dadduma pay a di mabilang a biktima ti diktadura a Marcos. Imbes, ti patakaran a sinurot na ket pannakikumplot kadagiti Marcos ken dagiti kroni da. Pareho a patakaran ti sinurot da Ramos, Estrada, ken Macapagal-Arroyo, iti gagar da a sublaten ti ginamgamrud da Marcos a kinabaknang. Ti agtultuloy a panagtalinaed ti monumento ni Marcos ket pananglais iti hustisya ken panangtraydor iti pagayatan ti umili. Ti panagsubli da Marcos iti turay ket sakrilehiyo iti di mabilang a martir a limmaban ken nangibuwis iti biag da para iti nailian a wayawaya ken demokrasya kadagidi nasipnget a panawen ti martial law.
Makasugkaren ti umili a Pilipino iti agtultuloy a paspasaw da Marcos - ti nakakatkatawa a panangiyarig da iti bag� da kenni Malakas ken Maganda, ti puskol-rupa a panagpammarang da a nadaraan ti maharlika, dagiti peke a medalya ni Marcos iti gubat, ti makapaseggar a bangkay na a naka-freezer, dagiti agmauyong a sasao ni Imelda ken ipokrita a lua na tapno agpammarang nga inosente, dagiti kinaulbod kadagiti panid ti pakasaritaan a mangpadpadayaw kadagiti Marcos - amin dagitoy ket rumbeng a maibutaktak ken mapunas.
Ti panangperdi ti CPP-NPA iti monumento ni Marcos ket umuna ken simboliko pay laeng nga addang. Maysa a nalaad a palagip a saan pay a nadusa dagiti Marcos kadagiti krimen da. Maysa a palagip a dagiti ramut a problema nga imperyalismo nga US, pyudalismo, ken burukrata kapitalismo a mangparparigat kadagiti umili ket saan pay a naparut. Kabaelan ti People Power a rippuogen ti maysa a kurakot ken bulok a rehimen, ngem ti laeng gubat ti umili ti makabael a naan-an�y a mangparmek ken mangdalus iti rugit ken kinaruker ditoy pagilian. Uray pay mabaliw-baliwan ti presidente no agtaltalinaed met ti daan a sistema, awan serbi na.
Narigat a tumbaen ti monumento ni Marcos. Kas karigat ti rebolusyonaryo a pananangbalbaliw iti kagimongan agturong iti pudpudno a nailian a wayawaya ken demokrasya ti umili. Ngem uray dagiti "nabaked a republika" ket di-maliklikan a marippuog, gapu ta nakabatay iti narukop a pundasyon, nakabatay iti panangidadanes, panaggundaway, ken pananglabsing iti hustisya. Awan ti makalapped iti bileg ti umili ken ti rebolusyon.
Sapay koma ta napnuan rebolusyonaryo a tarigagay ken namnama ti Paskua dagiti amin nga umili a Pilipino a mangipatpateg iti wayawaya!###
[Download PDF]
Back to top
|