Bisaya

Nagbuhat Og Kontra-rebolusyonaryong Tinagurhang Taktika Si Macapagal-Arroyo Batok Sa Katawhang Pilipino Ug Mga Rebolusyonaryong Pwersa

Prof. Jose Ma. Sison
National Democratic Front of the Philippines
Chief Political Consultant
Abril 07, 2004

Akong gi-akusaran si Gloria Macapagal-Arroyo sa pagbuhat og kontra-rebolusyonaryong tinagurhang taktika nga kabangis ug pagpanglingla batok sa katawhang Pilipino, mga rebolusyonaryong pwersa ug mga ligal nga demokratikong pwersa.

Sa usa ka bahin, nagpaaron-ingnon siya karon nga interesado sa panaghisgot-kalinaw tali sa National Democratic Front of the Philippines (NDFP) human sa walay pagkutub niyang pagsuspindi sa pormal nga panaghisgot sukad niadtong 2001 hangtud 2003. Sa pikas bahin, gibuhian niya dungan niini ang pinakamangtas nga mga ataking militar ug saywar batok sa katawhan, mga rebolusyonaryong pwersa ug ligal nga demokratikong pwersa.

Mangilngig na ugani ang paturagas nga pinatyanay nga gipangbuhat sa mga pinalabing militar ug pulis sa rehimeng Macapagal-Arroyo. Apan ang daw irong buang nga mga paghot ug mga dayag nga pagpamakak ni national security adviser Norberto Gonzales nagtimaan nga aduna pa'y mas grabing tagamtamon gikan sa rehimen ang katawhan ug tanang uban pang organisadong pwersa nga giila sa rehimen nga kaaway niini.

Sibaw ang lungutlungut sa rehimen nga gamiton ang politikanhong gahum niini, partikular ang mga mapig-otong makinarya ug pinansyal nga kahinguhaan sa estado, aron manglimbong sa eleksyon sa Mayo. Busa, gigamit ni Gonzales ang tanang pamaagi aron magsabwag og mga bakak para atakihon ako ug ilambigit sa Partido Komunista, pakaulawan ug daoton ang dungog sa mga progresibong partido sa party list. Gihawanan sa rehimen ang dalan alang sa dinagkong pagpanglimbong batok niining mga partidoha ug batok nag-una sa mga karibal ni Macapagal-Arroyo sa pagkapresidente.

Gilaoman nga makakuha og 16-18% sa boto ang unom ka progresibong partidong elektoral nga gidaota'g dungog ni Gonzales. Gikahadlokan ang katakus nila isip "swing force" nga makapapaling sa resulta sa eleksyon. Ug gibabagan usab nila ang laraw ni Macapagal-Arroyo nga maghimo og dinagkong pagpanglimbong batok nag-una sa mga mayor nga partido sa oposisyon.

Malisyosong manglibakay si Gonzales. Dayon niyang ipadayag sa publiko ang unsamang butang nga magtugot kaniya nga manglingla nga gilambigit kuno nako ang rebolusyonaryong kalihukang tago sa unsamang progresibong partidong elektoral. Walay basehan ang iyang mga pasangil ug naghimo lamang siya og mga binata-bata nga pagpangintriga. Gihimo niya kini sa tulo ka pamahayag sa midya karong bag-ohay lang, nga mora'g aprubado ni Macapagal-Arroyo.

Daghan ang natingala nganong nahimong national security adviser si Norberto Gonzales luyo sa dayag nga kawalay panukdanan niya bahin sa nasudnong seguridad ug luyo usab sa dugay niyang pagpasiugda sa min� nga sosyal-demokrasya. Karon, tin-aw na kaayo ang kamatuoran. Girekomenda siya'g maayo dili lamang ni Jesuit provincial Fr. Intengan kundili sa CIA mismo, nga dugay nang nangempleyo kaniya isip intelligence asset ug impiltrador sa Moro National Liberation Front, ilabina sa panahon sa pagka-tserman ni Nur Misuari.

Ang binuhatan ni Gonzales takdo nga timailhan sa tinuod nga katuyoan sa imperyalismong US ug itoy nga rehimeng Macapagal-Arroyo. Dili lamang siya espiya sa itoy nga rehimen, espiya usab siya sa bugtong superpower. Lakip siya sa pundok sa mga itoy nga opisyal nga nagsugyot sa gobyerno sa US nga hinganla'g "terorista" ang PKP, BHB ug ang hepe nga pangpolitikang konsultant sa NDFP bisan pa nga naglapas kini sa The Hague Joint Declaration ug uban pang kasabutan sa panaghisgot-kalinaw tali sa GRP ug NDFP.

Gipunting nako ang prinsipyo sa nasudnong soberanya sa The Hague Joint Declaration, ang mga garantiya sa Joint Agreement on Safety and Immunity Guarantees, ang mga katungod nga gipalig-on sa Comprehensive Agreement on Respect for Human Rights and International Humanitarian Law ug ang Hernandez doctrine mahitungod sa mga politikanhong paglapas.

Isip sekretaryo alang sa special operations, nagbaton og yaweng papel si Gonzales sa pagparalisa sa panaghisgot-kalinaw tali sa GRP ug NDFP sukad niadtong 2001 hangtud 2003. Dihang gibuhian siya batok sa mga rebolusyonaryong pwersa nga girepresentahan sa NDFP, mi-atras ba pag-usab si Macapagal-Arroyo sa panaghisgot-kalinaw, partikular sa natakda nga ikatulong hugna sa pormal nga panaghisgot sa April 26-29, 2004? Dili ikalalis nga gibutang ni Gonzales sa peligro ang pagpadayon sa panaghisgot-kalinaw ug gi-alkontra niya ang madaugon nga una ug ikaduhang hugna sa pormal nga panaghisgot sa Oslo.