Isaulog Ang Kwarenta Ka Tuig Nga Paghimakas Sang Npa! Magdungan Sa Pag-Abanse Sa Mas Mataas Nga Lebel Sang Inaway Banwa!

Ang Coronacion Waling-waling Chiva Command nagabuylog sa pagsaulog sang ika-kwarenta nga anibersaryo sang NPA. Ginasaulog ang padayon nga pagpaslaw sang NPA sa masingki nga atake sang 3ID, PA sa disenyo sang Oplan Bantay Laya 2, kag ang hugot nga pagpakighiliusa sa pumuluyo nga amo ang nagahatag sang kapagsik sa pagsaka sa mas mataas nga lebel sang inaway banwa.

Indi lang ang Oplan Bantay Laya ang napaslaw sang NPA, kundi ang kwarenta ka tuig nga padihot sang kaaway sa pagpusa sa rebolusyonaryo nga kahublagan. Halin sa mga PC kag "kumando" sang dekada sitenta diri sa Panay hasta sa mga Division Reconnaisance Company kag Scout Rangers subong, wala mataltal ang hugot nga paghiliusa sang pumuluyo kag NPA. Ini bangud ang NPA ang nagalunsar sang makatarungan nga inaway banwa kag tunay nga nagaalagad sa pumuluyo samtang ang AFP nagaalagad sa mga manugpigos kag kontra sa pumuluyo. Gani, wala sang mahimo ang AFP kundi liwat-liwaton lang ang mga gasgas sini nga taktika nga napaslaw na nga daan sang rebolusyonaryong hangaway kag masa.

Sa Oplan Bantay Laya 2, ang mga recycled nga taktika nga RSOT kag intel commando sang 3ID nga naga-ilog-ilog kag pakuno-kuno nga NPA naka-agom man sang mga recycled nga resulta -- sa ginapabugal nga narekrut nga mga CAFGU subong madamo ang daan nga nagbalik nga madugay na nga ginasuka sang pumuluyo. Ang mga ginapasikat sa media nga mga surrenderee kalabanan daan man nga mga rebel returnee nga kapila na ginpasurender. May iban gani nga tigbaynte ka tuig na nga nagbiya sa rebolusyonaryo nga kahublagan. Wala sang bisan isa ka baryo nga nabungkag sang militar sa bilog nga kampanya sini nga OBL.

Sa baylo, sining tuig, liwat nga nagdaku sang kapin 30 porsyento ang rebolusyonaryong baseng masa kag nagsaka ang kapasidad sang ila mga organisasyon. Nagtukod sang bag-o nga mga asosasyon sang mangunguma nga amo ang nagahanas sa mga pumuluyo sa pag-areglo sa mga problema sa baryo halin sa produksyon, katawhay kag kalinong, edukasyon, kag ikaayong-lawas. Ang mga rebolusyonaryo nga organisasyon masa man ang nagtindog nga taludtod sang masa pareho sa pagpangapin sa dutang tumanduk nga pilit nga ginaagaw sang 3ID diri sa Panay.

Sa pagka-desperado sang AFP nga magpakita sang mga resulta, ang mga pakuno-kuno nga pagsurender ginadunganan pa sang paltik nga mga engkwentro samtang ginatago ang matuodtuod nila nga mga kaswalti pareho sang natabu nga engkwentro sa Buri kag Aglinab, sa Tapaz, Capiz sa diin ang demoralisado nila nga tropa ang nagtiniruhay.

Nagayapa-yapa nga ginsuportahan sang AFP ang pagtampalas sang US sa dutang tumanduk para sa Balance Piston 09-1 sa diin ginpahalin ang mga mangunguma sa ila mga puluy-an agud lang makapalupok sang mga bomba ang mga dumuluong. Natublag ang pangabuhi kag pagpananum sang pumuluyong tumanduk kag may ara pa nga na-shock.

Samtang, ang NPA padayon nga nagpanggamot sa mas madamo nga banwa kag baryo sa mga daan kag bag-o nga lugar sa Panay, nagbakod, nagtubo kag nagapanibag-ong kusog sa ikaduha kag ikatatlo nga henerasyon sang mga pulang hangaway. Halin sang magsugod ang Oplan Bantay Laya sang 2002, nagdugang sang sobra pilo ang katapuan sang regular nga hangaway kag naglab-ot sa duha ka batalyon ang milisya sa lokalidad. Nakalunsar sang 66 ka taktikal nga opensiba sa diin 40 ka tropang militar kag para-militar ang napatay kag 46 ka lain-lain nga kalibre nga pusil ang nakumpiska.

Bastante ang ikasarang sang NPA sa Panay nga maglukso sa mas mataas nga lebel sang inaway banwa. Subong nga tuig, mapagsik nga tigayunon sini ang pagduso sa mga rekisitos sang pagpabakud sa mga kumpanya-kadaku nga prente: padamuon kag palig-onon pa gid ang mga organisasyong masa, padakuon ang pwersa sang hangaway kag magalunsar sang mas madamo nga mga taktikal nga opensiba. Pat-ud ang pagpaslaw sa ulihi nga mga tinuig sang Oplan Bantay Laya 2 sa bilog nga pungsod kag diri sa Panay.

Julian Paisano
Tigpamaba
Coronacion "Waling-waling" Chiva Command
NPA-Panay


Back to top