Basbas sa mga Bantay Salakay

Diego Daguhoy
Komiteng Tagpatuman
Komite Rehiyunal
Partido Komunista sang Pilipinas
Isla sang Negros
Setyembre 13, 2003

Pagbasbas sa mga bantay-salakay upod ang pagpasa sang promisa sang Government of the Republic of the Philippines (GRP) sa pangabuhian sang Revolutionary Proletarian Army- Alex Boncayao Brigade (RPA-ABB) sa Local Government Unit (LGU). Ini ang kahulugan sang ideya nga bag-o lang ginasuportahan ni Gob. Joseph Maranon nga wala sang athag nga basehan, sang pag-deputize sa RPA-ABB agud mangin Bantay Bukid Brigade.

Nabal-an na sang halos tanan ang iskandalo sang pagkalbo sang kabukiran sang banwa sang Don Salvador Benedicto (DSB) sa diin ang RPA-ABB, sa pagkonsabuhay sa lokal nga otoridad nga ginasaligan nga amo tani ang magprotehir sang kalasangan sa nasambit nga banwa, amo pa ang nagpanguna sa illigal nga pagpang-utod sang kahoy. Imposible nga indi mabal-an ang pagdinulhog sang trak-trak sang tablon nga dira mismo nagaagi sa kilid sang ila hedkwarter.

Kag ano ang nakaon sang subong nga upisyales sang DENR nga gulpi ini nagbunggo sa ginbuslan nga upisyales nga nag-akusar sa RPA-ABB nga amo ang responsable sa pagkalbo sang Bagong Silang?

Kon aton madumduman, may ginhimo nga drama ang RPA-ABB kag GRP sa porma sang pagpirmahanay sang Peace Agreement. Sa sini nga drama nagpromisa ang GRP nga hatagan sang P500 M ang RPA-ABB para sa ila pangabuhian kabaylo sang ila pagpormalisa sang ila madugay na nga pagsurender. Tubtub subong ang RPA-ABB nagapakilimos sa GRP. Ang GRP naman bangud sang kulang sang pondo kay halos naubos na sa kurakot, nagpasa sini nga responsibilidad sa LGU sang 3rd District nga ang pundo sini indi gani makaigo para sa paghatag sang supisyente nga serbisyo sosyal sa ila nasakpan.

Dugang ini nga halit sa pumuluyo sa nasambit nga lugar kag sa pumuluyong Pilipino sa kabilugan.

Ang pagbaton sang RPA-ABB sa amo nga hilikuton wala huya nga pagkumpirma sang ila nga pagka special CAFGU nga nagapagamit sa nagahari nga sahi sa pagpamigos kag paghimulos sa malapad nga pumuluyo. Dugang ini nga pamatuod nga wala na sila sang rason nga magpapati pa nga rebolusyonaryo.

Nagakadapat lang nga ini nga plano pamatukan sang pumuluyo. Kon madayon ini ang bukid labi pa nga makalbo indi lang sa DSB kundi pati na sa sakop sang 3rd District.###

Back to top